He Naʻe ʻOfa Pehē ʻa e ʻOtuá ki Māmani

ʻOku ʻofa lahi ʻa e Tamai Hēvaní ʻiate kitautolu kotoa naʻá Ne fekauʻi mai ai Hono ʻAlo ko Sīsū Kalaisí, ke tokoniʻi kitautolu ke tau toe foki hake kiate Ia.

Naʻe ʻafioʻi ʻe Sīsū ʻe ʻi ai e ngaahi taimi ʻi heʻetau moʻuí te tau ongoʻi loto-mamahi, faingataʻaʻia, mo liʻekina ai. Te tau fai ha ngaahi fehalaaki pea aʻu ʻo tau ilifia he taimi ʻe niʻihi. ʻI he Ngoue ko Ketisemaní, naʻe fili ai ʻe Sīsū Kalaisi ke Ne ongoʻi ʻa e ngaahi meʻa kotoa ko iá koeʻuhí ke lava ʻo mahino kiate Ia peá Ne tokoniʻi haohaoa kitautolu. Naʻá Ne totongi foki ʻetau ngaahi angahalá kae lava ke tau fakatomala. (Vakai, ʻAlamā 7:11–13.)

Naʻe ʻafioʻi foki ʻe Sīsū ʻi he hokosia ʻa e taimí, te tau mate kotoa. Ko e maté ko ha konga fakanatula mo angamaheni ia ʻo e moʻuí. Ka naʻe ʻikai finangalo ʻa e ʻOtuá ke hoko ʻa e maté ko e ngataʻanga ʻo ʻetau talanoá. Koeʻuhí naʻe foaki ʻe Sīsū Kalaisi ʻEne moʻuí peá Ne toetuʻu, te tau toe moʻui kotoa pē foki. Ko e ʻuhinga ia naʻá Ne fili ai ke pekia maʻatautolú.

ʻOku tau ui ʻa e meʻa naʻe fai ʻe he Fakamoʻuí ko e Fakalelei ʻa Sīsū Kalaisí. Naʻe foaki ʻa e meʻaʻofa toputapú ni maʻatautolu ʻi he ʻofa. Manatuʻi, ne ʻofa pehē ʻa e ʻOtuá ki māmani, naʻá Ne foaki ai Hono ʻAlo, ko Sīsū Kalaisí (vakai, Sione 3:16 Pea naʻe ʻofa pehē ʻa Sīsū ʻiate kitautolu naʻá Ne foaki ai ʻEne moʻuí kae lava ke tau toe foki ʻo nofo fakataha mo e ʻOtuá.