O Lea Ua Papatisoina Oe. O Le A La le Isi Mea?

Manatua le taimi na e maua ai le meaalofa o le Agaga Paia ina ua uma lou papatisoga? O le taimi nei e mafai ona faatasi pea o Ia ma oe a o e filifilia le mea sa’o. E masani ona fesootai mai le Agaga Paia ia i tatou e ala i mafaufauga ma lagona. O le faalogo i le Agaga Paia o le a fesoasoani ia te oe e faia ai filifiliga lelei ma maua ai le olioli moni.

Mafaufau I Ai: O le a se taimi na e lagonaina ai le Agaga Paia? E mafai ona avea o se aafiaga tele po o se aafiaga laitiiti!

Ina ua togiola Iesu Keriso mo a tatou agasala, sa Ia faia ia mafai e i tatou uma ona salamo. O le salamo o le liliu ese lea mai le agasala ma agai atu i le Tama Faalelagi ma Iesu Keriso. E matuai fiafia lava i laua pe a tatou filifili e salamo aua e fesoasoani tatou te latalata atili atu ai ia i Laua.

Mafaufau I Ai: O le a se mea se tasi e mafai ona e faia o le a fesoasoani ia te oe e liliu atu ai i le Tama Faalelagi ma Iesu Keriso?

A uma lou papatisoga, e sili atu ona faapitoa le faamanatuga. O le taimi nei pe a e tagofia le faamanatuga, ua e faafouina le feagaiga na e osia i le papatisoga e tausi poloaiga ma mulimuli ia Iesu Keriso. A e le tausia atoatoa nei folafolaga, o le faamanatuga o se faamanatu faalevaiaso ona o Iesu Keriso, e mafai ai ona tatou salamo ma faamagaloina.

Mafaufau I Ai: O le a se auala se tasi e mafai ona e faia ia faapitoa ai le faamanatuga i lenei vaiaso?

O le malumalu o le maota paia o le Atua. O le tausaga e atoa i ai lou 12, e mafai ona e alu i le malumalu ma fesoasoani i isi e ala i le faatinoina o papatisoga mo e ua maliliu. Mulimuli ane, e mafai ona e osia nisi feagaiga a oe lava ia ma le Tama Faalelagi. O mea e te aoaoina i totonu o le malumalu o le a fesoasoani ia te oe ia avea atili e faapei o le Tama Faalelagi ma Iesu Keriso.

Mafaufau I Ai: O le a se mea se tasi e mafai ona e faia i le taimi nei e saunia ai e alu i le malumalu?