Na Gauna O Lomaleqa Kina
Na Vunau kei na Veiyalayalati e vakarautaka na veivuke ni sega ni yaco na lomada.
Droini mai vei Luciana Abrão
O sa bau lomaleqa li? Io. Vakaidina, au a lomaleqa tu ena macawa sa oti. Vakabibi sara—wai ni mata na ka kece.
A kaya na Turaga vei Josefa Simici, “Mo na vosota sara na veivakararawataki, ni na vuqa e yaco vei iko.” Tiloqa. Au sega ni taleitaka na kena irogorogo.
Vinaka ga ni tomana na ivolanikalou: “Ia mo vosoti ira vakadede, niu sa tikoga kei iko, me yacova ni sa oti na nomu veisiga” (Vunau kei na Veiyalayalati 24:8, vakaikuritaki). DONU. Cegu vakabalavu.
Niu vakasamataka tu, au kila ni sa tiko vata kei au na Turaga ena lomaleqa kecega au sa sotava. Oqo e vica na kena ivakaraitaki:
Ni Sega Tu na Noqu Tikina
Niu sa yabaki 15, au a vakatovotovotaka e dua na drama e koronivuli. Au a vakatovolea na itutu liu, ia e muri, au sega ni rawata.
Qai vakalevutaka, na nona vakatawana o qasenivuli na itutu lalai eso, ka sa sega saraga na noqu tikina. A vakaitavitaki au o koya meu Dairekita ni Gonevuli, ia ni sa vakamosi yalo vua, sa vakuria talega o koya e dua na tikina vou—meu duri ena vatavata ni drama me rauta e 30 na sekodi vaka e dua na sisita galu.
Io. Au a tagi.
… A Vakaukauwataki Au na Turaga
Ni raici lesu, au kila ni sa vukei au na iVakabula ena gauna ni lomaleqa oya. Sa vaqaqacotaki au meu yalovinaka ka bucina vakalevu na yalomalumalumu. E muri, au a marautaka na noqu gauna ena drama ni kalasi ciwa.
“Meda kitaka na veika kecega eda rawata ena yalomarau; io meda tudei sara ka nuitaka tu ni da na raica na veivakabulai ni Kalou, io me da raica na ligana ni sa vakaraitaka mai” (Vunau kei na Veiyalayalati 123:17, vakaikuritaki).
Niu Sega ni Rawata Tu Na Qito …
Ena iotioti ni noqu yabaki ni vuli torocake, au a vinakata tu meu tiko ena timi ni tenisi matataki ni koronivuli (se torocake). Sa dodonu meu vakadruka na goneyalewa e toka saraga ecake vei au meu lewena kina na timi. Ia ni keirau mai sota, au a druka.
Dina ga niu a lomaleqa, au a qito tu ena timi ni matataki koronivuli e ra. Ena iotioti ni sotasota e ra, au sa tiko ena matai ni tutu. Ia qai cava e yaco? Au a druka ena iotioti ni qito. Au tagi—tale.
Au a lomaleqa tale e muri. Niu sa ciqoma oti na icocovi ni rawata na maka vinaka kei na qito, era sa navuca mera kauta tani na icocovi—baleta ga, ni sa baleti ira na qito matataka na koronivuli.
… E Sa Dua Ga na “Gauna Lailai”
Ena gauna oya, sa dua tu na tiki levu ni noqu bula na tenisi, ka sa vakaitamera na noqu lomaleqa Na ka au sega ni liaca ni dau tiko vata kei au na iVakabula, ka dau vukei au. Na lomaleqa levu oya a sega ni yaco tu ga, dina ga ni rairai vaka tu kina.
“Me vakacegu na yalomu; raica sa lekaleka walega na gauna ni nomu rarawa kei na vutugu; ia, kevaka ko sa vosota rawa, ena vakacerecerei iko cake na Kalou” (Vunau kei na Veiyalayalati 121:7–8, vakaikuritaki).
Niu Tovolea Tu Meu Cavilaka na Lomaleqa …
Eso na gauna, au tovolea saraga meu vorata vakadua na lomaleqa. Niu sa yabaki 13 ka sega ni lewena na matabose ni gonevuli, au a sega tale ni tovolea, dina ga ni sa dua na ka au na rairai taleitaka. Au sa soro baleta niu leqataka niu na lomaleqa tale.
… Sa Gadrevi Meu “Kakua ni Rere”
Sa gadrevi meu nanuma ni sa tiko vata kei keda na Turaga, nida lomaleqa tu mada ga. Eso na gauna ena sega ni vakakina na lomada, ia e rawa ni vukei keda o Koya ni sotava na veika tawamacala ka tovolea na veika vou.
“Drau vakararavi tiko mai vei au ena vakasama kece; kakua ni vakatitiqa, kakua ni rere” (Vunau kei na Veiyalayalati 6:36–37, vakaikuritaki).
Ni Sega ni Vakakina na Laki Kaulotu …
Ni oti na vuli torocake, au sa navuca meu laki kaulotu. Ia a tiko eso na noqu leqa tawanamaki vakatauvimate ka tarova tu na noqu biubiu niu namaka voli.
Sa dodonu meu vosota, ia au mani kacivi sara kina Tabana ni Kaulotu e Mexico ena Tokalau kei Guadalajara. Ekea, au vakatavulica kina e vuqa na tamata vakasakiti ka vukea talega eso mera papitaiso. Ia ena noqu vakabauta madaga, talairawarawa, kei na cakacaka vakaukauwa, e sega ni dua vei ira e tudei tu ena Lotu.
… Au Sa Vakararavi kina Loma ni Kalou
Vakavuqa, eda sega ni qarauna tu na veika ni bula. Au a sega ni walia rawa na noqu leqa vakatauvimate. Kau sega ni rawa ni vakasaurarataki ira na tani mera bulataka na kosipeli. Ia au rawa ni vakararavi kina gauna kei na sala ni Turaga.
“O koya mo dou vakatabui kemudou me vagolei kina vakatabakidua vua na Kalou na nomudou vakanananu, ka me yaco mai kina na veisiga mo na raici koya; … ia ena yaco ena nona gauna ga, ena sala sa kilikili vua, ka me vaka na nona lewa” (Vunau kei na Veiyalayalati 88:68, vakaikuritaki).
Niu a Lomaleqa Tu Ena Macawa Sa Oti
Au sa qase tu oqo. Ia au se lomaleqa tu ga. Vakaidina, ena macawa sa oti ga au a gole kina dua na koniferedi ni volavola. Au a yalodei tu ena so na noqu volavola, ia au a ciqoma eso na itukutuku lomaleqa mai vei ira na dauvolavola tale eso.
… A Tiko Vata kei Au o Koya
Oqo, au sa tovolea tiko meu vakararavi vakalevu cake vua na Turaga. Na lomaleqa sa tiki tu ni bula. E sega ni kena ibalebale nio cakava tiko e dua na ka cala.
Ia, lesu tale ki na ivolanikalou mai na ivakatekivu. Dina, ena rairai “vuqa” tu na veivakararawataki kei na lomaleqa eso. Ia au kila ni na tiko vata kei au na Turaga ena veika kece oqo Ka na tiko vata talega kei iko o Koya,
“Mo na vosota sara na veivakararawataki, ni na vuqa e yaco vei iko; ia mo vosoti ira vakadede, niu sa tiko ga kei iko, me yacova ni sa oti na nomu veisiga” (Vunau kei na Veiyalayalati 24:8, vakaikuritaki).