Pagpakighinabi ni Parker bahin sa Pagbisita sa Palmyra

Sultihi kami bahin sa imong kaugalingon.

Desinuybe ang akong edad. Duna koy tres anyos nga igsoong babaye nga ginganlan og Madelyn. Ang akong paborito nga pagkaon mao ang cheeze pizza. Ang akong paborito nga kolor kay itom. Ganahan ko nga magsulat og mga istorya, magdula, ug magdrowing.

Bisan tuod kon tugnaw sa gawas, mibati ko og kainit sa pagbati ug nasayod nga gikan kadto sa Espiritu Santo. Naghunahuna ko nga nag-ampo si Joseph Smith didto ug nakakita sa Langitnong Amahan ug ni Jesukristo. Nahibalo ko nga makaampo usab ako, ug ang akong Langitnong Amahan motubag nako.

Human sa Sagrado nga Kakahoyan, mibisita mi sa Bungtod sa Cumorah. Ang Bungtod sa Cumorah mao ang dapit diin gilubong ni Moroni ang mga palid nga bulawan aron makaplagan ni Joseph Smith sa umaabot nga mga katuigan. Miadto usab kami sa ubang mga dapit sa kasaysayan sa Simbahan sa maong lugar diin nakakat-on mi og dugang pa mahitungod sa paghubad sa Basahon ni Mormon.

Sa unsang paagi nga nakatabang nimo ang pagkat-on og dugang mahitungod sa kinabuhi ni Joseph Smith?

Nahibaloan nako nga si Joseph Smith wala makaangkon og daghang edukasyon. Naglisod ko sa pagkat-on og basa. Ang akong mama ug ako nakahukom nga mobasa ko og usa ka bersikulo gikan sa Basahon ni Mormon kada adlaw ug mag-ampo mi nga ang Langitnong Amahan motabang nako nga makakat-on sa pagbasa. Mas maayo na kaayo karon ang akong pagbasa! Nahibalo ko nga kon mag-ampo ta ug mangayo og tabang, sama ni Joseph, motubag ang atong Langitnong Amahan.

Naningkamot gihapon ko og maayo nga makaangkon sa akong kaugalingong pagpamatuod. Ganahan ko nga parehas kaayo nako si Joseph Smith. Dihang 14 anyos pa siya, wala kaayo siya kaseguro kon unsa ang tinuod. Nag-ampo ko kada adlaw nga sa dili madugay makaangkon ko og pagpamatuod nga sama sa iyaha. Nahibalo hinuon ko nga ang Basahon ni Mormon makahatag nako og maayong pagbati kon mobasa ko niini, ug mabati nako ang gugma sa Manluluwas para nako.