Ko e Uike Toputapu ʻo Miá

Naʻe lau ʻe Mami mo Teti ʻa e talanoa ʻo e Sāpate Pāmé ʻi he folofolá. ʻI he taimi naʻe hāʻele ai ʻa Sīsū Kalaisi ki Selusalemá, naʻe taʻataʻalo ʻaki ʻe he kakaí e ʻū vaʻa pāmé mo kaila, “Hōsana!”

Naʻe pukepuke ʻe hoku tehina ko Lusí ha fakatātā ʻo Sīsū ʻokú ne heka ʻi ha ʻasi. Naʻa mau taʻataʻalo ʻaki leva ʻemau fanga kiʻi lauʻiʻakau pepá. Naʻá ku ongoʻi fiefia ʻi heʻeku fakakaukauloto atu naʻá ku talitali ʻa Sīsuú.

Naʻe houhau ʻa Sīsū ʻi hono fakatau atu ʻe he kakaí ha ngaahi meʻa ʻi he temipalé, ko ia naʻá Ne tuli kinautolu ki tuʻa. Naʻa mau hiko ʻa e vevé mei he ʻuluʻakau takatakai ʻi he falelotú. ʻOku ou fiefia naʻa mau lava ʻo tokoni ke tokangaʻi e fale ʻo e ʻOtuá!

Naʻe lau ʻe Mami ha ngaahi talanoa naʻe fai ʻe Sīsū Kalaisi ki he kakaí. Naʻa mau fanongo mo fakaʻaongaʻi ʻa e ʻumeá ke ngaohi ʻaki ha ngaahi meʻa mei he ʻū talanoá. Naʻe faʻu ʻe Lusi ha sipi koeʻuhí ko Sīsū ʻa e Tauhisipi Leleí. Naʻá ku ngaohi ha kiʻi maama lolo. Naʻe tokoni ia ke u manatuʻi ke tauhi hoku lotó ke fonu ʻi he tuí.

Naʻe talanoa mai ʻe Teti fekauʻaki mo e founga naʻe ʻoange ai ʻe Mele kia Sīsū Kalaisi ha lolo makehe maʻa Hono toʻukupu kelekelé. Naʻe ʻalaʻalaha hono nanamú ʻi he falé kotoa.

Naʻe ʻikai ke mau maʻu e lolo makehe ko ʻení. Ka naʻa mau fakaʻaongaʻi e sinamoní ke ngaohi ʻaki ha fakaneifua. Naʻe pehē ʻe Mami ko e taimi te mau nāmuʻi ai e sinamoní ʻi hono taʻo ʻo e fakaneifuá, ʻoku totonu ke mau fakakaukau ki he meʻa te mau lava ʻo foaki kia Sīsuú.

Naʻa mau tutu ʻa e fanga foʻi teʻelangó mo hivaʻi ha foʻi hiva ʻo hangē pe ko e hiva ʻa Sīsū Kalaisi mo ʻEne kau ākongá ʻi he ʻOhomohe Fakaʻosí. Naʻa mau kai ʻa e mā pita (pita bread) mo inu ʻa e huhuʻa kālepí ke manatua ʻa e fuofua sākalamēnití. Naʻa mau toe kai foki mo ha pomikānite (pomegranates) ke fakamanatu mai kiate kimautolu ʻa e taʻataʻa ʻo Sīsuú, mo e ʻōlive ke fakamanatu e ngoue ko Ketisemaní.

ʻI heʻemau kaí, naʻe ʻuʻulu leʻolahi ha mana ʻi tuʻa. Naʻá ku ongoʻi malu mo houngaʻia ʻi heʻeku ʻiloʻi kuo ʻosi fehangahangai ʻa Sīsū mo e pole faingataʻa tahá.

Naʻa mau lau ʻo fekauʻaki mo e founga naʻe pekia ai ʻa Sīsū Kalaisi maʻatautolú. Naʻa mau ʻave leva ʻa e ngeʻesi kapa ʻakaú ki he ngoué ʻo fulihi fakatafaʻaki ia, ʻo hangē ha fonualotó. Naʻa mau fokotuʻu takai ai ʻa e kelekele mo ha ngaahi foʻi maka kae tuku taʻeʻufiʻufiʻi pē ʻa e ngutu ʻo e poulú. Naʻe ʻomi ʻe Mami ha fakatātā ke ne fakafofongaʻi e sino ʻo Sīsuú. Naʻa mau kofukofuʻi ia ʻi he loto-ʻapasia ʻaki ha tupenu hinehina pea faʻo ia ki he loto ngeʻesi kapa ʻakaú.

Neongo ko ha ngeʻesi kapa ʻakau pē ia, ka naʻá ku kei ongoʻi loto-mamahi pē ʻi hono ʻufiʻufi ʻaki e matapaá ha foʻi maká.

Naʻe pehē ʻe Mami ʻi he hili e pekia ʻa Sīsū Kalaisí, naʻá Ne fokotuʻu e ngāue fakafaifekaú ʻi he maama tataliʻanga ʻo e ngaahi laumālié. ʻI he founga ko iá, ʻe kei lava pē ʻe he kakai naʻe teʻeki ke nau ʻilo ʻEne ongoongoleleí ʻi māmaní ʻo ako fekauʻaki mo Ia. ʻI he temipalé, ʻe lava ke tau papitaiso maʻá e kakai naʻe ʻikai papitaiso kimuʻa pea nau maté.

ʻOku teʻeki ai ke u taʻu motuʻa feʻunga mo Lusi ke hū ʻi he temipalé, ka naʻá ma tokoni ki hono kosi ʻo toʻo e ʻū kaati hingoa kuo pākí. Naʻe taufetongi ʻa Mami mo Teti ʻi hono fai ʻo e ngāue fakatemipalé maʻá e kakai ʻi he ʻū kātí mo lue takai holo ʻi tuʻa mo kimaua. Naʻa mo e ʻi tuʻa he temipalé, naʻe ongo ia ʻo hangē ko hēvaní.

ʻI he pongipongi Toetuʻú, naʻe ʻosi ʻunuki ʻa e maka ʻi muʻa ʻi he ngeʻesi kapa ʻakaú pea naʻe ʻikai ha meʻa ʻi he tupenú. Naʻe ʻi ai ha kaati naʻe pehē ai, Kuó Ne toe tuʻu!

Naʻá ku ʻosi ʻiloʻi ko Sīsū Kalaisi ʻa e ʻuhinga ʻo e Toetuʻú. Hili hono fakamanatua ʻo e Uike Toputapú, ʻoku ou ongoʻi hangē ʻoku ou kiʻi ʻiloʻi lelei ange Iá.