Ngaahi ʻEkitivitī ʻo e Haʻu, ʻo Muimui ʻIate Aú

Naʻe ʻofa ʻa e ʻEikí ʻi Heʻene tamaioʻeiki ko Hailame Sāmitá koeʻuhí ko e “angatonu ʻo hono lotó” (Tokāteline mo e Ngaahi Fuakava 124:15). Kumi ʻa e ʻuhinga ʻo e foʻi lea angatonú pea talanoa ki ai mo ho fāmilí. Hili iá pea tā ha foʻi haati fōlahi ʻi ha laʻipepa. Tā pe tohi ʻi loto ʻi he foʻi hātí ha meʻa te ke lava ʻo fai ke ke angatonu ai.

ʻI he foki mai ʻa Pilikihami ʻIongi mei heʻene ngāue fakafaifekaú, naʻe fekauʻi ia ʻe he ʻEikí ke ne tokangaʻi hono fāmilí (vakai, Tokāteline mo e Ngaahi Fuakava 126). Faʻu mo teuteuʻi ha ʻesiaʻi tā ke fokotuʻu ai ha tā ho fāmilí. Te mou lava fēfē ʻo fetauhiʻakí?

ʻOku hangē hotau sinó ko e sino ʻo e Tamai Hēvaní mo Sīsū Kalaisí (vakai, Tokāteline mo e Ngaahi Fuakava 130:22). Fai ʻa e vaʻinga ko ʻení ke fakafiefiaʻi ʻa e ʻi ai haʻo sinó! Taufetongi ʻi hono fili ha ngāue ke fai, hangē ko e punopuná pe amoamohi ho ʻulú. ʻE fakatatau ʻa e tokotaha kotoa pē ki he ngāue ko iá.

ʻOku ʻofa mo angaʻofa ʻa Sīsū Kalaisi (vakai, Tokāteline mo e Ngaahi Fuakava 133:52). Faʻo ʻa e hingoa ʻo e tokotaha takitaha ʻi ha poulu. Fili ha hingoa, peá ke fai ha ngāue tokoni fakapulipuli ki he tokotaha ko iá ʻi he uiké ni.

Naʻe hoko ʻa Siosefa Sāmita ko e Palōfita ia ʻo e Fakafoki Maí (vakai, Tokāteline mo e Ngaahi Fuakava 135:3). Tā ha ngaahi fakatātā mei heʻene moʻuí. ʻOku anga fēfē hoʻo ʻilo naʻá ne hoko ko ha palōfitá?