M̧wen̄an eo an Jibbon̄ in Jādede
Kōjatdikdik enaaj Anjo̧
Jidik in kōnono in
Men in letok eo kōn kōjatdikdik ej juon menin letok ekwojarjar im lukkun aurōk jān Anij. …
Ilo ad kōkajoorļo̧k ad tōmak ilo Jisōs Kraist, jej lo ilōn̄ in ļo̧k kakkōt ko ad n̄an kōjeraam̧m̧an ko im kallim̧ur ko an indeeo. Āinwōt juon meram eo eaiboojoj an ebbōļ, kōjatdikdik ej kōmeramļo̧k laļ emarokļo̧k, im jej loe ilju im jekļaj eo ad eaiboojoj. …
Ro jeiū im jatū, kōjatdikdik ej juon mennin letok emour, juon mennin letok eo ej eddōkļo̧k ilo ad kaļapļo̧k tōmak eo ad ilo Jisōs Kraist. … Jej kōļapļo̧k lōke in—kam̧ool kōn men ko rej pinej ad tōmak—ilo jar, bujen ko an tampeļ, kōjparok kien ko, wōnm̧aanļo̧k im riiti jeje ko rekwojarjar im naan ko an rikanaan ro raan kein, bōk kwojkwoj eo, im jerbal n̄an ro jet, im kabun̄jar aolep wiik ippān Rikwojarjar ro jet m̧ōttad.
N̄an kōkajoorļo̧k kōjatdikdik eo ad ilo juon iien eo im jerawiwi ej ļapļo̧k, Irooj ekar tōl rikanaan eo An n̄an kalōk tampeļ ko An ilo aolepen laļ. …
Ejjeļo̧k metak, ejjeļo̧k nan̄inmej, ejjeļo̧k kaljekļo̧k, ejjeļo̧k en̄taan, ejjeļo̧k juon men emaron̄ in kadikļo̧k jon̄an kōjatdikdik eo ad ilo ad tōmak im kikki im dāpiji bujen ko ad ippān Anij ilo m̧weo im̧ōn Irooj. Ej juon im̧ōn meram, juon im̧ōn kōjatdikdik. …
Ro jeiū im jatū, aenōm̧m̧an eo kom̧ij pukot emaron̄ jab m̧ōkaj an itok āinwōt am̧ kōņaan, ak ij kallim̧uri kom̧ bwe ilo ami lōke Irooj, An aenōm̧m̧an enaaj itok.
Jen ke naajdik tōmak ko ad em̧m̧an, bun̄m̧aanļo̧k kōn juon kōjatdikdik eo emeram. Ij kam̧ool bwe ad kōjatdikdik ej pād ilo ad Rilo̧mo̧o̧r, Jisōs Kraist. Kōn E, aolep ettōņak ko ad aolep rewāppen naaj maron̄ kili. E ej Anij in kōjatdikdik—unjen kōjatdikdik Ej mour im Ej iakwe kom̧.