Keriso le Pepe Na Fanau Mai mo Oe

E faapefea ona tatou laki i le lagonaina o na musika matagofie? Faafetai tele lava i lenei aufaipese, le aufaili, ma le au taitai pese. E le mafai ona ou vaai ia te outou i tua atu o nei laau, ae ou te iloa o loo outou i ai iina.

“[Pepe Paia, Pepe Agamaualalo] Infant Holy, Infant Lowly” o se tasi lea o pese Kerisimasi ou te fiafia i ai.

Sa momoe le lafu, sa tausi e Leoleo Mamoe

Seia aulia le taeao fou;

Vaaia le mamalu, logo i le tala

Talalelei e moni le talafiafia

Fiafia la’ia, leai se faanoanoa,

Vivii, faafeiloa’i le taeao

Keriso le Pepe na fanau mai mo oe.

Keriso le pepe na fanau mai mo oe!

A o o’u teineitiiti, o le igoa valaau a o’u matua mo a’u o “Tammy Tamai Mamoe,” a talanoa la tusitusiga paia e uiga i se leoleo mamoe ma ana tamai mamoe, sa ou faapea o la e talanoa mai ia te a’u.

Sa faapitoa lenei mea i le tala o le Kerisimasi ma agelu sa faaali i le au leoleo mamoe, a o leoleo a latou lafu, o a latou tamai mamoe, i le po. Sa ou vaai faalemafaufau ia te au lava ma manatu ai pe mata e faape’ī le faalatalata atu i le pepe i le falemanu. O loo ou fiafia pea i nei ata i tausaga uma pe a ou manatunatu i Lona soifua mai.

O se tasi ata ou te fiafia i ai e maua mai se tala na faamatalaina e Elder John R. Lasater.

I le tele o tausaga ua mavae, sa asiasi atu ai Elder Lasater i se tama’i atunuu i Aferika, o se tasi o se usugafono aloaia a le malo.

I se tasi aso, ina ua latou faimalaga i le toafa i se solo o taavale uli faapitoa, sa tupu se faalavelave. O le taavale sa i ai o ia na taunuu i le tumutumu o le a’ega, ma sa ia matauina ai o le taavale sa pito i luma o le solo, na oso ese i tua ma le auala. Fai mai a ia, “Na tumau pea ia te au lena vaaiga sa i o matou luma mo nei tausaga e tele.”

Sa i ai se leoleo mamoe toeaina, i ona ofutalaloa totoso o ona po o le Faaola, sa tu i autafa o le taavale ma talanoa atu i le avetaavale. O autafa na tutu ai se tama’i lafu pe tusa ma le 15 mamoe.

Na so’a e le taavale na taimua ma faamanu’alia ai se tasi o mamoe, na faamalamalama atu ai e le avetaavale a Elder Lasater. Ma ona o le taavale a le tupu, o le mea lea ua alagatatau ai i le leoleo mamoe ona maua le faaselauina [100] o le tau o le tama’i mamoe pe a matua atoatoa. Ae i lalo foi o lea lava tulafono, o le a fasimate ai le tamai mamoe ona vaevae lea o le aano mo tagata.

Ona fai mai lea o le avetaavale, “Ae vaai la, e le taliaina e le leoleo mamoe le tupe; latou te le taliaina lava.” Ina ua fesiligia pe aisea, sa ia faaopoopo mai, “ona o le alofa i ana mamoe taitasi.”

Sa latou matamata a o aapa ifo i lalo le leoleo mamoe, si’i i luga le tamai mamoe ua manu’a i ona lima, ma tuu ifo i gauga o ona ofutalaloa. Sa ia milimiliina pea le tamai mamoe, ma fai faafia upu lava e tasi, ma ina ua fesili Elder Lasater i le uiga o le upu, sa ta’u atu ia te ia, “Oi, o la na te ta’uina lona igoa. E tofu uma ana mamoe ma le igoa, ona o ia o lo latou leoleo mamoe, ma e iloa e le leoleo mamoe lelei mamoe taitasi i o latou igoa.”

I le Isaia ua folafola mai ai, “Na te sapaia tamai mamoe i ona lima, ma tauave i latou i lona fatafata.”

