Na iVadi mo Kakua Tale na Druka

Droini mai vei Eric Chow

“Au taileitaka na druka!”

Oqori e sega beka ni ka o rogoca tu ni ra kaya e vuqa na tamata. E levu vei keda e sega ni marautaka na druka. E ka mosimosi, vakacala na noda ituvatuva, ka so na gauna e veivakamadualaki saraga.

Ia vakacava ke tiko e dua na ka vuni me kua tale na druka?

“Wawa toka,” o rairai vakasamataka tu. “E sega ni dua e vinaka sara. Eda caka cala kece. E rawa vakacava me kakua ni dua e druka?”

A dikeva o Thomas Edison na ka vuni ni tovolea tu vakavuqa me bulia na mata ni cina. “Au sega ni druka vaka 1,000,” a kaya o koya. “Na mata ni cina e sa veibuli ni 1,000 na kalawa.”

E druka vakavuqa o Edison, ia a sega ni digitaka me raica ena sala oya. Sai koya oya na ka vuni! Vagolea na nomu rai! Nio vagolea na nomu rai, na nomu “druka” e rawa ni yaco me ka vou ka vinaka.

Oqo e va na sala mo vagolea kina na nomu rai me baleta na druka:

1. Vakasamataka na ka o rawa ni qarauna se sega. Eso na gauna na veika eda leqataka vakalevu eda sega ni qarauna rawa. Na sasagataki ni cakacaka, me kena ivakaraitaki. O rawa ni qarauna na sasaga ni kena cakacakataki, ia o sega ni rawa ni qarauna na kena macala. Ko na “druka” kevaka o lomaleqa voli, tovolea mo sasagataka na ka o rawa ni qarauna ka vakararavi vua na Turaga. Sa yalataka o Koya ni “sa veivuke na ka kecega mera vinaka kina era sa lomana na Kalou” (Roma 8:28). Ia keo sega ni rawata na cakacaka oya? O sega ni druka o iko! Ke o sega mada ga ni rawata na ka o vakanuinuitaka tu, o sa saga ena nomu igu taucoko, oqori na rawaka!

   

2. Kubeta na vinaka ka toso tikoga. Nio vakila o sa druka tiko, tovolea mo raica vakatitobu na ka o sotakaya. Sega nio digitaki ena timi ni qito? E vakatuburarawa na maka ni veitarogi? Na raici ni vanua o sotavi dredre kina ena tuvalaka vinaka vei iko na ka o gadreva mo kitaka ena veisiga ni mataka. Ke vakavuna na nomu veilecayaki na ka o sotakaya, vakadeitaki iko ka digitaka mo toso tikoga ena ka vinaka. E rawa ni vukei iko saraga na druka ni sasagataka tu na idusidusi vou ka vinaka cake.

   

3. Nanuma oqo e sega ni icavacava. E dua na ivosavosa matau: “Ena daumaka na ka kece ni sa cava. Kevaka e sega ni daumaka, e sega ni cava.” E vakatavulica o Moronai e dua na ka vata ga. A kaya o koya, Sa oti li na kena gauna? Raica au sa kaya vei kemudou, E segai; e se sega ni cava na nona Kalou ni cakacaka mana na Kalou” (Momani 9:15). Nida vakararavi vua na Kalou, toso ki liu ena vakabauta, ka nanuma ni sega ni cava tu na noda italanoa ni cala e dua na ka, sa rawa ni yaco na cakamana ka yaco vakaoti tu me rawaka vakasakiti na “druka” eda rawa ni sotava.

4. Tucake kei Karisito. Ena vuku ni Veisorovaki i Jisu Karisito, e sega na druka e tudei sara. E dau tiko ga na digidigi meda veivutuni, vagolea lesu na yaloda vua na Kalou, ka kerea na Nona veivuke. E vakatavulica o Peresitedi Jeffrey R. Holland, na Peresitedi Vakatawa ni Kuoramu ni iApositolo Le Tinikarua: “Se cava ga na levu ni cala o nanuma o sa cakava … , au vakadinadinataka ni ko se bera ni lako sivita na loloma donui vakalou. O sega ni rawa sara ni lutudromu ena rarama tawayalani e vakacaudreva na Veisorovaki i Karisito.” E sa vakakina, nio tu vata kei Karisito, o na sega ni druka!

Nio raica na nomu druka mera idewadewa ni qaqa, o sa tadolava na ka vuni mo kakua tale ni druka rawa.

Tovolea sara mada! Kevaka o druka? Nanuma tiko—o sega ni druka tu vakaidina . O sa rawaka tiko, ena veikalawa yadua.