O Se Talanoaga ma Emily e uiga i le Papatisoga

Ou te fiafia e valivali, tusi ata, taoina o meaai suamalie, meataulima, ma siva ma pepese faatasi ma nai o’u tei. Ou te fiafia foi e alu i le faatoaga a lo’u tamamatua e tietie ai i solofanua.

I le taimi o afiafi faaleaiga, sa aoaoina au e o’u matua e uiga i le faatuatua, salamo, papatisoga, ma le meaalofa o le Agaga Paia. Sa ou saunia foi e ala i le faitauina o tusitusiga paia, tatalo, ma matamata i vitio e uiga ia Iesu Keriso. E faapitoa lava lo’u fiafia i le vitio e uiga i le papatisoga o le Faaola i le Vaitafe o Ioritana. Ou te fiafia i le vaega pe a faaali mai le lupe pa’epa’e, lea e faatusa i le Agaga Paia.

Sa ma faataitaia foi ma lo’u tama le auala o le a ma tutu ai i totonu o le faatanoa. Sa ou fefe i le alu i lalo o le vai, ae sa aoaoina a’u e lo’u tama i le auala e faapipio ai o’u tulivae, kava lo’u isu, moeiini ou mata, ma faapau lemu atu i ona lima. Sa tele ina ma faataitaia lenei mea, ma i le aso o lo’u papatisoga, sa faigofie ona ou faia.

Sa o se aso e le faagaloina mo a’u. Sa faia e nisi o tagata o lo’u aiga ni lauga, fai tatalo, ma tutu o ni molimau. Sa ou usuina foi le “Pe a Ou Papatiso” faatasi ai ma le fesoasoani a le ta piano a le Peraimeri. Ina ua uma ona ou papatiso, sa ou lagonaina lo’u Tama Faalelagi ma Lona Alo, o Iesu Keriso, e matua latalata mai lava ia te a’u. Sa ou tagi i le fiafia.

Sa faapitoa foi aua sa i ai so’u manatu e valaaulia nisi o a’u uo ma tagata o le aiga e le o ni tagata o le Ekalesia e o mai i lo’u papatisoga, ma sa latou malilie e o mai. O se tasi o a’u uo sa auai e omai lava i gaoioiga a le lotu ma ona matua.

Ou te taumafai e manatua a’u feagaiga e ala i le alu i le lotu, tagofia o le faamanatuga, ma manatua le Faaola. O le iloaina na Ia ofoina mai Lona soifua mo a’u ou te lagona ai le lotofaafetai. Ou te tatalo foi i aso uma, faitau tusitusiga paia, auauna atu i isi, ma taumafai ia avea ma se tagata lelei.

I a’u uo o e o le a papatisoina, ou te faamoemoe e mafai ona outou latalata atili atu i le Tama Faalelagi ma lagonaina Lona alofa atoatoa!