Saunia e Feiloai ma le Faaola

A o tatou ulufale atu i le vaitau o le Kerisimasi, ua liliu atu o’u mafaufauga ia i latou atonu e le o i ai i le aiga, e aofia ai le fuainumera tele o faifeautalai o loo faamisiona nei.

O la’u uluai Kerisimasi na ou lē i ai i lo’u aiga o le taimi a o ou faifeautalai i Egelani, ia Tesema 1960. Sa ou talai i Swindon, Egelani.

Sa ma tatalaina Swindon mo le galuega faafaifeautalai i le tusa ma le 90 aso a’o lei amataina. Sa ma lisiina se potu mo sauniga i Aso Sa. Sa faamanuiaina i ma’ua i le i ai o ni nai tagata liliu mai—i le amataga o se paranesi.

I le Po o le Kerisimasi, sa tonu ai ia i ma’ua ma la’u soa o Elder Noel Luke, e faafeiloai tagata i o latou fale i le eria sa ma tala’i ai, ma tuua ai se savali puupuu ma faamanuiaga o le Kerisimasi. Sa o se po matagofie, ma sa i ai se masina i le lagi faatumulia i ao, na susulu mai ma fatuina ai se lagona faalelagi. Sa faafuasei ona ma iloaina na ki televise a tagata uma i le pitonuu i se ata faimeamalie o Harry Secombe, le tama pese. Sa ia usuina le pese faapelepele o le “Bless This House.” Sa ia lagiina ma le faamomoiloto upu paia, e faapea:

Faamanuia tagata ua iinei.

Le agasala ia mamā ma saoloto mai ai.

Faamanuia i matou uma le Alii e

Ia agavaa e mau faatasi ma Oe.

O lana fatuga na loimatā ai o matou mata. O le lagi mai ai o le pese toetoe o fale uma, na taaliligia ma toefitifiti mai ai i ao. Na ma maua ma Elder Luke lenei lagona lofituina e faapea o i ma’ua moni lava o avefeau a lo tatou Alii ma le Faaola, o Iesu Keriso, o loo taumafai e auauna atu ma faamanuia fanau a lo tatou Tama Faalelagi.

I le avea ai o se faifeautalai sa oo ai ina ou malamalama o le ola ai i lenei lalolagi, ua tatou o ese uma ai lava mai le aiga—lo tatou aiga faalelagi. O le auala e lagona ai le mafanafana o lena aiga, e ala lea i le auauna atu i lo tatou Faaola.

I tausaga talu ai nei, sa fautuaina ai i tatou e le Ekalesia e faamamafa atu le malamalama lea ua tuuina mai e le Faaola i tagata uma o le lalolagi, aemaise i le vaitau o le Kerisimasi. Ua i ai i le Ekalesia se taumafaiga maoae o le Faamalamalama le Lalolagi e liliu atu ai mafaufauga o tagata uma i le Faaola. E o faatasi lena mea ma se taumafaiga e avatu ia i latou e moomia ma tuuina atu ai le auaunaga faaKeriso.

O le tausaga na te’a nei na amata ai e le Ekalesia le taumafaiga o le Faamalamalama le Lalolagi e faaaoga ai faaaliga maoae faaeletonika na siomia ai Times Square i le Aai o Niu Ioka.

Sa ma i ai ma Mary ina ua faaalia le ata faamomoiloto o le soifua mai o le Faaola i luga o laupapa faasalalau tetele faaeletonika. Sa o se aafiaga faaleagaga loloto. O le tausaga lenei ua tele aai i le salafa o le lalolagi ua faamatatosi ai le aafiaga lea o le Times Square.

A o ma i ai i le Aai o Niu Ioka, i le taimi o le faaaliga o le Faamalamalama le Lalolagi , sa ou matauina ai le taumafaiga ia i ai ni faaaliga iloga i faamalama o faleoloa.

Ou te manatua se lomiga i le Aso Sa o le New York Times sa i ai se tusiga i le itulau atoa sa faaulutalaina: “Ua Toefoi Mai Teuteuga o Faamalama. Faapena Foi Le Aufaatau.” Ua toefaamanatu mai e le tusiga se tumasani o le teuteuina o faaaliga i faamalama o faleoloa i le Magaala Lona Lima o le Aai o Niu Ioka. I le lata mai e mafai ai ona ou fuaina mai le tusiga ma la’u asiasiga talu ai nei, e leai ma se tasi o na faamalama na atagia mai ai vaaiga o le Kerisimasi po o le Tamaitiiti o Keriso.

