ការ៉េមមិត្តភាព និង ការស្រឡាញ់អ្នកជិតខាងរបស់អ្នក

ការរក្សានូវបញ្ញត្ដិទីពីរ វាអាចនឹងមិនពិបាកដូចជាប្អូនគិតនោះទេ ។

ដោយ ដេវីឌ ឌីកសុន

ទស្សនាវដ្ដីសាសនាចក្រ

នៅពេលដែលមិត្តភក្តិ ឬសមាជិកគ្រួសារកំពុងឆ្លងកាត់គ្រាដ៏លំបាកមួយ តើប្អូនធ្លាប់ពិបាកចិត្តនឹងការរកវិធីដោះស្រាយបញ្ហារបស់ពួកគេដែរឬទេ ? នោះហាក់ដូចជាគំនិតមួយដ៏ល្អ ។

ប៉ុន្តែសូមស្រមៃថា ឪពុកម្តាយមិត្តភក្តិរបស់ប្អូនកំពុងលែងលះគ្នា ឬប្អូនស្រីរបស់ប្អូនត្រូវបានគេធ្វើបាបនៅសាលា ឬជីតារបស់ប្អូនកំពុងប្រយុទ្ធប្រឆាំងនឹងជំងឺធ្លាក់ទឹកចិត្តធ្ងន់ធ្ងរ ។ តើប្អូននឹងដោះស្រាយបញ្ហាទាំងអស់ នោះ ដោយរបៀបណា ?

ចម្លើយដ៏ខ្លីគឺថាប្អូនមិនអាចដោះស្រាយបានទេ ។ អ៊ីចឹងវាមិនជាថ្វីនោះទេ ។ ក្នុងពេលជាមួយគ្នានោះដែរ ប្អូនតែងតែ អាចជួយបានជានិច្ច ។ ហើយប្អូននឹងភ្ញាក់ផ្អើលពីរៀបដែលជំនួយតិចតួចអាចបង្វែរបញ្ហាបាន ។

បញ្ហាធំ សេចក្តីសប្បុរសសាមញ្ញៗ

ហ្វូនី ភី ធំឡើងនៅក្នុងផ្ទះដែលមានម្តាយទោល ។ ក្នុងអំឡុងពេលកុមារភាព និងវ័យជំទង់របស់នាង ហ្វូនីបានឃើញម្តាយរបស់នាងតស៊ូដើម្បីចិញ្ចឹមកូនបីនាក់តែម្នាក់ឯង ។ ជាលទ្ធផល ហ្វូនីបានបង្កើតអារម្មណ៍អវិជ្ជមានចំពោះឪពុករបស់នាង ។ បន្ទាប់មកថ្មីៗនេះ ក្រោយពីនាងមានអាយុ ១៩ឆ្នាំ ឪពុករបស់នាងបានចាប់ផ្តើមទាក់ទងមក ដើម្បីព្យាយាមភ្ជាប់ទំនាក់ទំនងវិញ ។

ហ្វូនីបាននិយាយថា « ខ្ញុំមិនសប្បាយចិត្តទេ »។ « បន្ទាប់មកខ្ញុំបានគិតថា ‹ គាត់មានរយៈពេល ១៩ឆ្នាំ ដើម្បីចូលមកក្នុងជីវិតរបស់ខ្ញុំ ប៉ុន្តែគាត់មិនបានមកទេ ។ ហេតុអ្វីទើបតែមកពេលនេះ ? ›» ទោះបីជានាងបានអធិស្ឋាន និងគិតពិចារណាក៏ដោយ ហ្វូនីនៅតែមិនអាចស្វែងរកភាពសុខសាន្តបានឡើយ ។ ការនិយាយជាមួយម្តាយ និងម្តាយមីងរបស់នាងបានជួយបន្តិចបន្តួច ប៉ុន្តែវានៅតែធ្វើឲ្យនាងមានអារម្មណ៍មិនសប្បាយចិត្តដដែល ។ បន្ទាប់មកមានអ្វីមួយបានកើតឡើងដែលមិនគួរឲ្យជឿ ( ប៉ុន្តែសាមញ្ញ ) ៖ មិត្តដ៏ល្អបំផុតរបស់ហ្វូនី បានអញ្ជើញនាងទៅញ៉ាំការ៉េម និងដើរទិញអីវ៉ាន់ ។

« មនុស្សជាច្រើននឹងគិតថា ការញ៉ាំការ៉េម និងដើរទិញអីវ៉ាន់វាមិនមែនជារឿងធំដុំនោះទេ » ប៉ុន្តែហ្វូនីនិយាយថា « វាមានន័យខ្លាំងណាស់ចំពោះនាង ! ខ្ញុំទទួលអារម្មណ៍នៃកម្តៅព្រះអាទិត្យលើស្បែករបស់ខ្ញុំ ។ យើងដើរនៅខាងក្រៅ ហើយខ្ញុំបានឃើញដើមឈើ ។ ខ្ញុំមានអារម្មណ៍ពីខ្យល់បក់ ហើយខ្ញុំក៏មានអារម្មណ៍ព្រះវិញ្ញាណក្នុងពេលជាមួយគ្នាដែរ ។ វាអស្ចារ្យណាស់ » ។

តើដំណើរទិញអីវ៉ាន់ដែលមិនបានគ្រោងទុកនេះបានដោះស្រាយបញ្ហារបស់ហ្វូនីដែរឬទេ ? ច្បាស់ណាស់គឺអត់ទេ ។ ហ្វូនីទទួលស្គាល់ថា ទំនាក់ទំនងរបស់នាងជាមួយឪពុកនាងនៅតែជាបញ្ហាប្រឈម ។ ប៉ុន្តែទង្វើនៃសេចក្តីសប្បុរសដ៏សាមញ្ញពីមិត្តរបស់នាងបានធ្វើឲ្យហ្វូនី មានអារម្មណ៍ពីព្រះវិញ្ញាណបរិសុទ្ធម្តងទៀត ។ បន្ទាប់មក នាងអាចប្រឈមមុខនឹងបញ្ហារបស់នាងជាមួយនឹងកម្លាំងបន្ថែមទៀត ។ ហ្វូនីចែកចាយថា « ខ្ញុំដឹងថានាងត្រូវបានបំផុសដោយព្រះវិញ្ញាណបរិសុទ្ធដើម្បីនាំខ្ញុំចេញពីផ្ទះ » ។

តើនរណាត្រូវការប្អូនៗនៅថ្ងៃនេះ ?

នៅក្នុងសេចក្តីណែនាំ ដើម្បីកម្លាំងនៃយុវជន យើងត្រូវបានអញ្ជើញឲ្យ «ជួយដល់អ្នកដែលមានអារម្មណ៍ឯកោ នៅដាច់ដោយឡែកពីគេ ឬអស់សង្ឃឹម ។ សូមជួយពួកគេឲ្យមានអារម្មណ៍នៃសេចក្តីស្រឡាញ់របស់ព្រះវរបិតាសួគ៌តាមរយៈប្អូន » ( ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ទំព័រ ១២ ) ។ ទង្វើសាមញ្ញនៃមិត្តភាពនោះបានជួយហ្វូនីទទួលបានអារម្មណ៍នៃសេចក្តីស្រឡាញ់របស់ព្រះក្នុងអំឡុងស្ថានភាពដ៏លំបាកមួយ ។ តើប្អូនអាចជួយនរណាឲ្យមានអារម្មណ៍ក្តីស្រឡាញ់ដូចគ្នានៅថ្ងៃនេះ ?