O Le Vavegai le Faasitepu o le Faitotoa

Sa faauma e Gracie lana u mulimuli o panikeke, tuu ana ipu i le fata fufuluipu, ma uu mai lana atofaafafa.

“Taimi mo le lotu faaleaiga,” o le tala lea a Tama.

Sa tootutuli tagata uma i le potu malolo. Sa faia e le tuagane masaga o Gracie, o Siaosi, le tatalo. “Faamolemole fesoasoani mai ia matou maua se aso lelei i le aoga,” o lana tala lea. “Ma faamolemole faamanuia Tina ia manuia o ia. Faamolemole faamanuia fomai ia iloa le ala e fesoasoani ai ia te ia.”

Sa iai se fula i le faiai o le tina o Gracie. O le a manaomia ai ona faia sona taotoga. Sa faamoemoe fomai o le a lelei mea uma, ae sa le mafai ona latou iloa ma le mautinoa.

Ina ua uma le tatalo, sa fusi e tina tagata uma. “Ou te toe alu nei i le fomai. E faamoemoe e mafai ona tatou maua nisi tali.”

Ae faapefea pe afai e oti Tina ma ua le mafai ona ou toe talanoa ia te ia? Sa taumanatunatu ai Gracie. Sa fefe lava o ia. Sa le mafai ona ia vaai faalemafaufau i le le mafai ona fusiina Tina pe vaai ia te ia pe a tuua le aoga.

O lena aso, na alu ai Gracie i le vasega, malologa puupuu, ma le malologa umi e pei lava o le mea masani. Ae sa ia mafaufau pea ia Tina. Ina ua ia lagona le fefe, sa ia mafaufau e uiga i lana pese Peraimeri e sili ona fiafia i ai. E mafai na faavavau aiga i le ala a le Tama, sa ia pesepese ai i lona mafaufau.

Ina ua latou taunuu i le fale mai le aoga, sa taufetuli atu Gracie ma George i totonu ma tuu atu ia Tina se opo lapoa. “Na faapefea mai lau vaaiga o le fomai?” Sa fesili atu ai Gracie.

“Sa lelei lava,” o le tala lea a Tina. “E tele lava mea tatou te le o iloa. E i ai ni nai o’u taimi e vaai ai fomai i le vaiaso a sau a o lei faia le taotoga.”

Sa fiafia Gracie e vaai i lona tina. Peitai sa popole pea o ia.

I ni nai aso mulimuli ane, na tatagi ai le logo o le faitotoa. Ina ua tatala e Tina le faitotoa, sa faalogoina e Gracie i ni pesepesega.

Sa laua tutu ma Tina i faasitepu i le faitotoa ma tilotilo atu i se aofia o uo a le aiga mai le lotu ma le aoga. Sa latou usuina ni pese o le Peraimeri. “Sa matou mafaufau ia te oe ma mananao e aumai se faamafanafanaga,” o le tala lea a se tasi o i latou. Ona amata lea ona latou toe pepese.

Na sau foi George i le faitotoa. Sa faliu atu o ia ia Gracie. “Ta pepese faatasi ma i latou!”

Sa uu mai e Gracie ma George o laua peleue ma taufetuli atu i fafo e faatasi atu i isi. Sa laua pepese leotele i le mea sa la mafaia:

Sa vaai Gracie ia Tina o soloiese ona loimata. O lona uso laitiiti, o Rosie, sa pipii i vae o Tina ma faalogologo foi.

Sa sosolo atu se lagona toafilemu i luga o Gracie. Sa popole pea o ia ia Tina. Ae sa ia iloa e alofa Iesu Keriso ia i latou. O Ia o se Atua o vavega. Ma i se isi itu, sa iloa e Gracie o le a lelei mea uma.

Ata na tusia e Bethany Stancliffe