“Ko e Miitipolo Fakaʻosí,” Ko e Kaumeʻá, Nōvema 2025, 18–19.
Ko e Miitipolo Fakaʻosí
ʻOku ʻikai totonu! Naʻe ʻikai ke vahevahe ha taha mo ʻĀleki!
Ko ha talanoa moʻoni mei USA.
Naʻe laka taupatū hifo ʻa ʻĀleki ʻi he sitepú mo māpuhoi leʻolahi.
Naʻe hanga hake ʻa Mami mei heʻene tohí. “Ko e hā ʻa e meʻa ʻoku hokó?”
“ʻOku ʻikai ha taha ia ʻe vahevahe mo au!” Ko ʻĀleki ange ia. “ʻOku ou fehiʻa heʻeku ʻi loto mālie ʻi he fānaú.” Naʻe maʻu maʻu pē ʻe he ongo tokoua ʻo ʻĀlekí ʻa e meʻa naʻá na fiemaʻú. Naʻe ʻikai totonu ia.
Naʻe pehē ange ʻe Mami, “ʻOku ou tui kapau te ke kole fakalelei, ʻe vahevahe atu ho ongo tokouá mo koe.”
Naʻe fakafulofula ʻa ʻĀleki. “Naʻá ku ʻosi kole fakalelei ange!”
“Fēfē kapau te ke seti ha taimi ʻi he uasí? ʻI he founga ko ia, ʻoku mou takitaha maʻu ai ʻa e taimi tatau ke vaʻinga.”
“Naʻá ku ʻosi seti ha taimi!” Ko ʻĀleki ange ia. “Kae mahalo te u fokotuʻu ha taimi ʻe ua ke u fakapapauʻi ʻaupito.” Naʻá ne toʻo mai ʻa e uasi ʻe tahá mei he funga kānita ʻi peitó peá ne laka hake ʻi he sitepú. Naʻe vaʻinga keimi ʻa hono tehina ko Tēvitá ʻi he TV.
Naʻe pehē ange ʻe ʻĀleki, “Talamai ʻe Mami kuo pau ke ke vahevahe.” Naʻá ne seti ʻa e uasí ki ha miniti ʻe nima. “ʻI he taimi ʻe tatangi ai ʻení, ko hoku taimí ia.”
ʻI he ʻaho hono hokó, ʻi he taimi naʻe fakatou fie keimi ai ʻa ʻĀleki mo hono taʻokete ko Seikí, naʻá na seti ha uasi ke na taki miniti ʻe 30. ʻI he taimi naʻe fakatou vaʻinga poloka ai ʻa Tēvita mo Seikí, naʻá na lau ʻa e fika tatau pē ki he tokotaha takitaha. Pea ʻi he taimi naʻe fakatou fiemaʻu ai ʻe Tēvita mo ʻĀleki ʻa e kūkisi sokoleti fakaʻosí, naʻá na vaeua tonu pē ia. Naʻe faifai pea kamata ke ongo totonu ʻa e ngaahi meʻá.
Ka naʻe aʻu ki he maʻu meʻatokoni efiafí …
ʻI he pō ko iá, naʻa nau kai sipēketi mo e miitipolo! Naʻe kamata ke fokotuʻunga ʻe Seiki ʻa e pasitaá ʻi heʻene peletí kimuʻa pea toki lava ʻa ʻĀleki ʻo maʻu ʻa e sēpuní.
Naʻe pehē ange ʻe ʻĀleki, “Hei, ʻoku ʻikai totonu. ʻOku ou fiekaia pē mo au!”
Naʻe hili atu ʻe Teti hono nimá ʻi he uma ʻo ʻĀlekí. “ʻĀleki, ʻoku lahi ʻa e meʻakaí maʻá e tokotaha kotoa pē. Sio heni, te u ʻoatu ʻa e meʻakai lahi tatau ʻoku maʻu ʻe Seikí.” Naʻe tuku ʻe Teti ha pasitā ki he peleti ʻa ʻĀlekí.
