Kerisimasi a Keola

“Faavave, Pae!” Sa fai atu ai Keola i lona uso laitiiti. “E mafai ona e faia!”

Sa i ai Keola ma lona aiga i le fale o Tamamatua ma Tinamatua. Sa latou taaalo i le Candy Grab ma o latou tausoga—o le latou taaloga e sili ona fiafia e taaalo ai i le Aso Kerisimasi. Sa fusi mata o Pae. Sa taumafai o ia e asu lole i se saeu ma tuu i totonu o se pakete.

“E lima ou sekone o loo totoe!” o le tala lea a lo la uso matua, o Tauinaola. Sa ia uuina le mea e fua ai le taimi.

“Faigata tele lenei mea!” Sa ata Pae ma tuu solo lana asu, ma faasalalau ia lole i luga o le fola.

“Ua uma le taimi!” Na valaau atu ai Tauinaola.

Sa toso ese e Pae le fusi o ona mata. “Mea sili na ou maua ni nai mea! Tatou taaalo i le Mama Togi i le taimi nei.”

Sa o Pae, Tauinaola, ma o latou tausoga i le isi potu. Sa sauni Keola e mulimuli ia i latou, ae sa ia faalogoina le leo o Tinamatua.

“O a mai lau Kerisimasi, Keola?” Sa laa atu Tinamatua i luga o le lole ma pepa afifi i luga o le fola ma tuu atu ia Keola se opo lapoa.

“Manuia lava!” Na fai mai ai Keola.

I se taimi na muamua atu, sa faia ai e le tinamatua o Keola, tina o tinamatua, ma tina o le aiga ni meaai mananaia Filipino mo le ‘aiga o le afiafi. O le mea e fiafia i ai Keola sa taua o le pancit, na faia i saimini araisa, moa, ma fualaau faisua e falai i le ulo.

Ina ua uma le ‘aiga o le afiafi, sa faapotopoto tagata uma e faitau le Luka e 2. Sa faaaoga e Keola ma Pae le la seti o le Soifua Mai o Iesu e fesoasoani e faamatala ai le tala. Sa manaia le manatua faatasi o le soifua mai o Iesu Keriso.

Ae o lenei ua toeitiiti uma le Kerisimasi. Sa faanonou atu Keola. “Maimau pe ana le uma.”

“Faapena foi a’u. Ae ou te faafetai e mafai ona tatou faaaluina faatasi le aso.” Sa tuu atu e Tinamatua ia Keola se isi fusi mau. “E tatau ona ou alu e fesoasoani e faamama. O le a ou i ai i le umukuka pe a e manaomia au.”

A o tilotilo atu Keola ia te ia o alu, sa ia vaaia ona matua o fesoasoani i tamaitai ma alii o le aiga e tapena le umukuka. Sa latou fufulu ma faamamago ipu. E lei fiafia tele Keola e faamama, ae sa ia iloa o loo tele lava mea e fai i le fale.

Atonu e tatau ona ou fesoasoani, sa ia mafaufau ai ia te ia lava.

Sa i ai pea pepa o lole ma pepa afifi i luga o le palapala. Sa uu mai e Keola se taga lapisi mai le umukuka. Sa ia fafaoina i totonu pepa uma. Ona ia savali solo lea ma piki i luga pepa solo palapala ma isi lapisi. Ina ua mavae ni nai minute, sa foliga ua mama le potu!

Sa mafaufau Keola po o le a le isi mea e mafai ona ia faia. Sa taaalo ona tausoga pepe i nisi o tusi ma meataalo sa i ai pea i luga o le fola. Sa ia aoina mai i latou ma teuina. Ona ia teuina lea o taaloga lea na taatitia i fafo.

Sa faatumulia le loto o Keola i se lagona mafanafana. Sa ia iloa sa ta’u atu e le Agaga Paia ia te ia ua ia faia se mea lelei. Sa fiafia o ia e fesoasoani!

Sa tumau pea le lagona lelei ia te ia a o ia aveina atu ipu mafolafola ma ipu inu i le faatanoa fuluipu o le umukuka. Sa ataata atu Tina ia te ia a o ia fufuluina ia ipu.

“Faafetai mo lau fesoasoani, Keola,” o lana tala lea.

Sa ataata mai Keola. “Faafetai foi!”

O le isi, sa ia fesoasoani i le uso o lona tama e faamama le fola o le umukuka ma teu meaai na totoe. Ina ua mavae lena, sa matuai iila lava le fale!

E le’i umi ae oo i le taimi e o ai i le fale.

Sa talotalo atu Keola ia Tinamatua ma Tamamatua, ona savavali atu lea i le auala faatasi ma Tama, Tina, ma ona uso. Sa fetagisi mai alisi, ma sa vaaia e Keola le susulu o fetu i le lagi. Sa ataata o ia. Sa avea ma se Kerisimasi manaia. Sa fiafia o ia ona sa ia fesoasoani i lona aiga e faamama. Ma sa ia iloa sa fiafia foi Iesu Keriso.

Ata na tusia e Mattia Lo Russo