Paghandom sa Pasko diha sa Iyang Kasingkasing

“Nganong dili na man kita moadto sa simbahan?”

Si Sadie nangutana sa iyang mga ginikanan niini nga pangutana sa pipila ka higayon. Kasagaran ang iyang mama molingo-lingo lang ug ingon ka magul-anon tan-awon sama sa gibati ni Sadie. “Daghan kaayong rason,” miingon siya sa kataposan. Si Sadie wala makasabot.

Sa wala pa ang iyang pamilya mohunong sa pag-adto sa simbahan, gipabunyagan pa siya sa iyang mga ginikanan. Si Sadie nalipay niana, apan nangandoy siya nga unta ang iyang mga ginikanan modala niya sa simbahan bisan kon dili na sila magpadayon. Gimingaw gyod siya sa pag-adto sa Primary.

Ang iyang pamilya naghimo gihapon og makalingaw nga mga butang nga manag-uban. Sa tinglarag, mibaktas sila sa kabukiran. Nagpiknik sila sa parke ug nagdula og frisbee. Miadto sila sa drama-drama nga giapilan sa iyang magulang nga igsoong lalaki.

Sa Disyembre siya ug ang iyang pamilya nagdala og mga pagkaon ngadto sa mga higala ug mga silingan. Ilang butangan og dekorasyon ang Christmas tree nga manag-uban. Migahin sila og usa ka Sabado nga mag-sled sa niyebe ug mipauli alang sa init nga tsokolate ug mga donut nga hinimo diha sa balay.

Ganahan si Sadie nga mohimo niini nga mga butang, apan mas gimingaw gyod siya sa pag-adto sa simbahan. Gimingaw siya sa pagkanta sa mga himno sa Pasko ug sa pagpaminaw sa mga pakigpulong mahitungod sa pagkatawo ni Jesukristo.

Karong tuiga ang Pasko natumong og Dominggo. Ang iyang higala misulti niya nga ang Primary manganta sa panagtigom alang sa sakramento sa buntag sa Pasko. Ganahan si Sadie nga mokanta.

“Pwede ba nga moadto kita sa simbahan karon lang nga Dominggo?” Si Sadie mihangyo sa iyang mga ginikanan. “Palihog? Ang Primary manganta, ug ganahan ko nga anaa ko didto.”

Ang iyang mga ginikanan nagtinan-away sa usag usa, dayon balik ngadto ni Sadie. “Pasayloa ko,” si Papa miingon, “apan dili pwede. Dili karong tuiga.”

Si Sadie naglaom gihapon nga ang iyang pamilya unta mobalik sa simbahan sa umaabot, apan dili kana mahitabo karon nga Pasko.

Sa buntag sa Pasko, si Sadie mibati og pamilyar nga kahinam nga mag-alirong sa Christmas tree ug ablihan ang mga regalo uban sa iyang pamilya. Naghunahuna siya kon unsa ka dako ang iyang gugma sa iyang mga ginikanan ug sa iyang magulang nga igsoong lalaki ug nasayod nga sila nahigugma niya.

Si Mama naghimo sa ilang paboritong pamahaw—chocolate-chip nga mga pancake nga gibutangan og cream. “Labing lami nga pamahaw,” ang iyang igsoong lalaki miingon human nakahurot og duha ka puno nga plato. Miuyon ang tanan.

Human sa iyang pagtabang sa pagpanglimpyo, si Sadie miadto sa iyang kwarto. Naghunahuna siya sa mga bata sa Primary nga nanganta sa simbahan ug naningkamot og maayo nga dili siya maguol nga wala siya didto.

Si Sadie nangita og butang nga buhatonon diha sa iyang kwarto. Ang iyang mga mata mipunting sa usa ka kahon sa mga colored pencil. Dayon aduna siyay ideya. Bisan kon dili siya makaadto sa simbahan karon, mahimo gihapon siya nga maghunahuna ni Jesus matag adlaw.

Nakakita siya og usa ka piraso nga papel ug misugod sa pagdrowing og usa ka hulagway sa senaryo sa Talan-awon sa Pagkatawo ni Jesus—ang batang si Jesus sa pasongan, si Maria ug si Jose nga nagbantay niya, ang mga magbalantay sa karnero nga nag-alirong nilang tanan. Siya mikanta og “Didto sa Pasongan” sa iyang kaugalingon samtang nagdrowing.

Sa dihang nahuman sa iyang hulagway, gidala niya kini ngadto sa kusina ug gigamit ang usa ka magnet aron ibutang kini sa pultahan sa refrigerator. Ang iyang mga ginikanan ug magulang nga igsoong lalaki walay gisulti bisan unsa, apan mipahiyom sila.

Nindot ang gibati ni Sadie. Dili siya makausab sa unsay gibati sa iyang pamilya mahitungod sa pag-adto sa simbahan. Apan mahimo gihapon niyang hinumdoman si Kristo ug ang Pasko diha sa iyang kasingkasing.

Ablihan ang PDF

Paghulagway pinaagi ni Tracy Nishimura Bishop