Faafitauli Faaleuo

Sa kiki e Matt se maa a o savali atu o ia i le fale. Sa le mafai ona ia iloa. Aisea na ia maua ai ni lagona leaga tele?

Sa tafafao o ia ma lana uo o Iosefa. Ae sa foliga mai na matuai le fiafia lava Iosefa, ma na iu ina vave alu Matt i le fale nai lo le mea sa ia fuafuaina.

Atonu o loo ou vaai faalemafaufau i ai, o le manatu lea a Matt. Atonu e le o lelei le aso o Iosefa.

O le aso na sosoo ai ina ua taunuu Matt i le aoga, sa ia vaaia Iosefa o talanoa i se vaega o uo. Sa valaau atu Matt ia te ia ma talotalo atu. Sa tilotilo atu Iosefa i le itu a Matt, ae sa le’i toe talotalo atu o ia. Na toe liliu o ia i ana uo.

E le’i iloa mai au e Iosefa, sa fai ifo ai Matt ia te ia lava.

I le vasega ina ua oo i le taimi mo le galuega faalevaega, sa savali atu Matt ia Iosefa. “E te manao e ta te paga?” Sa fesili atu ai Matt.

Sa pei lava e lei lagona mai o ia e Iosefa. “Sau, Mika,” o le tala lea a Iosefa i le tamaitiiti o looo nofo i ona autafa. “Ta o ta galulue i ole.”

Sa savavali ese atu tama e toalua. Sa le’i lelei le faalogona Matt. Sa i ai se mea na mautinoa lava le faalavelave ia Iosefa. Ae o le a la?

Sa le mafai e Matt ona mafaufau i se mea sa ia faia e ita ai Iosefa ia te ia. Ioe, o nisi taimi sa laua i ai i ni au faafeagai e taaalo pesipolo i le taimi o le malologa. Ae e masani lava ona laua fepoai o la lima mulimuli ane. Aisea na pei ai na filifili Iosefa e i ai i le au faafeagai i mea uma?

O le mea sili e mafai ona ou talanoa ia Iosefa i le taimi o le malologa, sa mafaufau ai Matt.

I le taimi o le malologa, sa tamoe atu Matt e auai i isi tamaiti i luga o le malae.

“Ei, Iosefa! o le valaau lea a Matt. “E mafai ona ou talanoa ia te oe mo se minute?”

“O le a amata le taaloga,” o le tala lea a Iosefa.

“Ua lelei, o le a ou sau e taaalo tautuaa i ou tafatafa ma e mafai ona ta talanoa,” o le tala lea a Matt.

“Ua e tuai tele. Ua leai se avanoa i lo’u itu,” o le tala lea a Iosefa a o tamoe atu e auai i lana au.

Sa tilotilo atu Matt a o amata ona taaalo tagata uma. O le toatele naua o tagata sa lei faalavelave muamua lava ia Iosefa. Sa talia i taimi uma tagata uma.

Ae sa mautinoa lava e Matt sa lei lagonaina le taliaina e Iosefa. Aisea na faapena ai uiga a Iosefa? Aisea na le faaaofia ai o ia? E lei faia e Matt se mea sese!

“O Iosefa o le tagata lea o loo faia se mea sese,” o le tala lea a Matt i ona matua i le taumafataga o le afiafi. “E le talanoa mai foi o ia ia te a’u ma ta’u mai le mea ua ita ai!”

“E foliga faigata lena mea,” o le tala lea a Tina.

Sa lagona e Matt le vevela o loimata i ona mata. “Ou te lagona e pei ua le toe avea o ia ma a’u uo, ma ou te le iloa pe aisea.”

“Ou te mitamita ia te oe i lou taumafai e talanoa atu ia te ia e uiga i ai,” o le tala lea a Tama. “Atonu e mafai ona e taumafai e ta’u atu ia te ia ou lagona ma e te manao e fesoasoani.”

Sa faamimigi tauau o Matt. O uiga faaalia o Iosefa, sa lei mautinoa ai e Matt pe o le a faalogo Iosefa ia te ia.

Na oomi e Tina le lima o Matt. “O le a matou tatalo foi mo oe, ma mo Iosefa.”

I lena po a o sauni Matt e moe, sa ia mafaufau e uiga i mea na fai mai ai Tina ma Tama. Sa tatalo muamua o ia mo ana uo i le taimi na latou faanoanoa ai pe oo foi i se taimi faigata. Ae sa ese lenei mea, a ea? O Iosefa o le tagata lea ua agaleaga ia te ia.

Aisea la na tatalo ai matua o Matt mo Iosefa? Pe tatau foi ona ia tatalo mo Iosefa?

Sa tootuli Matt i autafa o lona moega. “Tama Faalelagi, e faigata ona le ita ia Iosefa,” o le tatalo lea a Matt. “Ou te iloa o loo ita o ia, ae na te lei tauina mai ia te au le mea o loo faalavelave ia te ia.”

Sa taofi Matt. “Ou te fia talanoa ia te ia, ae ou te le o mautinoa pe o le a ia ta’u mai ia te a’u le mea o tupu. Faamolemole fesoasoani ia te ia i soo se mea o faalavelave ia te ia. Ma po o le a lava le mea e tupu, faamolemole fesoasoani mai ia te a’u ia ou agalelei pea ia te ia.”

A o tatalo Matt, sa amata ona ia lagona le toafilemu i totonu. Sa ia iloa o le Tama Faalelagi ma Iesu Keriso o ana uo mamae. E mafai ona laua fesoasoani ia te ia ia alofa ia Iosefa, e tusa lava po o le a le mea na filifili Iosefa e fai. Ma o le a Laua i ai iina mo ia e tusa lava pe le toe avea Iosefa o sana uo.

Sa ataata Matt. O le tatalo mo Iosefa sa o se manatu lelei lea.

Ata na tusia e Mark Robison