Toso Vata kei na Yalotabu

O rawa ni dolava tikoga na nomu isema vua na Tamada Vakalomalagi ni ko masu vakawasoma ena yalomalua ki Vua. Vulica na Nona vosa ena ivolanikalou. Rogoca ka muria na Nona italai digitaki—ira na parofita kei na iapositolo. Ka tovolea ena nomu igu mo muria na Nona ivunau.

Na sema tu ga kivua na Tamada Vakalomalagi sa ka marautaki ka vakaibalebale kina noda bula. Sa vukei keda ni kila vakavinaka cake na Nona ituvatuva ka vakila na Nona loloma. Eda kila na gauna e vosa kina nida segata me totoka tu na ituvaki vakayalo.

E vakananumi keda na Turaga ena ivolanikalou meda: “Tiko lo, mo dou kila niu sa Kalou” (Same 46:10; raica tale ga na Vunau kei na Veiyalayalati 101:16). Sa sinai tu o vuravura ena rorogo kei na veivagolei tani, ia e sega ni rogo levu na Tamada Vakalomalagi se kosakosa. E vosa o Koya ena “domo lailai vinaka” (1 Tui 19:12). Eda rawa ni kila na Nona veivakayarayarataki nida tiko lo.

Me ivakaraitaki, vakaraica e dua na vanua vakanomodi mo masu, vakavoliti iko tu ena totoka ni bulibuli ni Kalou, se marautaka na ivakatagi kei na cakacaka ni liga veivakauqeti. Na veika oqo sa vukea me dolava na noda vakasama kei na lomada ki na veika sotavi talei mai vua na Tamada Vakalomalagi.

Sa dau vosa tu ga vei keda na Tamada Vakalomalagi ena veivakauqeti. Ia eda na vakadeitaka vakacava ni lako mai Vua e dua na veivakauqeti? E dua na idusidusi vinaka e vakaraitaka na parofita o Momani “A sa uqeti mai vua na Kalou na veika kecega sa sureta ka vakayarayarataka na tamata me ra caka vinaka, ka lomana na Kalou, ka qaravi koya” (Moronai 7:13). A tukuna taumada o Perestiedi Gordon B. Hinckley (1910–2008): “Oya na veivakatovolei, ni sa tukuni ka vakayacori na ka kecega. E sa uqeta beka e dua me caka vinaka, me duri cake, me caka dodonu, me yalovinaka, me dau lomasoli? Ia esa mai vua na Yalo ni Kalou.”

Vakavuqa, na veivakauqeti ena kaya “lako ka kitaka” (raica na 1 Nifai 3:7) se mo kaya e dua na ka. Nida cakacakataka na veivakauqeti oqori—vakabibi na matai ni gauna eda vakila kina—ena basika e levu na kilaka. Ia, keo nanuma ni sa dodonu mo tukuna se cakava e dua na ka vinaka ka yaga, cakava sara! Na veivakadeitaki nio tiko ena sala dodonu e yaco nio cavuikalawa.

Na kilai ni vosa tu na Kalou esa dua na ivalavala. Sa gadrevi tu na vakabauta kei na inuinui ni na vosa vei iko na Tamada Vakalomalagi ka vukei iko ni cakava e levu cake mai na ka o rawa ni cakava vakataki iko. Sa ka bibi talega me nanumi ni sa nuitaki iko na Tamada Vakalomalagi, sega ni qara walega na Nona veidusimaki kina nomu bula ia mo vakalougatataki ka laveti ira talega na tiko wavoliti iko.

Ena sega ni dau tu ga vei iko na isaunitaro kece. E sega ni namaki vei iko. Ia o sa vakauqeti mo cakacakataka na vakabauta. Nio cakava, ona raica ni sa rawa ni vosa na Kalou ena sala e vuqa mai na kena o rawa ni vakasamataka. Ni toso na gauna, ena matata cake na Domona, kilai levu na Nona veidusimaki, ka siqemi levu tu na Nona tiko me vukei iko ni vakataka na ka e kila o Koya o rawa ni vakataka.