Faamanatuina o le Kerisimasi

O’u uso e ma tuafafine pele, ua matuai faamanuiaina i tatou e ala i savali matagofie sa tatou faalogologo i ai mai ia Sister Runia, Elder Palmer, ma Elder Cook. Ua ou lagona le faamanuiaina i le mafai ona aoaoina atu o nisi o mea ua uma ona latou faamatalaina.

O le Kerisimasi o se vaitau matagofie o le tausaga. A o tatou faamanatuina le soifua mai o lo tatou Faaola, e magaga o tatou loto i le mea e sili ona taua i o tatou olaga. O le Kerisimasi tatou te nofoilo atili ai ma tele le lotofaafetai mo osigataulaga na faia mo i tatou.

I.

O le Kerisimasi e faamanatu mai ai ia i tatou e mafaufau le tasi i le isi. E atili ai ona tatou talisapaia o tatou aiga. Tatou te faafou ai a tatou fesootaiga ma uo ua leva. Tatou te lepetia ai papupuni e faaeseesea ai i tatou i isi taimi o le tausaga. E feofoofotai ai tagataese e aunoa ma le maasiasi. E toefoi mai ai le agalelei ma le amana’ia. E aumaia e le agaga o le Kerisimasi mea sili o ia i tatou.

O le mafanafana ma le malamalama o le Kerisimasi o le Malamalama o Keriso. E pei ona tatou faitauina i tusitusiga paia o ona po nei, o le Faaola o “le malamalama moni ua faamalamalama ai tagata uma e o mai i le lalolagi.” O i latou uma e faamanatuina le soifua mai o Keriso—i latou uma ua i ai le mea ua tatou ta’ua o le “Agaga o le Kerisimasi” —ua i ai se vaega o lena malamalama.

Ua silia ma se piliona tagata o le a faamanatuina le soifua mai o Iesu Keriso i le vaitau o le Kerisimasi. E ao lava ona faia e le lalolagi atoa. E oo foi i faaupuga faalelalolagi, o Iesu le Nasareta o le tagata aupito taua lea na soifua mai. O Ia o le mataupu autu a perofeta ma le au tusisolo mo le silia ma le 60,000 tausaga. O Ia o le mataupu autu o musika ma faatufugaga aupito silisili o le lalolagi. O Ia o le faiaoga aupito silisili na soifua mai. E aupito sili ona taua, o Ia o le Alo e Toatasi Na Fanaua o le Atua le Tama Faavavau. O Ia o le Atua o lē e tatau ona ifo i ai tulivae uma ma ta’uta’u atu e laulaufaiva uma o Ia o lo tatou Foafoa ma le Togiola, o le Faaola ma o le Atua o lenei lalolagi.

“Manuia, finagalo alofa i tagata” o le savali lea o le Kerisimasi. O le autu silia’i a tusisolo ma le aufaimusika na aumaia ia i tatou le musika mamalu o le Kerisimasi. Tatou te fiafia i pesepesega e lagi mai ai le autu lea.

Sa Iutaia o leoleo lelei,

Na faalogo i pese nei:

Ia faamanu i le, Atua,

Ia faamanu i le Alii;

Ia manuia o lalo nei, finagalo alofa i tagata;

Manuia lalo nei, finagalo alofa i tagata!

O na upu, e le faitaulia taimi ua lagiina ai i gaoioiga o tatou aso malolo, e faamanatu mai ai e leai se mea fou i le faamanatuina ma pese o le Kerisimasi. Ua loa le savali ma ua masani ai. Sa aoao atu ia Atamu. Sa folafola atu i le fanauga a Isaraelu. Sa folafola atu i ē na tupuga mai ia Tamā Liae. Ua faafia, ona folafola mai e perofeta upumoni tutotonu o le Togiola a Iesu Keriso. Ua faafia, ona latou folafola mai o Lana poloaiga e ao ona tatou alolofa ma auauna atu ia te Ia ma alolofa ma auauna atu i le tasi ma le isi. Ma, sa Ia faaopoopo mai, “Afai tou te alofa mai ia te au, ia outou tausi mai i a’u poloaiga.” Ua fai faafia i le aluga o tausaga, o nei folafolaga o le savali aupito taua lea i le faavavau atoa. E mo i tatou, ma mo lo tatou lelei.

O mea aupito sili ona taua i le olaga e fai faafia. Tatou te le fiu lava e faalogologo i le suafa paia o lo tatou Faaola. Tatou te le fiu lava i le mafuta mai o e pele ia i tatou. Tatou te le fiu lava e faalogo atu i le “Ou te alofa ia te oe.”

E faapena foi i le savali faifaipea o le Kerisimasi, e le o se savali e ao ona toeiloilo ae o se savali e ao ona toefaafou i o tatou olaga.

II.

Mai lava i le taimi o lo tatou laiti, na tofu iloa e i tatou taitoatasi o le Kerisimasi o se taimi o le taufai faimeaalofa o uo ma aiga. O se taimi o le agalelei faapitoa ia i latou tatou te alolofa i ai. Ae o le agaga o le foai atu i le Kerisimasi e ao ona faalautele i talaatu o lo tatou li’o o aiga ma uo. O le taimi nei, o le toatele o o tatou talavou o loo i ai ni aafiaga e manatua pea a o asiasi atu korama ma vasega ma isi vaega o le Ekalesia ma avatu meaalofa ia i latou e manaomia ona manatuaina i le Kerisimasi, i falema’i ma nofoaga mo tagata matutua, o i latou e i ai manaoga faapitoa, ma le tele o isi. I Po Kerisimasi e le mafaitaulia, e i ai alii ma tamaitai lelei na faalogo i le pagatia o matua faavauvau, na o mai ma meataalo ma meaai ma lole ina ia lagonaina e tamaiti matatiotio, ta’umamaina le olioli o le manatuaina o i latou i le taeao o le Kerisimasi. E fiaafe alii ma tamaitai maoae na tuufaatasia a latou taumafaiga i auaunaga alofa o le Kerisimasi ina ia toomaga i ai e fiaaai, faaoofu le ‘au ofumasaesae, fai malutaga o e leai ni mea e nonofo ai, asiasi atu i e mama’i ma ua tuulafoaiina, ma avatu le olioli i fanau. Ia faamanuia e le Atua nei lima fesoasoani! E tatau ona tatou taufai lagolagoina uma i latou. O i latou o e auauna atu ma le alofa ma le le manatu faapito o ni auauna moni a le Alii o le Filemu.

III.

O le a le uiga o le “manuia i le lalolagi, ma le finagalo alofa i tagata”? “Alofa … i lou tuaoi e faapei o oe lava ia te oe,” na muai aoao mai e le Faaola. Na Ia aoao mai foi e faapea, “ia [tatou] alolofa atu i e ua ita mai, ia outou faamanuia atu i e ua fetuu mai ia i [tatou], ia agalelei atu i e ua inoino mai ia i [tatou], ma tatalo foi mo e ua tuuaifua mai ma faasaua mai ia te i [tatou].”

A o tatou galulue mo le sini o loo ta’u mai i na aoaoga, e ao foi ona avea le Kerisimasi o se taimi o le faamagalo atu, o se taimi e faamalolo ai manu’a tuai ma toefuata’i ai sootaga ua faaletonu.

Upusii: “O le mea lea, Ou te fai atu ai ia te outou, e tatau ona outou faamagalo i le tasi [ma le isi]; ona o ia o lē e lē faamagalo atu i lona uso i ana agasala, e tu taʼusalaina o ia i luma o le Alii; aua e tumau ia te ia le agasala tele atu.

“O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.”

O lea la, o le Kerisimasi o se taimi e faalautele atu ai i tatou lava i talaatu o o tatou noataga masani o le alofa ma le fefaauoa’i. “Manuia, finagalo alofa i tagata” ua le na o se savali mo i latou ua i ai o tatou lagona o le alofa ma faanaunauga, e pei o tagatanuu o la tatou Ekalesia po o le atunuu, o e nonofo i lo tatou taulaga po o le pitonuu, po o tagata foi o le aganuu masani. Na folafola mai e ‘au o le lagi le finagalo alofa i tagata uma—i uo faasamasamanoa, i tagata ese, e oo lava i e ita mai. O le Kerisimasi o se taimi e manatua ai o i tatou uma o fanau a se Tama i le Lagi, o Le na ofoina mai Lona Alo e Toatasi na Fanaua ina ia togiolaina tagata uma mai le oti. Na ofoina mai foi e lo tatou Tama i le Lagi faamanuiaga o le faaolataga ma le faaeaga i tagata uma i tuutuuga lava e tasi: faatuatua i le Alii, o Iesu Keriso; salamo, papatisoga, ma usita’ia tulafono ma sauniga o le talalelei.

IV.

O le Agaga o le Kerisimasi e uunaia ai i tatou e faaaoga lenei vaitau e fausia sootaga i mea o i ai papupuni ma siitia le malamalama ma le alofa i tagata o ituaiga uma, faatuatuaga, ma faapogai faalemalo. Pe toatele atu le Au Paia o Aso e Gata ai, e pei ona i ai i matou i Iuta, pe toaitiiti, e pei ona tatou i ai i isi nofoaga uma, e ao lava ona tatou aapa atu i atalii ma afafine uma o le Atua. E ao ona faalautele atu lo tatou lima naunau faamaoni o le faaaumea ia tagata uma, i latou o lo tatou faatuatuaga ma i latou foi o isi faatuatuaga. E ao ona tatou tausia le poloaiga na poloaiina e le Atua le perofeta o Mose e tuu atu i le fanauga a Isaraelu:

“A aumau ia te oe se tagata ese i lo outou nuu, aua tou te faatiga ia te ia. “O le tagata ese o loo aumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe.”

