Malaga le Au Paia i Sisifo

I le mavae ai o le maliu o Iosefa Samita, na taitaia e Polika Iaga ma isi Aposetolo le Ekalesia. Sa iloa e Polika e tatau i le Au Paia ona tuua Navu ona sa le saogalemu. Ae sa finagalo le Alii ia latou faamae’aina muamua le fausiaina o le malumalu.

Ina ua saunia le malumalu, e faitau afe le Au Paia na osia feagaiga ma le Alii ma faamauina o ni aiga.

O lenei ua oo i le taimi e amata ai la latou malaga i sisifo. Sa malulu le tau, ma sa mama’i tagata ma fiaaai.

Sa tatalo Polika mo se fesoasoani. Na fetalai mai le Alii e tatau ona latou fesoasoani le tasi i le isi, ma o le a Ia faamanuiaina i latou ma fesoasoani ia i latou.

Sa matuā faigata pea lava le malaga. Sa maliliu nisi tagata. Ae ona o a latou feagaiga o le malumalu, na iloa ai e le Au Paia o le a latou toe vaai i tagata o o latou aiga.

Na taunuu uluai Au Paia i le Vanu o Sate Leki i le 1847. O iinei e mafai ai ona latou tapuai i le Alii ma faia Lana galuega i le filemu.

I le aluga o tausaga, na toatele le Au Paia na taunuu ma fausia nisi malumalu. Sa faimalaga faifeautalai i le lalolagi atoa e a’oa’o atu le talalelei a Iesu Keriso. Sa faaauau pea ona tuputupu a’e le Ekalesia a le Faaola, ma faamanuiaina fanau a le Tama Faalelagi i soo se mea.