Afai e i ai se mea tatou te manatua pe lagonaina i lenei vaitau o le Kerisimasi, e tatau ona manatua o i tatou lava o Ana. Manatua ina ua Ia fai atu ia Peteru, “Fafaga a’u tamai mamoe …a’u mamoe”?

“Aua o le aso nei ua fanau ai i le aai o Tavita, lo outou Faaola o le Alii ia o Keriso.”

“Ona ua fanau mai mo i tatou se tama, ua foaiina mai mo i tatou se atalii.”

Na fanau mai o Ia e si’itia patino a’e i tatou taitoatasi. Afai la o Ia o se Faaola o soo se tasi, e mautinoa lava la o Ia o lou Faaola. Keriso le pepe na fanau mai mo oe.

Ae ua lapatai mai foi Isaia, “O i tatou uma ua se e faapei o mamoe.” Atonu na tofu i ai i tatou taitoatasi i se nofoaga na tatou lagonaina ai e pei o se tamai mamoe ua fealualua’i solo pe o se mamoe ua se. O le po nei, ou te tautino atu o i tatou uma o tamai mamoe ua faamanu’alia ua manaomia le Leoleo Mamoe Lelei, o lē o le a sapasapaia i tatou i aao o Lona alofa. Ona o le faitino o lona uiga, e i ai mea o i tatou e foliga ua afaina, e manaomia ona faaleleia.

Ma ou te le iloaina pe i ai se taimi i lo’u vaiaso ou te lagonaina ai le moomia o se Togiola i se tulaga sili ona naunau i ai nai lo le Aso Sa i le taimi o le faamanatuga. Ou te aumaia lo’u loto momomo ma tomanatu ai i upu ma faatusa i lea “taimi o le faafouina faaleagaga.” Ae o nisi taimi e oo mai ai sina faanoanoa pe a, mafaufau i le vaiaso ua tuanai, ou te iloa ai o agasala lava nei e tasi, o vaivaiga lava nei sa ou mafaufau i ai i le Aso Sa ua tuanai. Ma ou te lagona moni ai lava le salamo po o le mafatia.

Tou te silafia le taimi lea?

O le asō ou te valaaulia outou e o e taumafai se mea fou. I na minute aupito sili ona taua o lou vaiaso atoa, afai ua lagonaina lou mafatia, mafaufau faapea o loo valaau mai o Ia ia te oe i lou igoa, ona e alu lea ia te Ia. Vaai i lou Faaola i ou mafaufauga, ma Ona aao o loo faaloaloa mai ia te oe, ma faapea mai, “Sa ou iloaina o le a e oo i lenei lagona! O le mea lena na ou sau ai i le lalolagi ma puapuagatia ai i le mea sa ou faia.” O loo avanoa Lana fesoasoani, Lona alofa tunoa mo oe i le taimi nei lava, ae lē o se taimi mulimuli ane pe a tatou manatu ua atoatoa mea uma. Aua o ai se tasi ua maua lena lagona? Ou te lei iloa lava se tasi.

Manatua, tatou te o i le lotu, i le faamanatuga o le Talisuaga a le Alii, ina ia faamaloloina, ae ia lagonaina foi le mama.

I tausaga ua mavae, a’o ou galue i le Peraimeri, sa ou faamatalaina se tala e uiga i se tagata sa papatisoina talu ai nei. Sa ou faailoa atu o lenei uo atonu o se tasi o tagata sili ona mama o le Ekalesia. Ona si’i vave a’e lea i luga i le laina pito i luma o le lima o se tamaitiiti e matua atu ma fai mai, “E tutusa foi lo’u mama e pei o ia aua ua uma ona ou papatiso ma ‘ai ma inu i le faamanatuga.” Sa ou tali atu ma le matamuli, “Ioe, o le uiga lena o la’u tala—ou te ioeina.”

A’u uo e, pe o tatou manatua moni ea ma maua lenei mataupu autu ofoofogia? Afai na tatou faia le galuega e tausia ai a tatou feagaiga ma le Atua—faaauau pea ona toe foi atu ai, lipotia, ma salamo—, e mafai ona tatou mama i aso taitasi. Ma e ala atu i le sauniga o le faamanatuga, e mafai ona tatou lagonaina le mamā e faapei o le aso na tatou papatiso ai.