E tatau ona tatou aoao a tatou fanau ia agalelei ma amana’ia tagata uma. Ou te faanoanoa lava i soo se taimi ou te faalogo ai i ni matua e le o ni o le Au Paia o Aso e Gata Ai i lenei nuu o faanoanoa ona ua latou talitonu faapea ua faaesea o latou atalii ma afafine pe inosia e a tatou tamaiti po o talavou a le ekalesia. Ou te faamoemoe o na tulaga e seāseā ma ua tuuitiitia. E ao ona avea i tatou o ni tagata e sili ona fefaauoa’i ma sili ona amanaia tagata uma i soo se mea.

Ioe, e tatau ona tatou ‘aloese mai ituaiga mafutaga ma gaoioiga e fai ai ni fetuuna’iga o a tatou amioga pe faavaivaia ai lo tatou faatuatuaga ma le tapuaiga. Peitai, o lena ituaiga o le lē faaaofia ai e lē tuusaunoaina ai i tatou mai le amanaiaina o isi. E le tavavaeeseina ai foi i tatou mai le tele o mafutaga ia e aofia ai taumafaiga tuufaatasi i le atufola lautele o mea masani e fiafia i ai lea e aofia ai tagata uma.

O le agaga lea e tatau ona tatou taliaina ai le savali o le “manuia, le finagalo alofa i tagata” o le agaga o le foai atu o i tatou lava e auauna atu i isi. E faapei foi ina faamanatuina i le Kerisimasi le soifua mai o Ia o Lē na ofoina mai Lona soifua mo i tatou uma, o lea e tatau ai foi ia i tatou taitoatasi ona faaaoga le Kerisimasi o se taimi o le faaleleia o auala tatou te foai atu ai i o tatou uso a tagata.

A o tatou faia—a o faatumulia o tatou mafaufauga ma a tatou faatinoga i le agaga foai o le Kerisimasi—o le a tatou tofu faia a tatou saofaga i le sini faavavau o le “manuia i le lalolagi, ma le finagalo alofa i tagata.” Ua oo i le taimi mo i tatou uma e faia ai, aua o aso taitasi ua tatou latalata atili atu ai i le aso e tasi i le afio mai o le Alii. E pei ona aoao mai Peresitene Russell M. Nelson i le konafesi o Oketopa talu ai, upusii, “O le mea silisili o le a oo mai, ona o loo faanatinatiina e le Alii Lana galuega. O le mea silisili o le a oo mai, pe a tatou liliu atu o tatou loto ma o tatou olaga ia Iesu Keriso.” Faai’u le upusi’i.

Ou te siiina mai nei le “O Le Keriso Soifua: O Le Molimau a Aposetolo.” O loo faapea mai, upusii:

“A o tatou faamanatuina le soifua mai o Iesu Keriso i le lua afe tausaga talu ai, matou te tuuina atu la matou molimau i le moni o Lona soifua lē mafaatusalia ma le mama e lē gata o Lana taulaga togiola maoae. E leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele.”

Faaauau pea le upusii, “Matou te ta’utino atu i upu ma le faamaoni a’ia’i, o Lona soifua, lea e totonugalemu i le talafaasolopito o tagata uma, e le’i amataina mai i Peteleema pe faaiuina foi i luga o Kalevario. O Ia o le Ulumatua a le Tama, o le Alo Pele e Toatasi i la le tino, o le Faaola ia o le lalolagi. …

“Matou te folafola atu i upu ma le faamaoni a’ia’i, ua toefuataiina mai i le fogaeleele Lana perisitua ma Lana Ekalesia na toefuataimai i le fogaeleele— ‘o loo ua atiina a’e i luga o le faavae o le … au aposetolo ma le au perofeta, o le maa tulimanu o Iesu Keriso.’”

Faaauau pea le upusii, “Matou te ta’utino atu o le a i ai [se taimi] e toe afio mai ai o Ia i le lalolagi. ‘Ona faaalia mai ai lea o le pupula o Ieova, e vaaia lava e tagata uma faatasi.’” Faaiuga o le upusii. “O le a pule o Ia o le Tupu o tupu ma nofotupu foi o le Alii o alii, ma o le a tootutuli tulivae uma ma tapua’i laulaufaiva uma ia te Ia.

“Matou te molimau atu, i le avea ai ma Ana Aposetolo ua faauuina i le ala e tatau ai—o Iesu o le Keriso Soifua, o le Alo tino ola pea o le Atua. O Ia o le Tupu silisili o Emanuelu, o loo tu i le taimi nei i le itu taumatau o Lona Tama.” Ou te toe sii mai, “O Ia o le malamalama, o le ola, ma le faamoemoega o le lalolagi. O Lona ala o le auala e tau atu i le fiafia i lenei olaga ma le ola e faavavau i le lalolagi a sau. Ia faafetaia le Atua mo le meaalofa lē mafaatusalia o Lona Alo paia lea.”

I le suafa o Iesu Keriso, amene.