Tulama ʻo e Toetuʻú

ʻOku tuʻu laine ʻa e kau ākongá ke faʻu ha hala ki he tokotaha te ne puke ʻa e fakatātaá pea taʻataʻalo ʻaki ʻenau ʻū lauʻi pāmé.

Tokotaha Fakamatalá: ʻI he Sāpate kimuʻa pea pekia ʻa Sīsū Kalaisí, naʻá Ne hāʻele atu ki Selusalema ʻi ha ʻasi. “Pea kuo haʻu ia … , pea kamata fiefia mo fakamālō ʻa e kau ākonga kotoa pē ki he ʻOtuá ʻaki ʻa e leʻo lahi koeʻuhi ko e ngaahi ngāue lahi kotoa pē kuo nau mamata ki aí.”

ʻOku lue mai ʻa e tokotaha puke fakatātaá ʻi he foʻi halá mo puke pē ʻa e fakatātā 1 (Sīsū Kalaisi ʻi he ʻasí). ʻOku toutou kaila ʻa e kau ākongá “Hōsana!” ʻi heʻenau taʻataʻalo ʻaki ʻenau lauʻi pāmé.

Ākonga 1: “ʻOku monūʻia ʻa e Tuʻi ʻoku hāʻele mai ʻi he huafa ʻo [e ʻEikí]: ke fiemālie ʻi he langí, pea fakamālō fungani lahi ʻi ʻolunga.”

Tokotaha Fakamatalá: “Pea ʻi Heʻene hoko ki Selusalemá, naʻe ngatū ʻa e kolo kotoa, ʻo pehē, Ko hai ʻeni?”

Ākonga 2: “Ko Sīsū ʻeni ko e palōfita ʻo Nāsaleti ʻi Kālelí.”

ʻOku hivaʻi ʻe he tokotaha kotoa pē ʻa e veesi tolu ʻo e “Fakamoʻui ʻOfa” (Liahona, ʻOkatopa 1998).

Tokotaha Fakamatalá: ʻI he ʻaho Tuʻapulelulú, naʻe fakataha ʻa Sīsū Kalaisi mo ʻEne kau ākongá ʻo ʻoange kiate kinautolu ʻa e sākalamēnití.

ʻOku puke ʻe he tokotaha ʻokú ne puke ʻa e fakatātaá ʻa e fakatātā 2 (Sīsū ʻi he ʻOhomohe Fakaʻosí). ʻOku tangutu takai ʻa e kau ākongá ʻo sio ki he fakatātā ʻo Sīsuú.

Tokotaha Fakamatalá: “Pea ʻi heʻenau kaí, naʻe toʻo ʻe Sīsū ʻa e maá, ʻo ne tāpuaki, mo tofitofi, peá ne [ʻoatu] kiate kinautolu, ʻo ne pehē Toʻo, ʻo kai: ko ʻeni hoku sinó.”

ʻI he loto-ʻapasia, ʻoku puke hake ʻe ha taha ʻo e kau ākongá ʻa e maá.

Tokotaha Fakamatalá: “Pea toʻo ʻe ia ʻa e ipu inú, pea hili ʻene fakafetaʻí, naʻa ne [ʻoatu] kiate kinautolu; pea naʻa nau inu mei ai kotoa pē. Pea pehē ʻe ia kiate kinautolu, Ko hoku toto ʻeni ʻo e fuakava foʻoú, ʻa ia ʻoku lilingi koeʻuhí ko e tokolahi.”

ʻI he loto-ʻapasia, ʻoku puke hake ʻe ha taha ʻo e kau ākongá ʻa e ipú.

Tokotaha Fakamatalá: Naʻe akoʻi foki ʻe Sīsū kiate kinautolu ha meʻa mahuʻinga. Naʻá Ne folofola, “ʻOku ou tuku ʻa e fekau foʻou kiate kimoutolu, Koeʻuhí ke mou feʻofaʻaki kiate kimoutolu; [ʻo] hangē ko ʻeku ʻofa kiate kimoutolú. … ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu.”

ʻOku hivaʻi ʻe he tokotaha kotoa ʻa e “Ke Mou Feʻofaʻaki” (Tohi Hiva ʻa e Fānaú, 74).

Tokotaha Fakamatalá: “Pea toki haʻu ai ʻa Sīsū mo kinautolu ki he potu ʻoku ui ko Ketisemani, ʻo ne pehē ki he kau ākongá, Mou nofo ʻi heni, ka u ʻalu ki hena ʻo lotu.”

ʻOku tangutu fakataha ʻa e kau ākongá ʻi he tafaʻaki ʻe taha ʻo e siteisí. ʻOku tuʻu ʻa e tokotaha puke fakatātaá ʻi he tafaʻaki ʻe taha ʻo e siteisí, ʻo puke hake ʻa e fakatātā hono 3 (Ko e lotu ʻa Sīsū ʻi he ngoué).

