O Se Amataga Fou

Sa atoa le valu tausaga o Alexandre i ni nai aso! Sa matua fiafia tele o ia ona sa la fuafuaina ma Tama se aiga faapitoa mo lona aso fanau pe a tuua le aoga. A o taunuu atu faifeautalai mo le taumafataga o le afiafi, sa ta’u atu e Alexandre ia i latou uma e uiga i meaai mama sukalati mananaia sa ia filifilia.

“E valu ma e tofu ma se moligao e tasi, nai lo o se keke e tasi ma ni moligao e valu!”

Na ’ata Elder Lauener “Ta’i manaia tele. Faatotoe mai se mea mo a’u!”

Ina ua uma le taumafataga, sa aoao atu e faifeautalai se lesona e uiga i le papatisoga. Na faliu atu Elder Doyon ia Alexandre. “Pe a e papatiso, ua e tauto e mulimuli ia Iesu Keriso.” Sa ia faamatala atu ia Alexandre e uiga i lona lava papatisoga ma faasoa atu lana molimau. “Na fesoasoani mai le Agaga Paia ia ou lagona le fiafia tele ona o le aso lena na ou filifili ai e mulimuli ia Iesu Keriso.”

Sa lei mafai ona faatali Alexandre i le aso o lona papatisoga!

Ae ina ua alu o ia e moe i lena po, sa faigata ona maua se moe. Sa fiafia o ia i le manatu o le mama ma le fou. Ae e faapefea ona tumau lona mama pe a uma le papatisoga?

O le taeao na sosoo ai na savavali ai Alexandre ma Tama i le aoga. “Ua matua e filemu lava i lenei taeao,” na fai atu ai Tama. “O le a le mea ua tupu?”

Sa mapuea Alexandre. “Maimau pe ana mafai ona papatisoina au i le sili atu ma le faa tasi”

“Aisea?” O le fesili lea a Tamā.

“E mafai faapefea ona ou tumau i le mama pe a uma ona ou papatiso?” o le fesili lea a Alexandre. “E galo ia te au mea i taimi uma—e pei o le faatalofa ma faafetai atu i tagata matutua ma ia onosai i lo’u uso laitiiti. Ou te iloa o le a ou faia lava ni measese. E na o le faatasi lava ona e papatiso, o le a ou le toe maua ai le mama.”

Na tu Tama ma vaavaai atu i mata o Alexandre. “Oka. Atonu o lena mea fai si faigata. E te manatua le mea na tatou talanoa ai i le faia o folafolaga i le papatisoga?”

Sa lue atu le ulu o Alexandre. “Pei a.”

“Pe a e papatiso, e teosia se feagaiga ma le Tama Faalelagi. E te folafola atu e tausia Ana poloaiga ma mulimuli ia Iesu Keriso. A uma lea, o taimi uma lava e te ai ma inu ai le faamanatuga, e mafai ona e manatua Iesu ma le ala e mafai ona Ia fesoasoani ai ia e salamo.”

Na faamatamata tetele le pupula a Alexandre. “Ma e mafai ona ou lagona le mama e pei ina ua ou papatiso?”

“Lena tonu a,” o le tala lea a Tama. “E iloa e le Tama Faalelagi e te le atoatoa, ma o nisi taimi o le a e faia ai ni filifiliga sese. Afai e te agasala, e mafai ona e salamo ma taumafai e mulimuli ia Iesu. Faamata o se mea lena e mafai ona e faia?

Sa ataata Alexandre. “Ioe! Ou te manatu e mafai ona ou faia le mea lena.”

Ina ua oo mai le aso fanau o Alexandre, na faia e lona aiga lana vaiaiga i le tuua ai o le aoga. O le matuai tofolelei lava! Ma i lona papatisoga, sa lagona e Alexandre se lagona lelei faaopoopo i lona loto ina ua ia sau i luga mai le vai. Sa ia folafola atu e mulimuli ia Iesu Keriso, ma sa ofoofogia lena lagona.

I lena vaiaso sa taumafai malosi Alexandre e tausi ana feagaiga fou ma agalelei atu i lona uso laititi. Ae ina ua oo mai le Aso sa na sosoo ai, na tau le fiafia o ia. Na ia lagona sa tatau ona ia faia ni filifiliga lelei i lena vaiaso.

Ina ua faasolo mai le faamanatuga, sa piilima Alexandre ma punou lona ulu. Sa ia ole filemu atu i le Tama Faalelagi e fesoasoani ia te ia e taumafai atili i le vaiaso e sosoo ai. Sa mafaufau o ia i le alofa tele o Iesu ia te ia ma lona manao e avea atili e pei o Ia.

A o aumaia se fasi falaoa mai le fata o le faamanatuga, sa lagona e Alexandre le mafanafana ma le toafilemu i [lona] loto. Sa ia lagona e pei lava ona sa ia lagonaina i le aso o lona papatisoga! Sa tuu e Tama lona lima i le tauau o Alexandre ma aataata atu ia te ia.

O le aso lenei o se amataga fou o le vaiaso, ma o le a fai e Alexandre le mea sili— faatasi ma le fesoasoani mai o le Tama Faalelagi.

Ata na tusia e Toby Newsome