Tuliki Ngāue Fakameaʻa ʻo e Toetuʻú

ʻI he ngaahi feituʻu lahi ʻo e māmaní, ko e tiulipé ko ha niʻihi ia ʻo e ngaahi ʻuluaki matalaʻiʻakau ke matala ʻi he faʻahitaʻu failaú. Koeʻuhí ko e meʻá ni, ko ha fakataipe ia ʻo e fānauʻi foʻoú pea ʻe lava ke ne fakamanatu mai kiate kitautolu ʻa e feilaulau ʻa Sīsū Kalaisí. ʻI he taimi ʻoku tau faiangahala aí, te tau lava ʻo fakatomala pea fanauʻi foʻou fakalaumālie!

1. Pelu ua ha laʻipepa tapafā tatau ke faʻu ha foʻi tapatolu.

2. ʻI he hanga ʻa e tafaʻaki lōloá ki laló, peluki ʻa e tuliki toʻomataʻú ki ʻolunga, ʻo fakapapauʻi ʻoku ʻikai femahiliaki mo e tuliki taupotu ki ʻolungá.

3. Peluki ʻa e tafaʻaki toʻohemá ʻi he founga tatau ko e sitepu uá ia.

4. Fulihi hake leva hoʻo laʻipepá. ʻOku totonu ke tuʻu hake ʻa e konga ko ia ʻoku ʻasi hake hono ongo poiní ki ʻolungá.

5. Peluki hifo ʻa e kiʻi tuliki ʻo e tapatolú ʻi he tafaʻaki takitaha.

6. Toe fulihi hake hoʻo laʻipepá ke sio ki hoʻo tiulipé! Fakapipiki leva ia ki ha laʻipepa.

Ke ngaohi ʻa e kaú, kosi ha pepa lanu mata, kumi ha ʻū lauʻiʻakau ʻi tuʻa ke fakapipiki ki ai, pe tā haʻo laʻuiʻakau pē ʻaʻau!

Naʻá ke ʻiloʻi nai ʻe lava ke fakamanatu mai ʻe he fuaʻimoá ha moʻui foʻou? Ngaohi ʻa e sālati fuaʻimoa ko ʻení ke tokoni atu ke ke manatuʻi ʻa e Toetuʻu ʻa Sīsū Kalaisí!

1. ʻI he tokoni ʻa ha tokotaha lahi, haka ha fuaʻimoa ʻe 6–8 ʻi ha miniti ʻe 10.

2. Tuku ke mokomoko ʻa e fuaʻimoá, pea fohi ʻo tongitongi ia ki ha fanga kiʻi kongokonga iiki.

3. ʻI ha poulu, tuifio ʻa e fuaʻimoa kuo tongi īkí mo ha masitati mililita ʻe 15 pea mo e ipu ¼ meioneisi. Afuhi ʻaki ʻa e māsima, pepa, mo e paprika pea toe tuifio.

4. Vali ia ʻaki ʻa e mā molū pe mā pakupaku pea kai leva!