“O Se Meaalofa Faapitoa o le Kerisimasi,” Uo, Tesema 2025, 44–45.

O Se Meaalofa Faapitoa o le Kerisimasi

Saunia e Alelie Coronel-Camitan

O se tala moni mai Finelani.

Teineitiiti o loo tilotilo i meaalofa i lalo o se laau Kerisimasi

Sa nutimomoia le fatu o Fipe e pei o ni paukiona. O le Vaeluapo lenei o le Kerisimasi! E le o toe mamao ona i ai lea o Tinamatua ma Tamamatua iinei. O loo fe’ilafi mai le laau Kerisimasi. Sa savalivali lemu Fipe faataamilo i le laau ma tilotilo i meaalofa felanulanuai i lalo ifo. Sa mafaufau o ia po o le a lana meaalofa!

Teineitiiti ma lona tina ma lona tama i le umukuka

Sa pisi Tina ma Tama i le umukuka i le faiga o meaai mananaia. Sa manaia tele le manogi! Sa i ai fasipovi lapotopoto Finelani, casseroles, ma kuki falaoa fiu. Mmm!

“Ua oo ea i le taimi o meaalofa?” Sa fesili atu ai Fipe.

“E lei oo i le taimi. O le a tatou matamata muamua i se vitio o Iesu,” o le tala lea a Tama. “O le Kerisimasi o le taimi lea tatou te faamanatuina ai le aso fanau o Iesu Keriso.”

Teineitiiti ma ona matua o loo saofafai i luga o se sofa e matamata i le televise

Sa potopoto tagata uma e matamata i se vitio e uiga i le pepe o Iesu. Sa matamata filemu Fipe.

“E lei fanau mai Iesu i se falemai,” o le tala lea a Fipe. “Sa soifua mai o ia i se fale o manu ma le mutia ma manu!”

“Sa’o lelei,” na fai mai ai Tina. “O Iesu o le meaalofa faapitoa a le Atua ia i tatou. Na afio mai o Ia e faaali mai ia i tatou le tele o le alofa o le Atua ia i tatou.”

Sa lagonaina e Fipe le mafanafana ma le fiafia i totonu. Sa ia mafaufau e uiga ia Iesu ma le tele o Lona mo ia. Sa ia iloa o Ia o le meaalofa sili ona faapitoa o meaalofa uma.