E Via Vosa Vei Ikona Tamamu Vakalomalagi

Mai vei Elder Neil L. Andersen

Ena Kuoramu ni iApositolo Le Tinikarua

Vakabauta tu ni sa vosa tiko vei iko na Tamamu Vakalomalagi. Sa tiko ekea o Koya ka lomani iko vakalevu mai na veivosa tukuni rawa.

Eda sa luvena tagane ka luvena yalewa na Kalou, wasea vata tu na vuravura yawa mai na noda itikotiko vakalomalagi. Oqo na bula e vuravura, na gauna meda vakayago kina, digitaka na vinaka mai na ca, vakatubura na noda vakabauta na noda iVakabula o Jisu Karisito kei na Nona Veisorovaki tabu, ka tugana na yavu ni bula marau ni Tamada.

Ni tawananumi rawa na noda bula taumada, eda galilitaka, so na gauna, na vuravura eda sa biuta mai. Sa solia vei keda na Tamada e dua na isolisoli vakayalo meda semati tikoga Vua ka ciqoma na veituberi, veidusimaki, kei na vakacegu mai Vua. Eda kila vakavinaka na isolisoli oqo; sa vakatokai na masu.

Masuta na Tamamu Vakalomalagi

A vakaroti Atama kei Ivi e dua na agilosi kei ira kece ena muri rau me ra “veivutuni ka masuta tikoga na Kalou ena yaca ni Luvena me tawamudu” (Mosese 5:8).

Vakatavulica o Jisu:

“Dou kerekere ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou” (Maciu 7:7).
“Ni ko sa masu, masu vua na Tamamu ena ka e vuni” (Maciu 6:6).
“O koya mo dou qai masu vakaoqo: Tamai keimami mai lomalagi, Me vakarokorokotaki na yacamuni” (Matthew 6:9).

A masu tikoga o Jisu vei Tamana (raica na Luke 6:12; Marika 6:46). Mai Kecisemani, a tukuna vei iratou na Nona tisaipeli o Koya, “Dou tiko ga eke, meu masu mada” (Marika 14:32). Ni vakoti tu, a masulaki ira na sotia ka vakoti Koya o Jisu: “I Tamaqu, kakua ni cudruvi ira; ni ra sa sega ni kila na ka era sa kitaka” (Luke 23:34).

Eda sa vakasalataki meda “dau masu tikoga.” Nida “vakarorogotaka vua na Turaga na ka kecega [eda] kitaka, … ena dusimaki [keda] ena veika vinaka o Koya” (Alma 37:37). Me kena ikuri, eda “tabalaka na vakavinavinaka kei na vakacaucau ena kena kaukauwa taucoko e taukena tu na [yaloda]” (Mosaia 2:20).

Ia sa ka lagilagi sara, ni sauma tu na Tamada Vakalomalagi na noda masu! Na taro vakasamataki vei keda oya na sala cava eda rawa ni rawata ka kila vakamatata cake kina na isaunitaro eso, veidusimaki, kei na vakacegu e lako mai vua na Tamada?

Na ciqomi ni isau ni masu sa tekivu ena noda vakabauta na Tamada Vakalomalagi kei na Luvena, o Jisu Karisito. Eda vakararavi vua na Tamada, cakava na noda vinaka taucoko ni muria na ivunau, ka vakaraica na Ligana ena ka kecega (raica na Vunau kei na Veiyalayalati 59:21).

Na Tamamu Vakalomalagi ena tu tikivi iko, vaqaqacotaka na nomu sasaga, vakacegui iko, ka “vakatabuya na nomu rarawa mo rawata kina na vinaka” (2 Nifai 2:2) ni ko masuti Koya.

Rogoca na Domona

Nida vakabauta tu na Kalou ka muria na Nona ivunau, eda sa vulica tiko ni rogoca vakavinaka na Domona.

Ena 1993, a sureti au kei na watiqu, o Kathy, o Peresitedi James E. Faust (1920–2007), ka lewe ni Kuoramu ni iApositolo Le Tinikarua ena gauna oya, me keirau tiko vata kei koya ena dua na lotu ena Brigham Young University. A yaco na lotu oqo ni se bera sara na tikori vakarabailevu ni talevoni vuku, vakauitukutuku raraba, kei na initaneti.

Ena nona vosa, a vakarota o Peresitedi Faust: “Ena nomuni itabatamata, o ni na bololaki ena vuqa na domo ka tukuna na ivakarau mo bula kina, na ivakarau mo marautaka kina na nomu gagadre, kei na ivakarau me nomu kece kina.” Ia “na domo mo vulica mo rogoca sai koya na domo ni Yalotabu.” Me caka vakakina, “meda dolava na daligada, vagolea na mata ni vakabauta kina ivurevure ni domo, ka rai matua ki lomalagi.”

Ena veiyabaki e muri, a vakatavulica o Peresitedi Russell M. Nelson, “Kevaka o sa kauwai vakalevu tu kina itukutuku eso mai na talevoni ka sega ki na vakasolokakana ni Yalotabu, o sa balaki iko tu kina ka ririkotaki vakayalo.”

Na domo ni Yalotabu e lako ruarua mai kina noda kilaka kei na vakanananu. “Au na tukuna kina nomu vakasama kei na vu ni yalomu, ena Yalo Tabu, ka na qai lako mai vei iko io ka na tiko sara ena lomamu” (Vunau kei na Veiyalayalati 8:2 Vakarorogo ki na nomu lewaeloma—dau vakatekivu e kea na ivakatakila.

Rai tiko e tuba ena katubaleka na goneyalewa

Masu ena Yalo Vakabauta

Na isaunitaro kei na veivakauqeti ni Kalou. e sega ni rawa ni vakasaurarataki. Eda masu ka wawa ena yalo vakabauta. Eso na isaunitaro ena sega ni basika ena bula oqo, ia vei ira na yalododonu, ena vakauta tu ga na Turaga na Nona vakacegu (raica na Joni 14:27). Eso na gauna, era basika na isaunitaro ena “vunau ena vunau, na ivakavuvuli ena ivakavuvuli” (Vunau kei na Veiyalayalati 98:12).

Na domo mai lomalagi e rawa ni basika tawanamaki tu ena tikina kei na vanua vakanomodi eso. Ena vakanomodi ni noqu masu kei na vakasama vagumatua vakamataka, au sa raica na veivakalougatataki matalia. Na wiliki ni ivolanikalou ena veisiga, vakai iko, ka tawaveivakasosataki, ni matau tu eso na gauna, e rawa ni kauta mai na domo ni Yalotabu ki na lomada vaka na bukawaqa ena so tale na gauna.

Ni wavoliti keda tu na rorogo kei na veivagolei tani kei vuravura, sa dusimaka na Nona parofita na Turaga me tara tikoga e levu na valetabu. Ena vale tabu ni Turaga oqo, ni da biuta tu e tautuba na veibolebole ka curu ena noda masu kei na kauwai, eda sa vulica na dina ni ka tawamudu eso. Ena yabaki sa oti, a yalataka o Peresitedi Nelson ni gauna eda sokalou kina ena valetabu, “E sega na ka ena tadolavi lomalagi vakalevu cake. E sega!”

Na koniferedi raraba yadua e kauta talega mai na ikuri ni veivakalougatataki levu cake. Ena vula tu mai ni Epereli, eda na sota tale ena koniferedi raraba meda rogoca na domo ni Turaga. Au yalataka nio sa vakavakarau ka lako mai ena yalomasumasu ki na koniferedi raraba, o na kunea na isau ni nomu kauwai ka kila ni sa tiko kei iko na “liga i lomalagi”.

Vakabauta tu ni sa vosa tiko vei iko na Tamamu Vakalomalagi. Sa vakakina! Me sa vukei iko na nomu vakabauti Koya kei na Luvena Daulomani mo tadolava na ilati ka rogoca na domona na Tamamu. Au vakadinadinataka ni tiko e kea o Koya ka lomani iko vakalevu tu mai na vosa tukuni rawa eso.