iYau Vunitaki

NaVunau kei na Veiyalayalati 19 e vakamacalataka e rua na ka me baleta na iVakabula.

E kaya o Luke ni buno ni Turaga ena Were o Kecisemani “sa vaka na titiri ni dra” (Luke 22:44). “Sa vaka na” e vakatura e dua ga na ivosavosa.

E sa vakamatatataka o Jisu. E kaya o Koya ni Nona vakararawataki a vakavuna me “titiri kina na dra mai na qara kecega ni yagoqu” (Vunau kei na Veiyalayalati 19:18). Sega na ivakatautauvata. Sa ka levu na Nona yaluma sa bunotaki dra kina vakaidina.

Ena vanua tale eso, e vakayagataka na ivolanikalou na malanivosa vaka na “veivakararawataki tawacava” kei na “itotogi tawamudu.” E kaya o Alama Lailai ni a “kuretaki ena rarawa tawamudu” (Alama 36:12). Ia a tolu ga na siga na nona vakararawataki (raica na Alama 36:16). E “tawamudu” vakacava oya?

E vakamatatataka tale o Jisu: Me vaka ni sa tawamudu ka tawacava na Tamada Vakalomalagi kei Jisu, na totogi cava ga Erau solia, ena kena ivakamacala, sai totogi “tawamudu” se “tawacava”, veitalia na kena dede (raica na Vunau kei na Veiyalayalati 19:6–12). Na nodra vakararawataki ga na luve ni veivakarusai ena tawacava saraga (raica na Vunau kei na Veiyalayalati 76:30–38).

O ira na curuvou rawa era dau tarogi ira na daukaulotu: Vakacava kevaka au sa papitaiso oti ena dua tale na lotu? E gadrevi beka meu papitaiso tale?

E vakamacalataka na Vunau kei na Veiyalayalati ni kevaka e sega na matabete—na dodonu ni lewa me cakacaka ena yaca ni Kalou—“e dina ga sa rawa ni papitaisotaki vakadua na drau e dua na na tamata ia sa sega ni yaga vua” (Vunau kei na Veiyalayalati 22:2).

Sa qai kena isau: “Na nomu papitaiso taumada e dua na ivalavala dodonu ka yavutaki ena veika o kila ena gauna o ya. Oqo o sa kila vakalevu cake, ka vinakata na Turaga mo cakacakataka na kila oqori.”

A sega ni vinaka na Parofita o Josefa Simici ena ka vakabisinisi se ka vakailavo. Ena ivakarau vakavuravura, a sega ni rawaka o koya.

A kaya vua na Turaga ni na vakakina: “Mo kakua ni vakaogai iko ena cakacaka vakayago, ni ko sa sega ni ilesi kina” (Vunau kei na Veiyalayalati 24:9).

Era na tiko na nomu itokani kei na lewe ni kalasi ka lako ki na univesiti vinaka cake mai vei iko, rawata na cakacaka kilai cake mai vei iko, ka rawaka tu vakalevu mai vei iko e vuravura.

Me vakacava kina?

Na bula e sega ni ka ni veisisivi. E dodonu mo tovolea na nomu igu taucoko. Ia kakua ni taqaya kevaka o raica ni ra sa lako siviti iko tiko na tani ena gaunisala ni bula. Era na rairai sega ni gole tiko ki na vanua vata ga o gole kina! Cakava tikoga na ka e vinakata na Turaga mo cakava—na nomu “veikacivi”—ka kakua ni leqataka na Nona ituvatuva me baleta e dua tale.

E dau vakananuma vakawasoma na iVakabula vua na Parofita o Josefa Simici ni veika kece e dodonu me caka “ena kena ivakarau dodonu” (raica na Vunau kei na Veiyalayalati 20:68; 28:13; 58:55; 107:84). O gadreva na lawa se yakusurasura na ka kecega.

Ia e sega ni kena ibalebale oqori ni sega tu na veivagalalataki. Me ivakaraitaka, a kaya na Turaga vei Josefa Simici ni “sega ni bibi na ka dou na kania se gunuva ena gauna dou kania ka gunuva kina na sakaramede”—mo dou dau nanuma vua na Turaga na yagoqu ka a vakotori ena vukumudou (Vunau kei na Veiyalayalati 27:2).

Ni sa gauna me liutaki kina na Lotu, sa sega na veivagalalataki. E dua ga na tamata ena dua na gauna e rawa ni ciqoma na ivakatakila me baleta na Lotu: imatai o Josefa Simici (raica na Vunau kei na Veiyalayalati 28:2); o koya sa lesia na Turaga “me kena isosomi” (Vunau kei na Veiyalayalati 28:7)—Brigham Young, John Taylor, kei na so tale ki na parofita edaidai.

O ira na iliuliu veivakauqeti tale eso ni Lotu e rawa ni ra veivakavulici, veivakasalataki, ka veivakayaloqaqataki (raica na Vunau kei na Veiyalayalati 28:4–5). Ia na Peresitedi duadua ga ni Lotu e rawa ni vosa ena vukuna na Kalou ena veika me baleta na Lotu raraba.