A o ou faitauina le tusiga, sa ou manatuaina a o ou talavou, o faaaliga o faamalama Kerisimasi i faleoloa i le Aai o Sate Leki na faaatagia mai ai le tamaitiiti o Keriso. Sa ou manatuaina foi se tala mai lena vaitau e uiga i se faleoloa tele faifaatau i Sisifotutotonu sa ou manao e faamamafa ai le autu o le Kerisimasi e fatu ai se lagona o le Kerisimasi ma faatosina mai ai le aufaatau. Sa latou tuuina i luga se fu’a telē na faitauina, “Pe a afio mai Keriso i le po nei, o ai o le a afio mai i ai o Ia?” Sa tele ni vaaiga sa faaalia i faamalama o faleoloa i lalo ifo o le igoa. Afai e sa’o lo’u manatuaina o vaaiga:

• O se tasi, o se olomatua i le moega o loo i ai se teine tausimai. Sa foliga ma’i tele o ia.

• O le lona lua o se tina talavou ma se pepe faatoa fanau mai. Sa susulu mai le olioli i ona foliga.

• O se vaaiga lona tolu sa faaalia ai se aiga ma ni tamaiti o fetagisi. Sa manino sa le’i lava ni meaai, ma sa na o ni nai mea, pe afai na i ai, ni meaalofa o le Kerisimasi.

• O se vaaiga lona fa sa faaalia ai se aiga na iloagofie le maumea, o talai le mau meaalofa.

• O le vaaiga lona lima, o se aiga matagofie, ae faatauvaa lava ma le mau tamaiti sa pepese fiafia faatasi.

A o ou mafaufau i faaaliga e lima ma le fu’a “Pe a afio mai Keriso i le po nei, o ai o le a afio mai i ai o Ia?”

Muamua, ua tatou iloa pe a toe afio mai faalua le Faaola, o le a tatou le iloa le aso po o le itula.

Lua, pe a afio mai Iesu Keriso, e pei ona aoao mai Peresitene Russell M. Nelson i le konafesi aoao, “O le a [Ia] toefoi mai i le lalolagi o le Mesia o le Meleniuma.” Ina ia saunia ua uuna’ia i tatou e Peresitene Nelson, “Ia toe tuuto atu o [tatou] olaga ia Iesu Keriso.” E tusa ai ma lena, semanu e sili ona lelei pe ana faapea mai le fu’a, “Afai e afio mai Keriso i le po nei, o ai ua saunia e faafetaia’i ia te Ia?”

A o’u toeiloiloina vaaiga o faamalama, ua ou iloa ai o mea uma ua latou ta’u mai ia i tatou e uiga i le tulaga faaletino ma tulaga tautupe o tagata, ae leai ma se mea e uiga i o latou tulaga faaleagaga. O faaliga i faamalama o loo faamatala mai ai tagata taitoatasi ua matutua ma mama’i faapea foi le soifua maloloina ma le faatoa fanau mai. Sa i ai foi le au maumea ma le aumatitiva. Peitai o le matua, soifua maloloina, ma tulaga tautupe e le o ta’u mai ai ia i tatou le mea moni e taua, o le tulaga lea o o latou agaga.

I le Mataupu Faavae ma Feagaiga ua tatou faitau ai e uiga i agavaa mo papatisoga i le Ekalesia a Keriso. O tulaga faavae e faalagolago muamua i le faalotomaualaloina o i latou lava, ia maua se “loto momomo ma se agaga salamo,” salamo ma “auauna atu ia [Iesu Keriso] e oo i le iuga.” O la latou sini ia avea “o se soo faamaoni o Iesu Keriso” ma agaigai i luma i luga o le ala o feagaiga lea e saunia ai i tatou mo faamanuiaga o Lana Togiola.

O Keriso o le faataitaiga i mea uma. Na Ia tautino mai, “Faauta, o a’u o le malamalama; ua ou faatuina se faataitaiga mo outou.” A o tatou tilotilo i le tulaga o o tatou agaga, o le a lelei pe a tatou tilotilo i Lana faataitaiga atoatoa. Na faaalia mai e le Faaola ia i tatou le ala e maua ai le fiafia, le uiga, ma le olioli i lenei olaga ma i le faavavau. O le fiafia ma le olioli e faamatala ai le agaga o le Kerisimasi.

I le Ioane 19:5 tatou te faitau ai faapea na aumaia Iesu e Pilato i luma o i latou na mananao e faasatauro ia te Ia. “Sa pale o Ia i le pale tuitui, ma ofu i le ofu paauli. Ua fai atu foi Pilato ia te i latou, Faauta i le Tagata!”

I lenei vaitau o le Kerisimasi, sei o tatou tepatasi atu ia i le Tagata, o lē o le Keriso, ma meaalofa na Ia saunia.

Muamua, se’i o tatou mafaufau i Lona soifua faavavega mai.

