Ulabaleti na iVakatarabe ni Masu
Eda vagalalataka vakacava na veika e vakataotaka na noda masu?
Droini mai vei Andrew Bosley kei Derek L. Smith
“Masu tikoga.” E solia vaka10 na iVakabula na ivakasala oqo ena Vunau kei na Veiyalayalati. Eda kila ni sa ivakatakarakara—eda sega ni rawa ni tekiduru ka masu ena veigauna kece ni yadra—ia ena so na gauna e dredre sara mada ga meda masu vakarua ena dua na siga! Eda ulabaleta vakacava na ivakatao eso?
Na ivakatao: Guiguileca
Eda tamata ga. E yaco tu.
Dua na kena iwali:
Vakasotara vata na nomu masu kei na dua tale na ka o cakava e veisiga, ni gauna o vakasamataka kina e dua, o vakasamataka na kena kadua. Kevaka o mata mocemoce mo masu vakaibalebale tu ni ko yadra cake se bera ni o moce, semata na nomu masu ki na so tale na ka matau ni siga kei na bogi o kidava totolo tu, vaka na barasi bati se tauri wainimate. Se vaka alamutaka na nomu talevoni!
Na ivakatao: Sega na ka me ripotetaki
Na cava e rawa ni tukuni ena mataka ni ka kece o sa cakava mai na iotioti ni nomu masu na moce?
Dua na kena iwali:
Ena mataka vakavinavinakataka na Kalou ena nomu veivakalougatataki, oka kina na tamata era vakalougatataka na nomuni bula. Masulaki ira na tamata oqori. Tukuna vua na Kalou na ka o sa tuvanaka nikua ka kerea na Nona veidusimaki. Ena bogi, ripotetaka lesu. Tukuna Vua na ka kece a yaco ena siga o vakavinavinakataka tu, o sa vuli mai kina, se taleitaki vei iko.
Na ivakatao: Vakanananu veicalati
Rairai o nanuma beka ni o tawakilikili baleta e dua na ka o a cakava—se vakasamataka tiko mo cakava. Rairai o kudruvaka tu na Kalou ena dua na ka. Rairai e sega tu ga ni lomamu.
Na iwali: Masu ga
Se cava ga na lomamu, e rawa ni taura na Kalou. E sega sara e dua e “tawakilikili” me masu, ka sa vinakata tu na tevoro oqori vei iko (raica na 2 Nifai 32:8). Sa vinakata na Tamamu me rogoca na nomu masu tawadodonu, tawacava—na kena mataqali o sega ni vakatakila kina na Ka Levu o sega ni via vakaraitaka tu—ka sega sara ga ni rogoci iko.