Tokotaha Fakamatalá: “Pea ʻalu siʻi atu [ʻa Sīsū], ʻo tō fakafoʻohifo, ʻo pehē ʻene lotú, ʻA ʻeku Tamai, kapau ʻe faʻa fai, pea ʻave ʻa e ʻipú ni ʻiate au: kae ʻoua naʻa faʻiteliha pē au, ka ko koe pē.”

ʻOku tākoto ki lalo ʻa e kau ākongá ke pehē pē ʻoku nau mohe.

Tokotaha Fakamatalá: Lolotonga e lotu ʻa e Fakamoʻuí, naʻe māʻu mohe ʻEne kau ākongá. Naʻe faingataʻaʻia toko taha pē ʻa Sīsū ʻi he ngoué. Naʻá Ne ongoʻi ʻetau faingataʻaʻiá mo e mamahí kotoa kae lava ke mahino kiate Ia peá Ne tokoniʻi kitautolu. Naʻá Ne faingataʻaʻia ke totongi huhuʻi ʻetau ngaahi angahalá.

ʻOku hivaʻi ʻe he tokotaha kotoa ʻa e “Gethsemane” (Hymns—For Home and Church, no. 1009).

Tokotaha Fakamatalá: Hili ʻa e lotu ʻa Sīsuú, naʻe ʻave Ia ʻe he kau sōtiá ʻo nau haʻi Ia. Neongo naʻe ʻikai ke Ne fai ha meʻa hala, ka naʻe fakakaukau ʻa e kau takí ke tāmateʻi Ia.

ʻOku puke hake ʻe he tokotaha puke fakatātaá ʻa e fakatātā 4 (ko e Fakamoʻuí ʻi he kolosí). ʻE tūʻulutui takatakai ʻa e kau ākongá ʻo sio hake ki he fakatātaá.

Tokotaha Fakamatalá: ʻI hono tautau Ia ʻi he kolosí, naʻe folofola ʻa Sīsū, “ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí.” Naʻa mo ʻEne mamahi lahí, naʻá Ne hoko ko e sīpinga haohaoa ʻo e ʻofá mo e fakamolemolé.

ʻOku hiva ʻa e tokotaha kotoa “ʻOku ʻi ai ha Fonua” (Ngaahi Himi, fika 103).

Tokotaha Fakamatalá: Hili ʻa e pekia ʻa Sīsū Kalaisí, naʻe tuku Hono sinó ʻi ha fonualoto ʻi ha ʻaho ʻe tolu. ʻI he ʻaho hono tolú, naʻe haʻu ʻa Mele Makitaline mo ha kau fafine kehe ke ʻaʻahi ki he fonualotó. “Pea naʻa nau vakai kuo tekaʻi ʻa e maká. … Pea naʻa nau hū atu, ka naʻe ʻikai te nau ʻilo ʻa e sino ʻo e ʻEiki ko Sīsuú.”

ʻOku lue loto-mamahi ʻa Mele mo e kau fafiné ʻi he funga siteisí ʻo vakavakai holo, mo e puputuʻú.

Tokotaha Fakamatalá: Naʻe hā mai ha ongo ʻāngelo ʻo lea ki he kau fafiné.

ʻĀngelo 1 mo e ʻĀngelo 2 ʻokú na manga atu ki he siteisí ki he tafaʻaki ʻo Melé.

ʻĀngelo 1: “ʻOua naʻá mo manavahē … he ʻoku ou ʻilo ʻokú mo kumi ʻa Sīsū, ʻa ia naʻe tutuki ki he ʻakaú.”

ʻĀngelo 2: “ʻOku ʻikai ʻi heni Ia, he kuo toetuʻu.”

Tokotaha Fakamatalá: “Pea naʻá na ō leva … ʻi he manavahē mo e fiefia lahi, ʻo na feleleʻi ke fakahā mai ki [he] kau ākongá.”

ʻOku lele fiefia ʻa Mele mo e ongo fafiné mei he funga siteisí ke vahevahe ʻa e ongoongo fakafiefiá mo e tokotaha kotoa pē.

Mele: Kuó Ne toe tuʻu! ʻOku moʻui ʻa Sīsū Kalaisi!

ʻOku pukepuke hake ʻe he tokotaha puke fakatātaá ʻa e fakatātā 5 (ko e Kalaisi kuo toetuʻú). ʻOku foki ʻa e tokotaha kotoa pē ki he funga siteisí.

Tokotaha Fakamatalá: Naʻe toe tuʻu hotau Fakamoʻuí ʻi he pongipongi Toetuʻú. Koeʻuhí ko Ia, kuo liliu ʻa e meʻa kotoa pē. Te tau lava ʻo maʻu ʻa e ʻamanaki leleí, melinó, mo e fiefiá. Koeʻuhí ʻokú Ne moʻui, ʻokú Ne ʻiate kitautolu ʻi he ʻahó ni pea maʻu ai pē.

ʻOku hiva ʻa e tokotaha kotoa “Kuo Toetuʻu ʻa Sīsū” (Ko e Kaumeʻá, ʻEpeleli. 2025, 18–19).