Faatumauina o le Kerisimasi i Lona Loto

“Aisea tatou te le toe o ai i le lotu?”

Sa fai atu e Sadie i ona matua lenei fesili mo le tele o taimi. E masani lava ona lulu le ulu o lona tina ma foliga faanoanoa e pei ona lagona e Sadie. “E tele mafuaaga,” o lana tala lea. Sa le’i malamalama Sadie.

A o lei le toe o lona aiga i le lotu, sa faataga o ia e ona matua ina ia papatiso. Sa fiafia Sadie i lena mea, ae sa ia moomoo maimau pe ana ave o ia e ona matua i le lotu e tusa lava pe la te le mananao e nonofo. Sa matuai misia lava lona alu i le Peraimeri.

Sa faia faatasi lava e lona aiga ni mea fiafia malie. I le tautoulu, sa latou sopo ai i atumauga. Sa faia a latou tafaoga i le paka ma taaalo i le ipu faalele. Sa latou o i le tala sa i ai lona tuagane matua.

Ia Tesema sa latou aveina ai ma lona aiga ni ipu meaai mama i uo ma tuaoi. Sa latou teuteuina faatasi le laau Kerisimasi. Sa latou faaaluina le Aso Toonai e faasee ai i le kiona ma o i le fale mo se ipu koko vevela ma ni tonai fai i le fale.

Sa fiafia Sadie i le faia o nei mea, ae sa ia misia le alu i le lotu e sili atu nai lo se isi lava taimi. Sa ia misia le usuina o viiga o le Kerisimasi ma faalogologo i lauga e uiga i le fanau mai o Iesu Keriso.

O le Kerisimasi o lenei tausaga sa pau i le Aso Sa. Sa ta’u atu e lana uo ia te ia o loo pepese le Peraimeri i le sauniga faamanatuga i le taeao o le Kerisimasi. E fiafia Sadie e pese.

“E mafai ona ta o i le lotu i le aso Sa nei?” Sa fesili atu Sadie i ona matua. “Faamolemole? O loo pepese le Peraimeri, ma ou te fia i ai iina.”

Sa tilotilo atu ona matua i le tasi ma le isi, ona toe foi lea ia Sadie. “Ou te faamalie atu,” o le tala lea a Tama, “ae e le mafai. E le o le tausaga lenei.”

Sa taofimau Sadie i le faamoemoe atonu e toe o lona aiga i le lotu i se aso, ae sa lei fesoasoani lena mea ia te ia i lenei Kerisimasi.

I le taeao o le Kerisimasi, sa lagona e Sadie le fiafia masani o le faapotopoto faataamilo i le laau Kerisimasi ma le tatalaina o meaalofa ma lona aiga. Sa ia mafaufau i le tele o lona alofa i ona matua ma lona tuagane matua ma iloa e alolofa i latou ia te ia.

Sa faia e Tina la latou malutaeao e sili ona fiafia i ai—o panikeke sukalati sa faamaualuga i le kulimi. “O le malutaeao sili ona lelei lea,” o le tala lea a lona tuagane ina ua uma ona ‘ai ana ipu panikeke tutumu e lua. Sa malilie uma i ai tagata.

Ina ua uma ona ia fesoasoani e faamama, sa alu Sadie i lona potu. Sa mafaufau o ia i tamaiti Peraimeri o loo pepese i le lotu ma sa ia faia le mea sili na te mafaia e aua ai nei faanoanoa ona na te le o i ai iina.

Sa tilotilo solo Sadie i lona potu mo se mea e fai. Sa oo lana vaai i se pusa o penitala lanu. Sa faafuasei ona oo ane sona manatu. E tusa lava pe le mafai ona ia alu i le lotu i le taimi nei, atonu e mafai lava ona ia aumaia Iesu i lona aso.

Sa ia maua se fasipepa ma amata ona tusi se ata o le vaaiga o le Soifua Mai o Iesu—o le pepe o Iesu i le faatanoa vao, o Maria ma Iosefa o loo vaavaaia o ia, ma sa faapotopoto leoleo mamoe e siomia ai i latou uma. Sa ia usuina le “I se Faatanoa Vao” ia te ia lava a o ia tusia le ata.

Ina ua uma lana ata, sa ia aveina i le umukuka ma faaaoga se maneta e tuu ai i luga o le faitotoa o le pusa aisa. Sa le’i fai mai e ona matua ma lona tuagane matua se tala, ae sa latou ataata.

Sa maua e Sadie se lagona lelei. Sa le mafai ona ia suia lagona o lona aiga e uiga i le o i le lotu. Ae e mafai lava ona ia tuuina Keriso ma le Kerisimasi i lona loto.

O Ata na tusia e Tracy Nishimura Bishop