Հիսուս Քրիստոսի ավետարանը․ Ուրախ ձայն

Հիսուս Քրիստոսի ավետարանը վերականգնվել է Մարգարե Ջոզեֆ Սմիթի միջոցով։ Եկեղեցուն ուղղված իր վերջին վկայության մեջ նախագահ Մ. Ռասսել Բալլարդը՝ այն ժամանակ Տասներկու Առաքյալների Քվորումի գործող նախագահը, ասել է․

«Մենք գիտենք, թե ով է Աստված. մենք գիտենք, թե ով է Փրկիչը, որովհետև մենք ունենք Ջոզեֆին։ …

«… Որքան օրհնված ենք մենք, որ գիտենք մեր կյանքի նպատակի մասին, թե ինչու ենք մենք այստեղ և ինչ պետք է փորձենք անել և իրականացնել մեր առօրյա կյանքում»:

Հիսուս Քրիստոսի Վերջին Օրերի Սրբերի Եկեղեցու անդամների համար դա ներառում է Աստծո փրկության «կատարյալ ծրագրի» մասին հասկացողությունը, որը հայտնի է նաև «երջանկության մեծ ծրագիր», «փրկագնման ծրագիր» և «ողորմության ծրագիր» անուններով (Ալմա 42․8, 11, 15)։ Աստծո ծրագիրը «կյանքից հանում է առեղծվածը, իսկ մեր ապագայից՝ անորոշությունը»։ Ծրագրի և կյանքի նպատակի հիմնական և առանցքային մասը «Քրիստոսի վարդապետությունն» է։

Ավետարանի միջոցով մենք գիտենք, որ Աստծո զավակներն ենք, ուղարկված երկիր՝ փորձվելու և պատրաստվելու հարություն առնելու համար (տես Վարդապետություն և Ուխտեր 76.39): Մենք գիտենք պատվիրանները և մեզ սովորեցնում են «բարին տարբերել չարից» (2 Նեփի 2․5)։ Մենք գիտենք, որ այստեղ ենք սիրելու և ծառայելու համար, և որ Փրկիչը կանչել է մեզ հաղթելու աշխարհին և օգնելու ուրիշներին անել նույնը (տես Հովհաննես 16․33)։

Այն, ինչ Ջոզեֆ Սմիթն անվանեց «մեր Տեր Հիսուս Քրիստոսի Ավետարանի ուրախ ձայնը», կուժեղացնի մեզ դժվարին օրերին և իմաստ ու նպատակ կբերի մեզ և ուրիշներին:

Աստված մեզ բարոյական կամքի ազատություն է տվել, որպեսզի կարողանանք հաշվետու լինել մեր ընտրությունների համար (տես Վարդապետություն և Ուխտեր 101․78, տես նաև 2 Նեփի 2․16)։ Որպես «բոլոր բաներում հակադրության» մաս (2 Նեփի 2․11), սատանային թույլատրվում է գայթակղել մեզ՝ չարաշահելու մեր կամքի ազատությունը:

Մեր օրերում Տեր Հիսուս Քրիստոսը կանչեց Մարգարե Ջոզեֆ Սմիթին և «երկնքից խոսեց նրա հետ, և նրան պատվիրաններ տվեց» (Վարդապետություն և Ուխտեր 1.17): Այսօր Տերը շարունակում է հայտնել Իր պատվիրաններն ու կամքը Իր մարգարեներին, քանի որ Նա ցանկանում է առաջնորդել մեզ դեպի երջանկություն այս կյանքում և դեպի սելեստիալ փառք՝ հաջորդ կյանքում:

King Benjamin Preaches to the Nephites [Բենիամին թագավորը քարոզում է նեփիացիներին], Գարի Լ. Կապպ

Teaching True Doctrine [Ճշմարիտ վարդապետության ուսուցում], Մայքլ Մալմ

Joseph Smith Preaching [Ջոզեֆ Սմիթը քարոզում է], Սեմ Լոլոր

Աստծո պատվիրաններին հնազանդվելը պետք է բխի Նրա հանդեպ մեր նվիրվածությունից և սիրուց: Հիսուս Քրիստոսը հայտարարել է. «Եթե ինձ սիրում եք, պահեք իմ պատվիրանները» (Հովհաննես 14․15)։ Երբ պահում ենք Տիրոջ պատվիրանները, Նրա հանդեպ մեր սերը ցույց տալու վերջնական արդյունքը երջանկություն և ուրախություն բերող օրհնություններն են (տես Վարդապետություն և Ուխտեր 130․20-21)։

Մեր աստվածային ծագման և ճակատագրի հստակ հեռանկարով մենք գիտենք, որ․ «հենց այն բաները, որոնք լավագույնս կփոխեն [մեր] մահկանացու կյանքը, ճիշտ այն նույն բաներն են, որոնք [մեր] կյանքը լավագույնը կդարձնեն ողջ հավերժության մեջ»:

Ուրախ նորադարձը, որին ես հանդիպեցի Ճապոնիայում տարիներ առաջ, գտավ Հիսուս Քրիստոսի վերականգնված ավետարանը՝ իր, միսիոներների և անդամների ջանասիրությամբ: Նա բացահայտեց իր նպատակը և ընդլայնեց երջանկության մեծ ծրագրի իր տեսլականը, որը նրան օրհնություններ և ուրախություն բերեց, որոնք բարձրացրին նրան նյութապես և հոգևորապես:

Տասներկու Առաքյալների Քվորումից երեց Պատրիկ Քիրոնն ուսուցանել է․

«Իր յուրաքանչյուր զավակի համար նախատեսված մեր Երկնային Հոր սիրառատ ծրագրի և մեր Փրկիչ Հիսուս Քրիստոսի փրկագնող կյանքի և առաքելության շնորհիվ մենք կարող ենք և պետք է լինենք ամենաուրախ մարդիկ երկրի վրա: Նույնիսկ, երբ կյանքի փոթորիկները հարվածում են մեզ այս անհանգիստ աշխարհում, մենք կարող ենք զարգացնել ուրախության և ներքին խաղաղության աճող ու մնայուն զգացում՝ Քրիստոսի հանդեպ մեր հույսի և երջանկության գեղեցիկ ծրագրում մեր սեփական տեղը հասկանալու շնորհիվ»:

Ես հայտնում եմ իմ երախտագիտությունը և վկայությունը Հիսուս Քրիստոսի վերականգնված ավետարանի և երջանկության մեծ ծրագրի վերաբերյալ։ Ես հրավիրում եմ քեզ ճաշակել ավետարանի պտուղները և ավելի շատ ուրախություն զգալ հավերժական կյանքի քո ճանապարհին։