Sepse Perëndia e Deshi Aq Botën

Ati Qiellor na do të gjithëve aq shumë saqë dërgoi Birin e Tij, Jezu Krishtin, për të na ndihmuar që të kthehemi tek Ai.

Jezusi e dinte se do të kishte raste në jetën tonë kur do të ndienim trishtim, dhembje dhe vetmi. Do të bënim gabime e madje do të kishim frikë nganjëherë. Në Kopshtin e Gjetsemanit, Jezu Krishti zgjodhi t’i ndiente të gjitha ato gjëra që Ai të mund të na kuptonte dhe ndihmonte përsosurisht. Ai gjithashtu pagoi për mëkatet tona që ne të mund të pendohemi. (Shih tek Alma 7:11–13.)

Jezusi e dinte gjithashtu se, kur të vijë koha, të gjithë ne do të vdesim. Vdekja është një pjesë e natyrshme dhe normale e jetës. Mirëpo, Perëndia nuk dëshironte që vdekja të ishte fundi i historisë sonë. Për shkak se Jezu Krishti dha jetën e Tij dhe u ringjall, të gjithë ne do të jetojmë përsëri gjithashtu. Për këtë arsye, Ai zgjodhi të vdiste për ne.

Ne e quajmë atë që bëri Shpëtimtari Shlyerja e Jezu Krishtit. Kjo dhuratë e shenjtë u bë për ne me dashuri. Kujto, Perëndia e deshi aq botën saqë Ai dërgoi Birin e Tij, Jezu Krishtin (shih te Gjoni 3:16). Dhe Jezusi na deshi aq shumë saqë Ai dha jetën e Tij që ne të mund të kthehemi për të jetuar përsëri me Perëndinë.