Vakayagataki ni iDusidusi.
Ice Cream, Veitokani, ka Lomani Ira na Wekamu
Na muri ni karua ni vunau levu e sega ni dredre sara me vaka o nanuma.
Droini mai vei Valentina Vinci
Ni lako curuma tiko na itokani se lewe ni matavuvale e dua na gauna dredre sara, o dau lomaleqataka beka na ivakarau me vakaseavutaki kina na nodra leqa? E vaka me vakasama vinaka wale tu ga.
Ia raitayaloyalotaka ni rau sa veisere na itubutubu ni nomu itokani. Se vaqaseni tu na ganemu gone e koronivuli. Se lomabibi sara tu vakalevu o tukamu. O na walia vakacava na ka kece oqori?
Na kena isau lekaleka oya o sega ni rawa. Sa daumaka oya. Ena gauna vata ga, o rawa ni veivuke tu . O na kurabuitaka na levu ni ka ena rawa ni veisautaka na veivuke lailai eso.
Sotavi Dredre Levu, Yalovinaka Rawarawa
A tubu cake o Foni P. ena dua na vale ni tubutubu ledua. Donuya na yabaki ni gone kei itabagone, a raica o Foni na sotavi dredre i tinana me susuga e tolu na gone vakataki koya. Na vatukana, sa tekivu me lomacataki tamana o Foni. Qai walega qo, ni sa yabaki 19 o koya, sa tekivu veitaratara mai o tamana me veisemati tu.
“Au a cudru,” e kaya o Foni. “Noqu vakasama oya, ‘19 na yabaki sa dodonu me keirau veimaliwai tu kina ka sega. Cava na vuna oqo?’” Dina ga ni a masu ka vakasamataka vagumatua, e sega ga ni kune vakacegu o Foni. A veivuke vakalailai na veivosaki kei tinana kei nona nei, ia e se tatavutuvutu tu ga na lomana. A qai yaco e dua na ka vakasakiti (ia e rawarawa): A sureti Foni na nona itokani talei me rau laki gunu aisi kirimu ka volivoli.
“E levu na tamata ena raica oya ka nanuma ni sega ni dua na ka levu,” e kaya o Foni, “ia e vakaibalebale sara vakalevu! Au sa vakila na siga ena kuliqu. Keirau a taubale tu e tautuba, au raica na vunikau eso. Au sa vakila na cagi, ka vakila na Yalotabu ena gauna vata ga. E sa vakasakiti dina.”
A walia beka na leqa nei Foni na ilakolako ni volivoli tawanamaki oqo? Ia, e sega. E vakadinata o Foni ni se tadre tikoga na nona veimaliwai kei tamana. Ia na ivalavala yalovinaka rawarawa ni nona itokani a vakatarai Foni me vakila tale na Yalo Tabu. Sa rawa ni qai bolea vinaka o koya na nona sotavi dredre eso ena kaukauwa vakaikuritaki. “Au kila ni sa vakauqeti koya na Yalo Tabu me kauti au tani mai vale,” e wasea o Foni.
O Cei e Gadrevi Iko Nikua?
Ena idusidusi ni Me iSakisaki ni iTabagone , sa sureti meda “dodoliga yani vei ira na galili, tiko tani, se vakaleqai. Vukei ira ni vakila na loloma ni Tamada Vakalomalagi mai vei iko” (Me iSakisaki ni iTabagone: iDusidusi ni Vakayaco Digidigi [2022], 12). Na ivalavala rawarawa ni veitokani oya sa vukei Foni ni vakila na loloma ni Kalou ena dua na gauna voravora. O cei o rawa ni vukea me vakila na loloma vata oya nikua?