Ko e Hā ʻOku Hoko ʻi he Pekia ʻa e Palōfitá?

ʻOku ui ʻe he ʻEikí e kau palōfitá ke tataki Hono Siasí, pea ʻoku ʻi ai ʻEne palani ki he taimi ʻe pekia ai ha taha ʻiate kinautolu. ʻOkú Ne tataki mo fakahinohinoʻi maʻu pē Hono Siasí!

ʻI he pekia ha Palesiteni ʻo e Siasí, ʻoku tataki ʻe he Kōlomu ʻo e Kau ʻAposetolo ʻe Toko Hongofulu Mā Uá ʻa e Siasí. ʻOku kau heni ʻa e ongo ʻAposetolo naʻá na hoko ko e ongo tokoni ʻi he Kau Palesitenisī ʻUluakí.

ʻOku lotu ʻa e Kau ʻAposetoló mo fili e taimi ke fokotuʻu ai ha Kau Palesitenisī ʻUluaki.

ʻOku ui ʻe he ʻEikí ʻa e ʻAposetolo ngāue fuoloa tahá ke hoko ko e palōfita mo e Palesiteni hono hoko ʻo e Siasí.

ʻOku fakafou ʻi he palōfita foʻoú, ʻa hono uiuiʻi ʻe he ʻEikí ha ongo ʻAposetolo ʻe toko ua ko ha ongo tokoni ʻi he Kau Palesitenisī ʻUluaki foʻoú.

ʻE ui ha ʻAposetolo foʻou ke ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá.

Lolotonga e konifelenisi lahí, ʻoku hiki hotau nimá ke poupouʻi e Kau Palesitenisī ʻUluaki foʻoú mo e Kōlomu ʻo e Kau ʻAposetolo ