“Mateuteu ke Kei Tupulaki Ai Pē,” Ko e Kaumeʻá, Nōvema 2025, 36–37.
Mateuteu ke Kei Tupulaki Ai Pē
Naʻe ʻikai fie mavahe ʻa Siueli mei hono ngaahi kaungāmeʻa ʻi he Palaimelí!
Ko ha talanoa moʻoni mei Palau.
Naʻe tangutu ʻa Siueli ʻi he seá ʻi he houalotu sākalamēnití mo ʻene ongomātuʻá mo e tuongaʻané. Naʻá ne tā ha ngaahi fakatātā ʻo ha ngaahi talanoa mei he folofolá. Naʻá ne feinga ke fanongo ki he tokotaha leá, ka naʻá ne ongoʻi ʻi hono keté ʻa ʻene fonu manavasiʻí!
Ko e ʻuluaki ʻaho ʻeni ʻe ʻalu ai ʻa Siueli ki he kalasi ʻa e Kau Finemuí kae ʻikai ko e Palaimelí. Naʻe ʻikai ke ne loto ke mavahe mei hono ngaahi kaungāmeʻa ʻi he Palaimelí. Naʻá ne manako ke hiva mo lau folofola fakataha mo kinautolu.
Ka naʻe taʻu 12 ʻa Siueli ʻi he taʻú ni. Kuo taimi ke hiki ki he polokalama ʻa e Kau Finemuí.
Naʻe kuikui ʻa e mata ʻo Siuelí ʻo fai ha lotu fakalongolongo. Tamai Hēvani, kātaki ʻo tokoni mai ke u maʻu ha kalasi lelei ʻi he Kau Finemuí.
Hili ʻa e lotu tukú ʻi he houalotu sākalamēnití, naʻe mihiʻi lahi ʻe Siueli ʻene mānavá peá ne lue ki he loki akó. Naʻe ʻosi ʻi ai ʻa e tamaiki fefine matuʻotuʻa angé. Naʻa nau toko fā. Naʻa nau fetalanoaʻaki mo makiʻikiʻi.
Naʻe pehē ange ʻe Siueli, “Mālō e lelei.
Naʻa nau malimali. “Mālō e lelei.”
Naʻe hū mai ʻa e faiakó ʻo talitali lelei ʻa Siueli. Peá ne kamata leva ʻa e lēsoní.
ʻI he konga lahi taha ʻo e kalasí, naʻe ongoʻi tuenoa ʻa Siueli. Naʻá ne manavasiʻi ke talanoa koeʻuhí naʻe teʻeki ai ke ne maheni mo e tamaiki fefine kehé. ʻE pau ke ne ʻi he Kau Finemuí ʻi ha taimi fuoloa. Naʻe ongo ia ʻo hangē ka taʻengatá! Te ne ongoʻi nai ʻe tuenoa maʻu pē ʻi heni?
Pea naʻe ongo mai he leʻo vanavanaiki kiate ia. He ʻikai te ke ʻi he Kau Finemuí ʻo taʻengata. Naʻá ke taʻu motuʻa feʻunga pē ke ke hoko atu ʻo ako lahi ange fekauʻaki mo e hoko ko ha ākonga ʻa Sīsū Kalaisí.
Naʻe ongoʻi fiemālie ʻa Siueli ʻi he ngaahi leá. Naʻá ne fakatokangaʻi ko hono tokoniʻi ia ʻe he Laumālie Māʻoniʻoní. Neongo naʻe teʻeki tokolahi hono ngaahi kaungāmeʻa ʻi he Kau Finemuí, ka naʻe ʻikai ke ne tuenoa. Naʻá ne maʻu ʻa e Laumālie Māʻoniʻoní.
ʻI he ʻosi ʻa e kalasí, naʻe maʻu ʻe Siueli hono fāmilí.
“Naʻe fēfē ʻa e kalasi ʻa e Kau Finemuí?” Ko e fehuʻi atu ia ʻa Mamí.
Naʻe fāʻofua ange ʻa Siueli kiate ia. “Naʻe sai pē. ʻOku ou ʻofa ki he Palaimelí pea ʻoku teʻeki ai ke u maheni mo e tamaiki fefiné. Ka naʻá ku ongoʻi hono fakafiemālieʻi au ʻe he Laumālie Māʻoniʻoní.”
Naʻe malimali ange ʻa Mami. “Ko e meʻa lelei ia ke fanongo ki ai! Pea mahalo ʻe toe lelei ange ʻa e taimi hokó.”
Naʻe kamokamo atu pē ʻa Siueli. Naʻá ne fakaʻamu naʻe moʻoni ʻa Mami.
Ko e taimi hoko naʻe toe kalasi ai ʻa Siueli ʻi he Kau Finemuí, naʻá ne toe fakalea pē ki he tamaiki fefiné.
Naʻe pehē ange ʻe ha toko taha ʻia kinautolu, “Mālō e lelei, Siueli. ʻOku totonu ke ke tangutu ʻi hoku tafaʻakí!”
Naʻe malimali ʻa Siueli pea tangutu ʻi he tafaʻaki ʻo e kiʻi taʻahiné. Ko hono hingoá ko ʻEli. Naʻá na talanoa lahi kimuʻa pea kamata ʻa e lēsoní. Naʻe angaʻofa ʻa ʻEli pea naʻá ne ʻai ia ke ne ongoʻi ʻoku talitali lelei ia.
Lolotonga ʻa e lēsoní, naʻe fehuʻi ange ʻe he faiakó pe naʻe ʻi ai ha taha naʻá ne maʻu ha aʻusia mo e Laumālie Māʻoniʻoní.
Naʻe hiki hake ʻe Siueli hono nimá. Naʻá ne pehē, “Naʻá ku ongoʻi hono tokoniʻi au ʻe he Laumālie Māʻoniʻoní ʻi he taimi naʻá ku manavasiʻi ai ke kau ki he Kau Finemuí. ʻOku tokoniʻi au ʻe he Laumālie Māʻoniʻoní ʻi he taimi ʻoku ou tupulaki mo fehangahangai ai mo e ngaahi faingataʻá.”
Naʻe fakakaukau ʻa Siueli ki he founga naʻe fakafiemālieʻi ai ia ʻe he Laumālie Māʻoniʻoní ʻi he taimi naʻá ne ongoʻi tuenoa aí. Naʻe ongo fakafiefia hono vahevahe ʻene aʻusiá mo e tamaiki fefine ʻi he Kau Finemuí.
Hili ʻene vahevahé, naʻe vahevahe foki mo ha tamaiki fefine ʻe niʻihi. Naʻe saiʻia ʻa Siueli ke fanongo ki he meʻa naʻa nau vahevahé.
Naʻe kei ʻofa pē ʻa Siueli ʻi he taimi ʻe niʻihi ki he Palaimelí Ka koeʻuhí ko e Laumālie Māʻoniʻoní, naʻá ne mateuteu ai ke hokohoko atu ʻene tupulakí.
Tā fakatātā ʻa Liz Brizzi