O Meaalofa ‘Anagatā

O le po nei, ou te tautala atu ai foi ma le olioli ma le maofa i le taua paia o le Kerisimasi. E leai se mea na tupu i le talafaasolopito o le lalolagi na i ai se aafiaga sili atu nai lo le soifua mai ma le misiona a Iesu le Nasareta i le silia ma le lua afe tausaga talu ai. I le aluga o le lalolagi o ona po nei, ua faitau fuafua ai le taimi lava ia mai lenei mea faavavega na tupu.

O le soifua mai o lo tatou Alii o loo faamanatuina i le tele o auala eseese i le salafa o le lalolagi, ae e tasi le tumasani o le Kerisimasi e foliga mai ua soo ai le atulaulau.

O lea tumasani na foliga amata mai i le tala o i le Mataio e uiga i le au makoi mai Sasae, na o mai e ifo atu ia Iesu. A o latou o mai, sa latou aumaia meaalofa taua. O le taimi nei, o le tumasani o le foai atu o meaalofa o se vaega ua faateleina atili o faamanatuga o le Kerisimasi.

O le mea muamua ou te manatua i se meaalofa o le Kerisimasi, o se fana meataalo matagofie lea e fana atu ai se momono e pipii i se manoa, ma se pato e ki se sipuligi e faaminoi ai. O se matuai fiafiaga sili lea mo se fa tausaga le matua. E taumalualua faataamilomilo le pato i luga o le fola ma e leai se avanoa e tusa’o ai, pe a ou fa’ataina ma le fiafia la’u fana meataalo mai le ono inisi le mamao. Ae e le umi ae malepe le meataalo, ma e faapei foi o ‘anomea uma, o le fiafia e maua mai ai e le tumau ma e vave foi ona galo atu.

O le po nei, ou te fautuaina atu ai ni meaalofa se tolu e mafai e i tatou taitoatasi ona foai atu i lenei vaitau o le Kerisimasi, ma i o tatou olaga atoa, lea o le a le aumaia ai le fiafia e le tumau, ae o le a aumaia ai le olioli moni ma e tumau.

Muamua o le meaalofa o le molimau. O se meaalofa patino lea ma pe a tuuina atu e oe lava ia, e aunoa ma le faa’ole’ole, e faaalia ai le faailoaga loloto o o tatou agaga. E sili atu ona taua nai ‘auro, pululipano, po o le pulumuro, o le molimau ia Iesu Keriso o lo tatou Faaola patino ma le Togiola, o le totonugalemu tonu lea o mea uma tatou te faamanatuina i le Kerisimasi.

A o laiti le ma fanau e toaono, sa tonu ai ia i ma’ua ma Jacqui i se tasi po mo le matou afiafi faaleaiga, nai lo le faia o se lesona, o le a na ona fefaasoaa’i o a matou molimau ma le tasi ma le isi. Ina ua uma ona faasoa atu la’u molimau, sa fai mai si o ma afafine o Chelsea, masalo pe ua 16 tausaga le matua i lena taimi, ma ona mata ua pūpūtetele, “Tamā, ou te lei faalogo lava muamua i lau molimau!” Sa fai si ou te’i, ma sa ou maofa i lana tali. E te iloa i le taimi lena, o la ou te peresitene i le siteki ma sa ou iloa e le faitaulia taimi na faalogo ai Chelsea o o’u tuuina atu la’u molimau i le tele o faatulagaga faalelotu ma i le fale. Ae i lena taimi, sa ia faalogo ai ma lagonaina la’u molimau e faapei o le uluai taimi lava lea. Sa ia aoao mai ia te au se lesona ou te le’i faagaloina lava: o le meaalofa o le molimau e taua ma e i ai le mana i le faasoa soo atu.

Lua, o le meaalofa o le faamagalo atu. O le mea moni o i tatou uma lava i nisi o taimi, na faamanu’alia i upu agaleaga po o faatinoga a isi. Ma afai tatou te faamaoni, na tatou faamatua’ia foi ona faatiga i isi. Ua aoao mai Iesu Keriso e faapea, “O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.” Ona Ia toe faapea mai ai lea, a tatou le faamagalo atu i isi a latou agasala faasaga ia i tatou, o le a fai le agasala tele atu mo tatou.

A tatou faamagalo atu ma le loto ma le faamaoni i isi, o le a tatou saoloto mai le ‘ona o le oona matuitui, faamasinoga, po o le tauimasui.

E i ai sa’u uo pele i Aferika i Saute e igoa ia Sandile Makasi. Ina ua faatagaina mai, ou te faasoa atu ai lenei tala patino moni o le faamagalo atu. A o le’i atoa le lua tausaga o Sandile, sa faataugāina ma fasiotia lona tamā, sa na o le 28 tausaga lona matua e leoleo i le taimi o le ogaoga o sauaga o le faailoga lanu. Mulimuli ane, sa aoaoina ai e Sandile ia auiliiliga patino lē logoleleia o le faasiotia matautia o lona tamā. O le a ou si’i atua nei ana upu:

“I uluai tausaga o lo’u tamaitiiti, sa ou lagonaina le oona ma le inoino ona o le mea sa latou faia i lo’u tamā. Na mafai faapefea ona latou aveesea o ia mai ia i matou? Sa faoa mai ia te a’u se tamā ma se faiaoga, ma sa faoa mai lo’u tina se soa alofa ma le magafagafa.

“Ina ua ou aoaoina le tulaga matautia na latou faataugāina ai o ia, sa pupusa a’e i lo’u loto ma le mafaufau le ita tele, inoino, ma le lilivau i alii leoleo ma agai atu i papalagi.

