“Ko e Palani Fakaofó,” Ko e Kaumeʻá, Māʻasi 2026, 4–7.

Ko e Palani Fakaofó

Kimuʻa pea tau haʻu ki he māmaní, naʻe ʻi ai ha palani fakaofo ʻa e Tamai Hēvaní maʻatautolu. ʻE fanauʻi mai kitautolu pea te tau ako mo tupulaki ʻi he māmaní. ʻE lava ke tau muimui ʻi Hono hala ʻo e fuakavá mo fai ʻa e ngaahi fili ʻoku leleí.

Naʻe ʻafioʻi ʻe he Tamai Hēvaní te tau fiemaʻu tokoni. Naʻá Ne ʻafioʻi te tau fai ha ngaahi fili ʻoku kovi mo faiangahala ʻi he taimi ʻe niʻihi. He ʻikai ke tau lava ʻo foki kiate Ia kapau he ʻikai ke tau maʻa.

Naʻa tau fiemaʻu ha taha makehe ke tokoniʻi kitautolu ke tau maʻa mei heʻetau ngaahi angahalá. Ko Sīsū Kalaisi ʻa e ʻuluaki fānau ʻi he laumālié ko e ʻAlo ʻo e Tamai Hevaní. Naʻá Ne fiemālie ke haʻu ki he māmaní ʻo fakahaofi kitautolu mei heʻetau ngaahi angahalá.

Tā fakatātā ʻo e Kau Tangata Potó ʻi he fanga kāmelí ʻi heʻenau muimui ʻi he fetuʻu ʻo e Kilisimasí

ʻI ha taʻu ʻe laungeau, naʻe tatali ʻa e kakaí ke ʻaloʻi mai ʻa Sīsū. Naʻe faifai pea ulo ngingila ha fetuʻu foʻou ʻi he langí ke fakahā ki māmani kuo hāʻele mai ʻa e Fakamoʻuí.

ʻI he tupu hake ʻa Sīsuú, naʻá Ne akoʻi ʻa e ongoongoleleí ki he kakaí. Naʻá Ne angaʻofa mo ʻofa. Naʻá Ne tāpuakiʻi ʻa e fānaú.

Tā fakatātā hono fakamoʻui ʻe he Fakamoʻuí ha kiʻi taʻahine ʻoku puke ʻi hono mohengá

Naʻá Ne akoʻi ʻoku totonu ke tau muimui ʻiate Ia pea fai ki he niʻihi kehé ʻo hangē ko ia naʻá Ne mei faí. Naʻá Ne fakamoʻui ʻa e kakai naʻa nau mahamahakí. Naʻá Ne toe fakamoʻui ʻa e kakai naʻe ʻosi maté.

Fakatātā ʻo Sīsū Kalaisi ʻoku lotu ʻi Ketisemani

Naʻe ʻafioʻi ʻe Sīsū kuo taimi ki Heʻene mana maʻongoʻonga tahá. Naʻá Ne hāʻele ki he Ngoue ko Ketisemaní ʻo lotu. Naʻá Ne ongoʻi ʻa e mamahi kotoa ʻo ʻetau ngaahi angahalá mo e loto-mamahí mo e mahamahakí.

Fakatātā ʻo Sīsū Kalaisi ʻi he funga kolosí

Naʻe ʻita ha kakai ʻe niʻihi kia Sīsū. Naʻe ʻikai ke nau saiʻia ʻi he meʻa naʻá Ne akoʻí pea naʻe ʻikai ke nau tui ko e ʻAlo Ia ʻo e ʻOtuá. Naʻe puke pōpula ʻa Sīsū pea naʻe tutuki Ia ki he kolosí, ʻa ia naʻá Ne pekia ai.

Ko hono teuteuʻi ʻe he kau tengihiá, ʻa e sino ʻo Sīsuú ʻi he fonualotó

Naʻe loto-mamahi ʻaupito e ngaahi kaungāmeʻa ʻo Sīsuú. Naʻa nau tuku Hono sinó ʻi ha fonualoto pea tekaʻi ha fuʻu maka lahi ʻi muʻa ʻi he matapaá.

Hili ha ʻaho ʻe tolu mei ai, naʻe ʻalu ha kau fafine ʻe niʻihi ki he fonualotó. Naʻe ʻosi tekaʻi ʻa e maká pea naʻe ʻikai ha taha ʻi he fonualotó! Naʻe kamata ke tangi ʻa Mele Makitaline koeʻuhí he kuo pulia ʻa e sino ʻo Sīsuú. Naʻe fehuʻi ange ʻe ha tangata angaʻofa naʻe ofi mai pe ko e hā ʻa e ʻuhinga ʻokú ne tangi aí. ʻI he taimi naʻá ne talaange aí, naʻe ui ia ʻaki ʻe he tangatá hono hingoá. Naʻá ne sio kiate Ia peá ne ʻiloʻi ko Sīsū Ia! Naʻe toe moʻui Ia!

Fakatātā ʻo e hā ʻa e Fakamoʻui kuo toetuʻú kia Mele Makitaliné

ʻOku tau fakamanatua ʻi he Toetuʻú ʻa e meʻa naʻe fai ʻe Sīsū Kalaisi maʻatautolú. Koeʻuhí naʻá Ne mamahi maʻatautolu, te tau lava ʻo fakatomala pea maʻa. Koeʻuhí naʻá Ne toetuʻu, te tau toe moʻui kotoa pē! Koeʻuhí ko Ia, te tau lava ʻo foki ki heʻetau Tamai Hēvaní pea nofo mo hotau ngaahi fāmilí ʻo taʻengata.