ការយកឈ្នះ ឧបសគ្គនៃការអធិស្ឋាន
តើយើងជម្រះឧបសគ្គរបស់យើងក្នុងការអធិស្ឋានដោយរបៀបណា ?
រូបភាពដោយ អេនឌ្រូ ប៊ូស្លី និង ឌែរិក អិល ស្ម៊ីធ
« ចូរអធិស្ឋានជានិច្ច » ព្រះអង្គសង្គ្រោះផ្តល់ការណែនាំនេះ ១០ ដងនៅក្នុងគោលលទ្ធិ និងសេចក្ដីសញ្ញា ។ យើងយល់ថាវាជាន័យធៀប—យើងមិនអាចលុតជង្គង់អធិស្ឋានគ្រប់ពេលយើងភ្ញាក់នោះឡើយ—ប៉ុន្តែពេលខ្លះ វាពិបាកសូម្បីតែអធិស្ឋានពីរដងក្នុងមួយថ្ងៃ ! តើយើងអាចឈ្នះឧបសគ្គនេះដោយរបៀបណា ?
ឧបសគ្គ ៖ ភ្លេច
យើងជាមនុស្ស ។ វាកើតឡើង ។
ដំណោះស្រាយដែលអាចមាន ៖
ផ្សារភ្ជាប់ការអធិស្ឋានរបស់ប្អូនជាមួយសកម្មភាពផ្សេងៗដែលប្អូនធ្វើជារៀងរាល់ថ្ងៃ ដូច្នេះនៅពេលប្អូនគិតពីរឿងមួយ ប្អូនក៏គិតពីការអធិស្ឋានផងដែរ ។ ប្រសិនបើប្អូនរកឃើញថា ប្អូនងងុយគេងពេកដើម្បីធ្វើការអធិស្ឋានដ៏មានន័យមួយពេលប្អូនភ្ញាក់ពីគេង ឬមុនពេលចូលគេង សូមភ្ជាប់ការអធិស្ឋានរបស់ប្អូនទៅនឹងទម្លាប់អ្វីមួយនៅពេលថ្ងៃ និងយប់ ជាពេលដែលប្អូនស្វាងមិនងងុយ ដូចជាការដុសធ្មេញ ឬការញ៉ាំថ្នាំជាដើម ។ ឬកំណត់សំឡេងរោទិ៍នៅលើទូរសព្ទរបស់ប្អូន !
ឧបសគ្គ ៖ គ្មានអ្វីត្រូវរាយការណ៍
តើមានអ្វីដែលត្រូវនិយាយនៅពេលព្រឹកទៅ នៅពេលប្អូនបាននិយាយអស់ហើយ តាំងពីការអធិស្ឋានចុងក្រោយរបស់ប្អូនមុនចូលគេងនោះ ?
ដំណោះស្រាយដែលអាចមាន ៖
នៅពេលព្រឹក សូមអរគុណព្រះចំពោះពរជ័យរបស់ប្អូន រួមទាំងបុគ្គលដែលផ្តល់ពរជ័យដល់ជីវិតរបស់ប្អូន ។ សូមអធិស្ឋានសម្រាប់មនុស្សទាំងនោះ ។ សូមប្រាប់ដល់ព្រះពីអ្វីដែលប្អូនបានគ្រោងទុកសម្រាប់ថ្ងៃនេះ និងសុំការណែនាំរបស់ទ្រង់ ។ នៅពេលយប់ សូមរាយការណ៍រឿងទាំងនោះវិញ ។ សូមទូលប្រាប់ទ្រង់ពីអ្វីៗគ្រប់យ៉ាងដែលបានកើតឡើងក្នុងអំឡុងពេលថ្ងៃ ដែលប្អូនមានអំណរគុណ ដែលប្អូនបានរៀន ឬអ្វីដែលប្អូនមានចំណាប់អារម្មណ៍ ។
ឧបសគ្គ ៖ អារម្មណ៍អវិជ្ជមាន
ប្រហែលជាប្អូនមានអារម្មណ៍ថាមិនសក្តិសម ដោយសារតែអ្វីមួយដែលប្អូនបានធ្វើ—ឬកំពុងគិតចង់ធ្វើអ្វីមួយ ។ ប្រហែលជាប្អូនខឹងព្រះដោយសារអ្វីមួយ ។ ប្រហែលជាប្អូនគ្មានអារម្មណ៍ចង់អធិស្ឋាន ។
ដំណោះស្រាយ ៖ យ៉ាងណាក៏ដោយត្រូវអធិស្ឋាន
មិនថាប្អូនមានអារម្មណ៍យ៉ាងណានោះទេ ព្រះអាចទទួលបានទាំងអស់ ។ គ្មាននរណាម្នាក់ដែល « មិនសក្តិសម » ដើម្បីអធិស្ឋានទេ ហើយវាជាអារក្សដែលចង់ឲ្យប្អូនគិតថាប្អូនមិនសក្តិសម ( សូមមើល នីហ្វៃទី២ ៣២:៨ ) ។ ព្រះវរបិតារបស់ប្អូនសព្វព្រះទ័យនឹងព្រះសណ្តាប់ការអធិស្ឋានមិនគ្រប់លក្ខណ៍ និងមិនពេញលេញរបស់ប្អូន—ទោះជាការអធិស្ឋានដែលប្អូនមិនមានអារម្មណ៍ចង់ទូលប្រាប់ពីចំណុចសំខាន់ៗនៅឡើយ—វាល្អជាងមិនបានឮពីប្អូនទាល់តែសោះ ។