Palōfita ko Mōsesé

Ko Mōsesé ko ha tangata ʻIsileli ia, ka naʻe ohi hake ia ʻe he ʻofefine ʻo Feló ʻi ʻIsipite. Naʻe loto-mamahi ʻa Mōsese ʻi he angakovi ʻa e kau ʻIsipité ki he kakai ʻIsilelí ʻo ʻai ke ngāue pōpula ange kiate kinautolú.

‘I ha ʻaho ʻe taha na‘e sio ʻa Mōsese ki ha tangata ‘Isipite ʻokú ne tā ha tangata ‘Isileli. Naʻe maluʻi ʻe Mōsese ʻa e tangata ʻIsilelí.

ʻI he ‘ilo ki ai ʻa Feló, naʻá ne loto ke tāmate‘i ʻa Mōsese, ka na‘e hola ʻa Mōsese mei ‘Isipite.

Na‘e ʻalu ‘a Mōsese ki ha feituʻu ko Mitiane, ʻo ne fetaulaki ai mo ha fefine ko Sīpola. Naʻá na mali pea maʻu mo ha fānau.

Lolotonga ʻa e nofo ʻa Mōsese ʻi Mitiané, naʻá ne sio ki ha vao ʻakau na‘e vela, ka naʻe ‘ikai ke tutu ʻe he afí ‘a e vao ʻakaú. Na‘e hā mai ‘a e ʻEikí ʻi he afí ʻo folofola kia Mōsese.

Na‘e folofola ange ʻa e ‘Eikí naʻá Ne ‘afioʻi ʻoku faingataʻa‘ia ʻa e kau ‘Isilelí ʻi ‘Isipite. Na‘á Ne fekauʻi ‘a Mōsese ke foki ki ʻIsipite ʻo tala kia Felo ke fakatauʻatāinaʻi ‘a e kakai ʻIsilelí. Na‘e folofola ʻa e ‘Eikí te Ne tokoniʻi ‘a Mōsese ke fakatauʻatāina‘i ʻa e kakai ‘Isilelí pea tataki kinautolu ki ha fonua ʻo e tala‘ofá.