15,100 mo Fakalaka Atu Ai

Fai ʻe Josué E., taʻu 10, Piula, Pelū

Ko Hōsea E. mo ha komipiuta pea ʻokú ne ʻomi ha fakaʻilonga ʻaki hono motuʻa tuhú

ʻI hoku taʻu valú, naʻe faifai peá u lahi feʻunga ke maʻu haʻaku ʻakauni FamilySearch pē ʻaʻaku! Naʻá ku manavasiʻi ʻi he kamataʻangá, ka naʻe akoʻi au ʻe heʻeku ongomātuʻá mo hoku ongo tokouá mo e tuofefiné ʻi he founga ʻo e indexing mo faʻu ʻeku fuʻu ʻakau fakafāmilí koeʻuhí ke u lava ʻo tokoni ki heʻeku ngaahi kuí. Hili iá, naʻe ʻikai ke u toe ongoʻi manavasiʻi. Naʻá ku ongoʻi ʻoku poupouʻi au peá u ongoʻi mateuteu.

Ko ha kiʻi tamasiʻi mo hono tuofefiné mo ʻene tamaí ʻoku nau sio ki ha komipiuta

Naʻá ku ongoʻi leva ʻa e holi ke u hoko ko ha tokotaha toe vakaiʻi ʻo e hisitōlia fakafāmilí ʻo hangē ko ʻeku ongomātuʻá mo e ongo tokouá mo e tuofefiné. Naʻá ku fili ia ke hoko ko e taha ʻo ʻeku ngaahi taumuʻa ki he polokalama ʻa e Fānaú mo e Toʻu Tupú. Ke aʻusia ʻa e taumuʻa ko ʻení, naʻe pau ke u indexing ha lekooti ʻe 1,000.

Naʻá ku ongoʻi lōmekina ʻi he taimi ʻe niʻihi. Ka naʻe fakamanatu mai ʻe heʻeku ongomātuʻá he ʻikai ke u fai kotoa ia ʻi ha ʻaho pē ʻe taha. Ka, ʻoku totonu ke u tokanga taha ki hono fakahoko ʻo ha lekooti pē ʻe tolu ʻi he ʻaho, pea kimuʻa ʻi ha taʻu ʻe taha, te u aʻusia ʻeku taumuʻá. Naʻa nau talamai kapau ʻe faingataʻa ke mahino kiate au ʻa e ngaahi ʻīmisí, te nau tokoniʻi au.

Ko ha kiʻi tamasiʻi ʻoku lotu mo e ongo nima ʻoku kosi ʻo toʻo ʻa e ʻū kaati ouau fakatemipalé

Naʻá ku lotu ki he Tamai Hēvaní koeʻuhí ke Ne lava ʻo tokoniʻi au ke aʻusia ʻeku taumuʻá. Naʻá ku ongoʻi fiemālie ʻaupito ange hili ʻeku lotú.

Naʻe ʻikai ke u foʻi pea hokohoko atu ʻa e indexing ʻi he ʻaho ki he ʻaho. Hili ha taʻu ʻe taha, kimuʻa pea hoko hoku taʻu hivá, naʻá ku ʻosi indexing ha lekooti ʻe 1,000 tupu pea ʻomi kiate au ʻa e tuʻunga ʻo e tokotaha toe vakaiʻí. Naʻá ku fiefia lahi!

Ko ha kiʻi tamasiʻi ʻoku tangutu ʻi he musié ʻi tuʻa ʻi ha temipale

ʻOku ou ʻalu maʻu pē ʻi he taimí ni mo ʻeku ongomātuʻá ki he Temipale Trujillo Peru. ʻOku ou tokoni ʻi hono paaki ʻa e ʻū kaati ouaú, kosi ʻo toʻo pea ʻoange ki he mēmipa takitaha ʻo e fāmilí ke nau lava ʻo fakahoko ʻa e ngaahi ouaú lolotonga ʻeku tatali ʻi he ngoue ʻo e temipalé. ʻE vavé ni pē haʻaku lava ʻo hū ki loto ke fakahoko ʻa e ngaahi papitaisó.

ʻOku ou taʻu 10 ʻi he taimí ni pea kuo ʻosi ʻi ai ha lekooti ʻe 15,100 kuó u index! ʻOku ou fiefia mo vēkeveke ke hokohoko atu ʻeku aʻusia ʻeku ngaahi taumuʻá ke hoko ʻo hangē ange ko Sīsū Kalaisí.