“Ko Hono Vahevahe ʻo e Ongoongo Fakafiefiá,” Ko e Kaumeʻá, Māʻasi 2026, 36–37.
Ko hono Vahevahe ʻa e Ongoongo Fakafiefiá
Ko ha talanoa moʻoni mei Keniā.
ʻI ha Sāpate Toetuʻu fakaʻofoʻofa ʻe taha, naʻe ʻā pongipongia hake ʻa Laieni ʻo lele ki peito. Naʻe lava ke ne nāmuʻi ʻa e niú mo e sipaisí mei he tōnati naʻe toki ngaohi ʻe Mamí. Naʻe uʻu ʻe Laieni ha taha ʻo e fanga foʻi tōnati mafana mo moluú. “Mami! Ko e Toetuʻú ʻeni! ʻE lava nai ke tau sio ʻi he faiva ʻo Sīsuú ʻi he ʻahó ni?” ko ʻene fehuʻí ange ia mo ha fofonga malimali.
Naʻe sio ange ʻa Mami mo malimali. “ʻIo ʻe lava!”
Naʻe lele ʻa e kiʻi tokoua siʻisiʻi ʻo Laieni ko Liamí ki tuʻa ʻi he tangutu hifo ʻa Mami mo Laieni ke sio ʻi he faivá.
Naʻá na mamata ki hono fakahoko ʻe Sīsū Kalaisi ha ngaahi mana mo tokoni ki he kakaí. Pea ʻi he taimi naʻe fakamamahiʻi ai ʻe he kakaí ʻa Sīsuú, naʻe loʻimataʻia ʻa Laieni.
Naʻá ne fehuʻi loto-mamahi, “Mami, ko e hā naʻa nau fai pehē ai kia Sīsuú?”
Naʻe pehē ange ʻe Mami, “Naʻá Ne fili ke mamahi maʻatautolu. ʻOkú Ne ʻofa lahi ʻiate kitautolu, Laieni. Naʻá Ne pekia kae lava ke tau toe moʻui.”
ʻI he taimi naʻe ʻasi mai ai ʻi he foʻi faivá ʻa e Toetuʻu ʻa Sīsū Kalaisí, naʻe malimali ʻa Laieni. “Sio, Mami! ʻOkú Ne toe moʻui!”
Naʻe pehē ange ‘e Mami, “ʻOku tonu ia. Kuó Ne toetuʻu! ʻO hangē pe koe lea ʻa e ʻāngeló ʻi he Tohi Tapú.”
Kimui ange aí, naʻe hū ʻa Laieni ki tuʻa ʻo vaʻinga. Naʻá ne sio kia Liami ʻoku vaʻinga ʻaki ha ʻū vaʻakau ʻi he lalo mangó.
Naʻe pehe ange ʻe Laieni, “Liami!, ʻOku ou fie fai atu ha talanoa mālie.”
Naʻe tatali ʻa Liami kae tangutu hifo ʻa Laieni ʻi he lalo mangó. “ʻOku fekauʻaki mo e ʻū kaá?”
“ʻIkai. Toe mālie ange ia ai!” Ko Laieni ange ia. “ʻOku fekauʻaki ia mo Sīsū. Naʻá Ne pekia, ka naʻá Ne toe moʻui.”
“Ko e moʻoni?” Ko e fehuʻi ange ia ʻa Liamí.
“ʻIo! Naʻe pehē ʻe ha ʻāngelo, ‘ʻOku ʻikai ʻi heni Ia, he kuo toetuʻu!’ ʻOku ʻuhinga ia te tau lava foki ʻo toe moʻui.”
“Mani!” Ko Liami ange ia. “ʻOku mālohi lahi ʻa Sīsū.”
Naʻe kamokamo ʻa Laieni. Naʻá ne fakakaukau ki he lahi ʻa e ʻofa ʻa Sīsū Kalaisi ʻiate iá. Naʻe hoko ia ke ongoʻi ʻofa moʻoni mo fiefia ai hono lotó. Naʻá ne vahevahe ʻa e ongoongo fakafiefiá mo hono fāmilí, pea naʻe toe makehe ange ai hono ʻaho Toetuʻú.
ʻŪ tā fakatātā ʻa Margarida Esteves. ʻE lava ke hiki hano tatau ke fakaʻaongaʻi pē ʻe he Siasí.