Ua tatou iloa o lenei pepe faapelepele lea ua tatou faamanatuina i lenei vaitau o le Kerisimasi, ona pau lea o le Alo na Fanaua e le Tama. Na mautofi o Ia i le mana o le ola e faavavau mai Lona Tama—le mana e soifua ai. Na mautofi o Ia i le mana e oti ai mai Lona tina faaletino. Na filifilia o Ia talu mai lava le amataga mo Lana misiona paia.

Mataio 1:23 e faitauina, “Faauta, e to le taupou, ma fanau mai se tamatane, na te faaigoa foi ia te ia o Emanuelu, pe a faamatalaina, ua i ai le Atua ma i tatou.”

Lua, manatunatu loloto i Lona soifuaga atoatoa e leai se agasala ma Lana faataitaiga. E ui ina sa mafatia o Ia i tiga, puapuaga, ma tofotofoga o ituaiga uma, ae sa Ia faataunuuina ma le manuia Lana misiona. O Ia o lo tatou faaa’oa’o, ma sa faataatiaina le ala e ao ona tatou mulimuli ai. Sa Ia tuuto atu Lona soifua i e matitiva, e le tagolima, o e mama’i ma puapuagatia, ma le faamaeaina ma le manuia o le fuafuaga e faavavau lea sa na o Ia lava na agavaa e fai.

Tolu, mafaufau i Lona maliu, Toetu, ma le Togiola.

E faatatau i le Togiola, o le matagofie ia ma faigofie le faitauina mai le Tala’i La’u Talalelei : “O le Togiola a le Faaola ua aofia ai Lona puapuagatia i Ketesemane, Lona puapuagatia ma le maliu i luga o le satauro, ma Lona Toetu. Sa puapuagatia o Ia i se tulaga e le mafai ona malamalama i ai—sa matua tafe totoi o Ia mai pu afu ninii uma.”

I le Mataupu Faavae ma Feagaiga 76:41 tatou te faitau ai: “Na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamama mai amioletonu uma.”

O le Togiola a Iesu Keriso o le mea aupito silisili lea na tupu ma le meaalofa silisili i le talafaasolopito o le tagata. Ua agasala i tatou uma, ma e na o le Togiola a Iesu Keriso e mafai ai ona tatou maua le alofa mutimutivale ma ola faatasi ai ma le Atua.

Fa, sauniuni mo Lona Afio Mai Faalua.

I le Feagaiga Tuai, na aoao atu ai e Iopu e faapea: “O aso amuli foi e tulai mai ai o ia i luga o le eleele.” E pei ona sa matagofie le aoao mai e Peresitene Russell M. Nelson: “O [Keriso] o le a ta’ita’ia mataupu o Lana Ekalesia mai le Ierusalema tuai ma le Ierusalema Fou.” O lo tatou taimi lenei e sauniuni ai mo lea faamoemoe. Fai mai le mau: “Ia saunia outou lava mo le aso tele o le Alii.”

O la’u fautuaga faaiu ia alolofa ma auauna atu i le Alii. A o tatou mafaufau i o tatou tulaga faaleagaga ma a tatou tapenaga e faafetaia’i le Faaola, e tatau ona tatou muamua, “Alofa atu i le Alii lou Atua ma lou loto atoa, ma lou agaga atoa, ma lou manatu atoa.” Ma le lona lua o le “Alofa i lou tuaoi e pei o oe lava.”

O lo tatou alolofa i le Atua ma o tatou uso a tagata, o le su’ega taualuga lea o le tulaga o o tatou agaga. Afai tatou te alofa i le Atua, o le a tatou tausia Ana poloaiga. Afai foi tatou te alolofa i o tatou uso a tagata, o le a tatou auauna atu ia i latou ma avea moni ma aao o le Faaola.

I le Mataupu Faavae ma Feagaiga, o loo faaaoga ai e le Faaola upu nei: “Ioe, o le a ou tatalaina loto o tagata ma…o le a ou faatuina se aulotu e ala i lou lima.”

O le ala autu e mafai ona tatou faaalia ai lo tatou lotofaafetai i le Faaola i lenei vaitau o le Kerisimasi, o le avea lea ma Ana auauna—, i le faatinoga, e avea ma Ona aao iinei i le lalolagi.

I lenei taimi matagofie, pe a tatou faamanatuina le soifua mai o lo tatou Alii ma le Faaola, o Iesu Kriso, ou te molimau atu o loo soifua o Ia. O Ia o lo tatou Faaa’oa’o, o lo tatou Puluvaga i le Tama, ma ua Ia faataunuuina mea uma e tatau ai mo i tatou ia toefoi atu ai i le afioaga o le Tama ma le Alo. O le a o tatou popoto pe a mulimuli ia Iesu Keriso ma mauaina meaalofa ua Ia saunia.

Tau ina ia outou maua se Kerisimasi mamalu e faatotonugalemu ia Iesu Keriso.

I le suafa o Iesu Keriso, amene.