Mo a’u, o le ala lea e avea ai le Sapati o se aso e malolo ai. E le na o se malolo faaletino, ae malolo mai le ta’usalaina ma le fefe, mai o’u lē agavaa ma vaivaiga. A itiiti mo na o se tasi se aso!

O se tasi o tala sili ona faamomoiloto i tusitusiga paia uma e aumaia ai ia i tatou sina vaaiga i lenei malologa. I le Tusi a Mamona, a o asiasi atu le Faaola toetu i “isi o [Ana] mamoe” i Amerika, ma i le mavae ai o le lagonaina o mea sa o latou manaomia e aunoa mo lo latou tau fesili, sa Ia valaaulia tagata uma o gausia faaletino—o e pipili, o tauaso, o e logonoa, po o i latou na “mafatia i soo se itu”—e o mai i luma.

Ou te vaai faalemafaufau ia i latou sa tutu i laina, o i latou sa iloagofie le moomia o le faamalologa faaletino. Ae i lo’u mafaufau foi, ua ou vaai atu i tagata e faapei o a’u lava ma isi ou te alofa i ai sa i le laina, o e na mafatia i ala e ono lē iloa atu i mata faaletagata. Sa Ia fesili mo i latou sa mafatia i soo se itu, “ma sa ia faamaloloina i latou uma taitoatasi.”

Matau le ala, i le taimi lea, e le’i faapea mai na Ia faafoisia atoatoa lo latou malolosi. Ou te fiafia i le manatu faapea, e i ai se eseesega i le va o le faamalologa ma le faafoisia atoatoa le malosi. O le faamālōlōina e masani lava ona toe faafoi mai ai i tatou i se tulaga sa i ai muamua o le soifua maloloina, o le mea lea tatou te moomoo i ai, a ea? Ae o le faamalologa e ese. O le faamalologa e aofia ai lena manu’a tuai, ma faia ai se eseesega o i tatou i se isi itu.

E oo lava i le Faaola o le lalolagi, i le avea ai o se tagata toetu, o loo i ai pea ia manu’a i Ona lima, o vae, ma lona itu—o faamaoniga faapea o le a Ia le faagaloina lava i tatou ma o Ona faalavalava foi e malolo ai i tatou. Atonu foi, i lena aso na faamalolo ai e le Faaola i latou, sa Ia taofia foi i latou, ma ta’itasi ona Ia tago atu i ai i se opo alofa.

O le po nei, atonu o e lagonaina le faaletonu ma e le o mautinoa e te mauaina Lana faamalologa. Ae pe moni ea lena mea? O Aso Sa taitasi i le taimi o le faamanatuga, Na Te si’iina a’e oe mai le ala pefupefua ma tuu oe i tuupao o Lona ofutalaloa, ma sapasapaia oe i Ona aao alofa.

I lena po o le Kerisimasi, sa faasoa atu ai e se agelu le tala e lelei, le tala fiafia e olioli tele ai. “O Ia o lē sili na faia o Ia lava e aupito faatauvaa—o le Leoleo Mamoe Faalelagi na avea ma Tamai Mamoe.” “Le Tupu o tupu ua taoto i le faatanoa vao faatauvaa. I o tatou tofotofoga uma na soifua mai ai e avea ma a tatou uo.” Ou te talitonu sa faapea mai le agelu, “O la outou uo, la outou uo silisili ua faatoa taunuu mai. Ma afai na e iloa le vavalalata na Ia vaavaaia ai oe, le tele na e tilotilo atu ai ia te ia i le taimi na oulua mau ai ma Ia muamua, afai na e malamalama i le mea o le a Ia ositaulagaina mo oe ma le tele o mea o le a Ia loto e faia pea mo oe e fesoasoani ai ia e toefoi atu i le aiga, o le a faanatinati e faafetaia’i ia te ia i le falepovi.”

O la’u molimau o le Pepe i le falepovi, o Le tatou te ifo i ai ma atonu foi e faafaigata ona mafaufau pe na mata e faape’ī pe ana e si’ia, na afio mai e fai na o lena lava mea mo i tatou.

Ioe, o Keriso le pepe na fanau mai mo oe!

I le suafa o Iesu Keriso, amene.