“Sa ou taofiofi mamau pea i nei lagona seia oo ina ou maua le talalelei toefuataiina a Iesu Keriso. Sa fesoasoani le talalelei ia te au ia ou malamalama e tatau ona ou faamagalo i alii leoleo mo a latou soligatulafono, ma sa faalagolago lo’u olioli ma lo’u alualu i luma faaleagaga i lena mea.

“Sa matuai faigofie ona ta’ua lenei mea nai lo le faatinoina, ae sa ou tauivi pea ma le tatalo tele, ma i le aluga o taimi sa fesoasoani mai le Alii ia te au e faamagalo o’u fili. … Nai lo le tiga, sa ou lagonaina le mafanafana; nai lo le lilivau ma le inoino, sa ou maua le alofa; nai lo le pogisa i lo’u loto ma le mafaufau, sa ou maua le malamalama ma le filemu.”

Faafetai atu Sandile mo lau faataitaiga o le foai atu o le meaalofa o le faamagalo atu.

“Lona tolu, o le meaalofa o le alofa faaKeriso. Mai meaalofa uma faaleagaga, e leai se mea e sili atu nai lo le alofa mama. Na faaali faalauaitele mai e Iesu Lona alofa mo isi ma sa aoao mai i tatou e alofa le tasi i le isi.

A o tatou mulimuli i faataitaiga a le Faaola e ala i le faailoa atu o le alofa mo isi i upu ma faatinoga, o le a mafai lea ona latou iloaina le alofa o le Atua e ala atu ia i tatou.

I ni nai tausaga ua mavae, sa ou feiloai ai i se alii talavou e 23 tausaga le matua e nofo i Uosigitone, o ia o se faataitaiga sili o lenei mea. Na aoao o ia e faifeautalai mo le tolu masina, ma sa ia iloaina se suiga maoae i ona foliga ma le ituaiga olaga ua ia ola ai. I se tasi po sa talanoa ai ma faifeautalai i luga o le telefoni, ma ina ua mae’a, sa la fai atu “Alofa ia te oe, Michael.” Sa ia tuu i lalo le telefoni ma mafaufau ifo ia te ia lava, “Oka. O se mea lena ou te le masani ai. E mafai foi ona ou fai atu lena mea i isi.” Sa tonu ia te ia o le lototele e ta’u atu i lona tina e alofa ia te ia. E na o ni nai itula le mamao o le mea e nofo ai lona tina i se isi itu o le setete. Ina ua ia vili ma ta’u atu i lona tina, “Ou te alofa ia te oe Mum,” o lana tali vave ane o le “O le a le mea ua tupu ia te oe? Na e alu i le foma’i ma maua ane ai se tala lē lelei? Pe o le a e toe alu foi i le falepuipui?” O lea, na ia faamatala atu ai ia te ia lona mauaina o le talalelei ma le ala ua suia ai o ia, ma o lea ua le toe ulaula ma lē toe faaaogaina fualaau faasaina, ma sa ia fuafua e papatiso.

Ou te manatu o se faapupulaga lelei tele lea o le mea e tupu pe a lagonaina e tagata le alofa o le Atua e ala mai i isi. E faamaluluina ai loto ma fatuina ai se manao e faasoa atu le meaalofa o le alofa i isi.

O le po nei, na amata i lo tatou talanoa e uiga i meaalofa taua e ala i le ta’ua o le auro, pululipano, ma le pulumuro. Sa ou siakia; e mafai foi ona outou faatauina na meaalofa i le Amazon. Ae o le a outou le mauaina lava isi meaalofa na tatou talanoaina i soo se faleoloa. O meaalofa na e aunoa ma se totogi, ae o le a aumaia ai le olioli tumau moni i lē na te mauaina ma lē na te foaiina.

A o outou mafaufau la i mea o le a outou tuuina atu i lenei Kerisimasi, ou te valaaulia outou e:

1. Faasoa atu lau molimau i le aiga ma i latou e te alofa i ai. A o e faasoaina atu lenei meaalofa taua, o le a faamalosia ai lau lava molimau.

2. Faamagalo i se tasi e te lagona na sese pe na faatiga ia te oe. I le tuuina atu o lenei meaalofa, o le a e lagonaina ai foi e oe le filemu ma le faamalologa.

3. Fesoasoani i isi ia lagonaina le alofa o le Atua e ala atu ia te oe. Afai e talafeagai, ta’u atu ia i latou e te alofa i ai. A o e vaai atu i isi e faapei ona silasila le Atua ia i latou, o le a faatupula’ia lou alofa mo i latou, ma o le a e lagonaina foi e oe lava le alofa o le Atua i lou olaga.

I le faaiuga, ou te faamanuia atu ia te outou taitoatasi ia maua se vaitau o le Kerisimasi e tumu i le olioli tele. Ou te tuu atu la’u molimau ia Iesu le Keriso. O loo soifua o Ia. O Ia o lo tatou Faaola, o lo tatou Togiola. O Ia o lo tatou Fautua ma le Uo. Ou te faamemelo ia te Ia. Ou te alofa ia te Ia. Ona o Lana meaalofa ia i tatou taitoatasi, na faatauina i se tau e le magafatia, e mafai ona tatou agavaa e mauaina le meaalofa silisili o meaalofa uma—le ola e faavavau i le afioaga o lo tatou Tama alofa i le Lagi.

I le suafa o Iesu Keriso, amene.