M̧wen̄an eo an Ālkin Rālep in Jādede
Juon Wōt ilo Ankilaad Ippān Ankilaan
Jidik in kōnono in
Ro m̧ōtta rejitōnbōro, n̄e jej kāālet n̄an kōtļo̧k bwe Anij en waanjon̄ak eo ekajoortata ilo mour kein ad jān kōņaan ko ad make, jemaron̄ eddōkļo̧k ilo mour in rikaļoor eo ad im kōļapļo̧k maron̄ eo ad n̄an kōm̧m̧an bwe ad lōmņak im būruwōd ren juon wōt ippān Rilo̧m̧o̧o̧r eo. Ilo bar juon wāween, n̄e jejjab kōtļo̧k wāween eo an Anij n̄an anjo̧ ilo mour ko ad, jej make iaad, im ilo ejjeļo̧k im̧we im tōl an Irooj, jemaron̄ ba ejim̧we eiten aolep men ko jej kōm̧m̧ani im jab kōm̧m̧ani. Jemaron̄ barāinwōt jōkpel ņae kōj make ilo ad kōm̧m̧ani men ko ilo wāwein ko ad make, n̄an waanjon̄ak, “Ij kōm̧m̧ani men ko ilo kōņaan eo aō make.” …
Men̄e jekjek ko an juon armej make āinwōt bwij ko, jikin ko, im apan̄ ko ilo ānbwin im ļōmņak rej jelōt kōj ilo iaļ in, ilo men ko im reliukkuun aorōk, ewōr juon jikin ilowa ijo jej anemkwoj n̄an kāālet eļan̄n̄e jenaaj ak jab kāālet n̄an ļoor jon̄ok eo Irooj em̧ōj an kar kepooje n̄an mour in ad. …
Āinwōt rikaļoor ro an Kraist, jej ikdeelel n̄an etetal ilo iaļ eo E ekar kōkaļļāik n̄an kōj ilo kar tōre in jerbal eo an ilo mour in. Jejjab wōt ikdeelel n̄an kōm̧m̧an Ankilaan im aolep men ko renaaj kam̧ōņōņōik E ak jej kappukot n̄an āinwōt E. …
Ij kam̧ool n̄an kom̧ bwe loor ankilaan Irooj ilo mour ko ad enaaj kōmaron̄ kōj n̄an lo bōōr eo eļap wōnāān ilo laļin—eo ej aelōn̄ in lan̄. Ij jar bwe kajjojo iaad, ilo iien ko ad, jenaaj maron̄ kwaļo̧k, kōn bujen peran, n̄an Jemedwōj Ilan̄ im Rilo̧mo̧o̧r Jisōs Kraist bwe “ta eo em̧m̧an n̄an E, em̧m̧an n̄an n̄a.”