Te tauturura’a ’e te arata’ira’a nō tō ’outou ananahi

E 17 matahiti tō’u ’a haere ai te peropheta, te peresideni Spencer W. Kimball (1895–1985), i Kōrea Apato’a i te matahiti 1975. ’Ua ’ite au iāna i roto i te tahi rurura’a e 400 feiā ’āpī Kōrea tei putuputu nō te fa’aro’o i tōna reo.

’Ua fa’a’ite mai te peresideni Kimball e mea nāhea tōna mā’imira’a i te mau pāpa’ira’a mo’a ’e i te purera’a i te mau mahana ato’a mai tōna ’āpīra’a mai ā. ’Ua paraparau ’oia i ni’a i te faufa’a rahi nō te ha’amaura’a i te mau fā mātāmua roa. ’Ua parau ’oia ē, e mea ti’a ia mātou ’ia haere i te ha’api’ira’a ’evanelia (séminaire), ’ia fa’aineine nō te misiōni ’e te fa’aipoipora’a mure ’ore, ’e ’ia ’ohipa ’ia tae i te fa’aorara’a. ’Ua fa’a’ite ato’a ’oia i tōna ’itera’a pāpū.

’Ua tūrama te mau parau a te peropheta i tō’u ferurira’a. Tei roto noa ā vau i te fare ha’api’ira’a tuarua, ’aita rā vau i ’ana’anatae i te ’ohipa ha’api’ira’a. Mea au a’e nā’u i te tū’aro ! ’Ua ha’uti noa vau i te tu’era’a pōpō i te mau taime ato’a e nehenehe iā’u, ’e e mea pinepine a’e au i te ha’uti i te rave i tā’u ha’api’ira’a. E ’ere au i te pīahi maita’ita’i. I muri a’e rā i tō’u fa’aro’ora’a i te peropheta, e ha’uti iho ā ïa vau i te tu’e pōpō, ’ua fa’aoti rā vau e ha’amau i te tahi mau ’ohipa mātāmua roa.

E fa’aitoito roa vau i tā’u ha’api’ira’a i teienei. E rave au i tā’u misiōni, e tā’atihia vau i roto i te hiero, ’e e ha’amau vau i te hō’ē ’utuāfare ’oa’oa. I ’ite au ē, ’ia tupu teie ananahi rahi ra, e tītauhia ïa ’ia pe’e i te peropheta—noa atu ā te ’ohipa.

Nā roto i te mau rāve’a maita’ita’i ’e ’aore rā te mau tāmatara’a ato’a tā ’outou e fa’aruru, e maita’i ’outou ’ia pe’e ana’e ’outou i te arata’ira’a tā te mau peropheta ora e hōro’a nei.

’Ua fa’aoti au e tāvini i tā’u misiōni, terā rā, tē vai ato’a rā te tahi fa’ahepora’a māoti te tau fa’ehau nō Kōrea Apato’a. I muri a’e i te ha’api’ira’a tuarua, e rave rahi feiā ’āpī tamāroa tei fa’aō ia rātou i roto i te nu’u fa’ehau, fa’aoti i te reira tāvinira’a, ’e i muri noa iho e haere ’oi’oi atu i te ha’api’ira’a ’e te ’imira’a ’ohipa. Mea fifi roa i te hōro’a i nā matahiti e piti nō te tāvinira’a misiōnare. E mea iti te mau misiōnare Kōrea i taua tau ra.

I te 19ra’a o tō’u matahiti, ’ua tāpe’a vau i tā’u fafaura’a, ’ua fa’aineine ’e ’ua hapono vau i tā’u mau parau misiōni. ’Ua pi’ihia vau ’ia tāvini i roto i te misiōni nō Busan Kōrea. Hō’ē matahiti i muri mai, ’ua ’āfa’ihia vau i te ’āua fa’ehau. ’Ua ’oto roa vau i te mea ē, ’ua tāpe’ahia tā’u misiōni.

I tō’u fa’aotira’a i tā’u tau fa’ehau e toru matahiti i muri mai, ’ua tae mai te mana’o ē ’aita vau i fa’aoti i tā’u misiōni. ’Ua parau mai te mau ta’ata iā’u : « ’Ua tāvini a’ena ’oe i tā ’oe misiōni. ’Ua ta’a maita’i i te Fatu i tō ’oe vaira’a, nō reira, ’ua rava’i tā ’oe tāvinira’a hō’ē matahiti. »

’Ua ani au i tō’u hoa maita’i nō te ha’api’ira’a ’evanelia séminaire i te mea e rave. ’Ua nā ’ō mai ’oia ē, ’ua ’ite a’ena ’oia, e tāvini au hō’ē ā matahiti i tā’u misiōni. ’Ua hōro’a mai tōna ti’aturira’a iā’u i te ha’apāpūra’a e tāvini mau ā vau hō’ē ā matahiti. ’Ua tāvini au i te piti o te matahiti o tā’u misiōni i roto i te misiōni nō Seoul Kōrea. Te otira’a tā’u misiōni, ’ua 25 matahiti tō’u. I muri mai, ’ua fa’aipoipo vau i taua hoa ra ’e ’ua tā’atihia māua i te hiero nō Laie (Vaihī, Marite).

’Ua ha’api’i mai teie ’ohipa iā’u ē, e maita’i ’outou noa atu e’ita te mau ’ohipa e tupu mai te au i tā ’outou i ’ōpua na. ’Ia tū’ati ana’e tā ’outou mau fa’anahora’a ’e tā ’outou hi’ora’a ātea i tō te Fatu nō ’outou, e tauturu ’oia ia ’outou i roto i tā ’outou mau fa’aotira’a o te orara’a nei.

Noa atu ē, ’aita vau i pāpū maita’i i tō’u ’āpīra’a i te huru orara’a nō’u ananahi, ’ua ’ite rā vau ē, te tu’ura’a i te mau mea pae vārua nā mua roa, ’o te tāviri ïa nō te manuiara’a—’eiaha noa i roto i teie orara’a, i roto ato’a rā i te orara’a nō a muri a’e.

I tō ’outou bāpetizora’a, ’ua fa’ari’i ’outou i te hōro’a nō te Vārua Maita’i. ’A rōtahi ai ’outou i ni’a i te mau muhumuhu tā ’outou e fa’ari’i, e pāruru te Vārua Maita’i ia ’outou ma te arata’i ia ’outou i ni’a i te e’ati’a mau. E ’ite ato’a ’outou i te tāmarūra’a ’e te hau.

’A fa’aineine ai ’outou nō tō ’outou ananahi, ’a ha’amana’o ’ia :

• Mā’imi i te mau pāpa’ira’a mo’a.

• Tāmau i te pure.

• Pe’e i te peropheta.

• Tūru’i noa i ni’a i te Fatu.

I tō ’outou fāito matahiti, ’ua ha’api’i au i te huru ta’a ’ē ’e te hīro’a o te Fa’aora ’e nāhea vau e riro rahi ai mai iāna te huru. E mea maita’i roa ’oia. E’ita tā’u e nehenehe e riro hope roa mai iāna i roto i teie orara’a, tē fa’aitoito nei au i tō’u pūai ato’a, ’e ’ua riro mai au ’ei ta’ata maita’i a’e nā roto i te ravera’a i te reira.

’Ua ’ite au ē, tē ora nei ’o Iesu Mesia. Maoti ’ōna, e tīa’ira’a rahi tō’u nō tō’u iho ananahi—’e e nehenehe ato’a ’outou e nā reira !