Moega o le Kerisimasi

Pa’o, pa’o, pa’o.

Sa pa’o lemu seevae o Katie i le kiona a o ia savali atu i le fale faigaluega. Ina ua ia tatalaina le faitotoa, na sau le manogi o masani o le suauu ma le gao mai le palau sa galue ai lona tama.

“O a mai la’u Katie?” Sa fesili atu ai Tama a o ia laa atu i totonu.

“Maalili a!” Sa ia aveesea le kiona mai ona seevae. “O le a lau mea na e fai?”

Sa liliu atu o ia i lana laulau faigaluega. Sa taatitia ni fasilaau faataamilo o le moega pepe. Sa manava tele i totonu Katie. Mata e mo ia? Masalo sa mo lona uso laitiiti, o Sieni.

“E ese le manaia,” sa fai atu ai Katie. “E mo Sieni?”

Sa lulu le ulu o Tama leai. “E te manatua Mr. Roy, le tamaloa lea sa tatou galulue i le taimi o le seleselega?”

Sa luelue le ulu o Katie.

“Sa maua e ia ma lona aiga se fale e mautotogi ai, ae o loo latou feagai ma se taimi faigata,” o le tala lea a Tama. “Ua popole o ia e le tele ni mea e maua e si ana fanau teine e toatolu i le Kerisimasi o lenei tausaga. Ae o loo i ai ni ma meaalofa faapitoa ma lou tina mo i latou.”

Sa savali atu Katie i le moegapepe laitiiti ma luelue i tua ma luma.

Sa ataata Tamā. “Afai o oe o se teineitiiti, e te manao i lenei moega pepe?”

Sa ata o ia. “O a’u o se teineitiiti!”

Ona iloa lea e Katie le tagata e anaina le moegapepe. Sa mo le fanau teine a Mr. Roy!

“E mafai ona ou fesoasoani?”

“E mafai ona e fesoasoani ia te au e vali,” o le tala lea a Tama. Sa susulu ona mata.

Sa fai e Tama ni moega pepe se tolu, e tasi mo teineiti taitasi. Sa ia tatalaina ni apa vali, ma sa amata ona galue Katie. Sa ia valiina i latou i lanu piniki vaivai, lanumoana, ma le lanu samasama sesega. O salu taitasi o lana pulumu, sa ia lagona ai le fiafia tele.

Sa ia liliu atu i lona tama. “Ina ua ou vaai i le moegapepe muamua, sa ou faamoemoe e mo au. Ae o le fesoasoani e ese le manaia. Talosia e fiafia teineiti i moega pepe e pei ona ou fiafia e valiina.”

I le Po o lumanai le Kerisimasi, sa o atu ai Katie ma lona aiga i le fale o le au Roy.

Tuitui, tuitui, tuitui Sa tuitui Katie i le faitotoa ma faatalitali. Ina ua matala le faitotoa, sa ia vaaia se teineitiiti la te tupulaga e enaena lona lauulu e ofu manifinifi lanu samasama. Sa autilo atu ni teineiti laiti se toalua ia te ia.

I se taimi mulimuli ane, sa oo mai ai Mrs. Roy i le faitotoa.

“Manuia le Kerisimasi!” sa fai atu ai Tina.

Sa avatu i totonu e Katie ma lona aiga ia moegapepe, ni ana meataalo afifi se tolu, ma se pusa tele e tumu i meaai o le Kerisimasi. Sa tilotilo atu Mrs. Roy, ma loimata i ona mata a o filifili e teineiti taitasi se moega pepe. Sa amata ona tea ese atu le matamumuli o teineiti. Faatasi ai ma foliga e tumu i le ofo, sa latou afifiina ai a latou pepe meataalo fou i ie soosoo na faia e le tina o Katie.

Sa saofai Katie i talaane o le teine matua. “O ai lou igoa?”

“Flossie,” o le tala lea a le teineitiiti.

“O au o Katie. E te fiafia i le moegapepe?” o lana fesili lea.

Sa ataata tele Flossie. “O se mea sili ona manaia ua ou mauaina.”

“Fiafia lava e te fiafia i ai. Sa ou fesoasoani e valiina!”

“Faafetai lava,” sa ia musumusu atu ai a o ia opoina ona lima laiti ia Katie.

Sa tapuni e Tama le faitotoa a o latou tuua le fale o le au Roy. Sa ia oomiina le tauau o Katie. “O le a sou manatu o le a le vaega sili ona lelei o le Kerisimasi?”

Sa tilotilo ae Katie i lona tama ma se ataata. “Sa masani ona ou manatu o le mauaina o se meaalofa, ae o lea ua ou manatu atonu o le tuuina atu o se meaalofa i se isi tagata.”

Ata tusi na saunia e Melissa Manwill Kashiwagi