“O Tu Masani o le faaaliga o le Soifua Mai o Iesu,” Friend, Tesema 2025, 4–5.

O Tu Masani o le faaaliga o le Soifua Mai o Iesu

Saunia e Savannah L. Tanner

“E le manaomia e le Faaola ni meaalofa matagofie—na o lo tatou alolofa ma a tatou taumafaiga silisili.”

O se tala moni mai Peru.

Sa uu e Spencer le lima o Papá a o la savavali atu i le mutia. Sa savavali atu i luma ona tuafafine matutua, ma aoina mai maa ma lala.

“Papá, aisea tatou te faaaogaina ai mea mai fafo mo le faaaliga o le Soifua Mai o Iesu?” Na fesili atu ai Spencer.

Sa piki i luga e Papá se fasi limu. “O se mea lenei ua leva ona faia e aiga iinei. Matou te aoina mai mea ua tuuina mai e le Tama Faalelagi ia i tatou i le natura e fai ai se nofoaga mo le pepe o Iesu. E fesoasoani tatou te manatua ai sa soifua mai o Ia i se nofoaga faatauvaa.”

Sa tilotilo atu Spencer i le limu i le lima o Papá. Sa le o se mea manaia, ae sa vaivai.

O se aiga o loo saofafai i se laulau o faia se seti o le Soifua Mai o Iesu mai mea faitino o le natura

Ina ua latou taunuu i le fale, sa latou potopoto faataamilomilo i le laulau laupapa i le potu malolo. Sa tuu e Papá se tamai omea o Maria ma Iosefa i luga o le laulau. O lea la o le a latou faaaogaina mea na latou maua i fafo e fai ai le fale o manu ma le faatanoa vao. Ona latou faaopoopo lea o le pepe o Iesu i le vaaiga o le Soifua Mai o Iesu i le Po o le Kerisimasi.

Sa tilotilo atu Spencer a o galulue ona tuafafine. Sa latou faaopoopo i ai ni fugalaau felanulanuai ma fili ia lala laau i se pa laitiiti. Sa latou faia ia foliga manaia tele.

Sa tuu ma le faaeteete e Spencer ni fasi limu i le tasi itu o le fale ma faaopoopo i ai ni nai maa. Ae ina ua ia tilotilo atu i le mea sa ia faia, sa lei foliga lelei e pei o mea na faia e ona tuafafine. Sa foliga piopio lana auala. Sa le’i manaia lana limu.

Na mapuea o ia. “E le manaia tele la’u vaega,” o lana tala lemu lea.

Sa faauouo mai o ia e Tinamatua. “Aisea e te manatu faapena ai?”

“E le manaia foliga e pei o la’ua lale”

Sa sosō atu Papá e nofo i ona autafa. “Spencer, e te iloa le mafuaaga tatou te faia ai lenei faaaliga o le Soifua Mai o Iesu?”

Na lūlū le ulu o Spencer.

“Ina ia fesoasoani ia tatou lagona le latalata atu ia Iesu,” o le tala lea a Papá. “O le Faaola o le vaega aupito sili lea ona faapitoa o le Kerisimasi. Na te le manaomia ni meaalofa matagofie—na o lo tatou alolofa ma a tatou taumafaiga silisili.”

Sa lue atu le ulu o Spencer. Sa ia toe tilotilo i lana faaputuga laitiiti o maa ma limu. Atonu e le atoatoa, ae sa ia faia le mea sili na te mafaia.

I nai aso na sosoo ai, sa latou faapotopoto i tafatafa o le laulau e tutu se moligao ma usu pese o le Kerisimasi. Sa fiafia Spencer i le auala na gaogao ai le faatanoa vao mo le pepe o Iesu. Sa faamanatu atu ai ia te ia o loo latou faatalitali mo se mea faapitoa—e pei lava ona sa faia e leoleo mamoe ma le Au Makoi.

Mulimuli ane, na oo mai le Vaeluaga o le Kerisimasi. Sa tuu atu e Tina ia Spencer le tamai pepe ele o Iesu, ma sa ia tuuina ma le faaeteete i le faatanoa vao.

A o tilotilo atu Spencer i le faaaliga o le Soifua Mai o Iesu, na te lei popole pe o le a le atoatoa le foliga mai ai. Sa ia mafaufau e uiga ia Iesu Keriso.

Sa ataata Spencer. O le tausaga lenei, sa ia tuuina atu ai se mea ia Iesu e ala i le faia o le mea sili na te mafaia, e tusa lava pe le atoatoa. Ma sa manao o ia e foai atu pea—e ala i le agalelei, alofa atu i isi, ma taumafai ia avea atili e faapei o Ia.