Hili ʻenau tāpuakiʻi ʻa e meʻakaí, naʻa nau kamata kai leva. ʻI he ʻosiki ʻe ʻĀleki ʻene meʻakaí, naʻá ne kei fiekaia pē. Naʻá ne sio atu ki he kulo ʻi he loto tēpilé. Naʻe ʻi ai ha miitipolo fakaʻosi ʻe taha ʻi ʻolunga ʻi he fokotuʻunga pasitaá. Naʻá ne heuʻi hake ia ki heʻene peletí.
“ʻOku ʻikai totonu ia!” Ko Tēvita ange ia. “Ko e meʻa fakamuimui tahá ena.”
Naʻe tuhu ʻa Seiki ki he miitipoló ʻaki ʻene huhú. “ʻOku ou fie kai mo au. Tau vahevahe ia.”
“Vahevahe ia?” Ko ʻĀleki ange ia. “Kia kitautolu toko tolu? Ka ʻoku fuʻu siʻisiʻi ia.”
Naʻe kamokamo atu ʻa Seiki mo Tēvita. “ʻE tonu leva.”
Naʻe toʻo ʻe Seiki ʻa e peleti ʻa ʻĀlekí pea kamata ke ne vahevahe fakalelei ʻa e miitipoló ki ha konga ʻe tolu. Naʻe sio pē ʻa ʻĀleki ki he fakaʻau ke siʻisiʻi mo siʻisiʻi ange ʻa e miitipoló.
Naʻe kata ʻa Mami. “Ko ha fanga kiʻi konga iiki moʻoni ena!”
Naʻe kata foki mo Teti. Naʻá ne pehē, “ʻOku ʻikai fiemaʻu ia ke fuʻu mātuʻaki totonu maʻu pē. Mahalo te tau lava ʻo feinga ke sai ange ʻi he fevahevaheʻaki ʻetau ʻū meʻá kae ʻoua ʻe vahe iiki ʻa e meʻa kotoa pē.”
Naʻe sio hifo ʻa ʻĀleki ki he fanga kiʻi kongokonga miitipoló. Naʻe kiʻi ngalivale ia. Naʻá ne fuʻu tokanga moʻoni nai ki ha miitipolo? Mahalo naʻe fiemaʻu ke ne ako ke vahevahe lahi ange.
ʻI he ʻaho hono hokó, ʻi he taimi naʻe fakatou fie vaʻinga ai ʻa Seiki mo ʻĀleki mo e ʻū poloká, naʻá na fakakaukau ke na langa fakataha ha meʻa. ʻI he taimi naʻe ʻi tuʻa ai ʻa Tēvita mo Seikí, naʻe tukuange ʻe ʻĀleki ke na heka taufetongi ʻi heʻene pasikalá. Pea ʻi he taimi naʻe fie vaʻinga keimi ai ʻa e tokotaha kotoa ʻi he TV, naʻe ʻikai ke seti ʻe ʻĀleki ha taimi. Naʻe ongo lelei ange ʻa e fevahevaheʻakí mo e angaʻofá ʻi he mātuʻaki totonu haohaoá.
ʻI he pō ko iá, ʻi he taimi naʻe fakatou fiemaʻu ai ʻe Seiki mo ʻĀleki ʻa e mā fakaʻosí ʻi he maʻu meʻatokoni efiafí, naʻe talaange ʻe ʻĀleki kia Seiki ke ne maʻu kotoa ʻe ia.
“Mālō!” Naʻe fakakuitaha ange ʻa Seiki. “ʻOkú ke fakapapauʻi ʻoku ʻikai ke ke fie vahevahe ia ke konga tolu?”
Naʻe kata ʻa Tēvita mo ʻĀleki. “ʻIkai ʻaupito!”
Tā fakatātaaʻi ʻe Alyssa Petersen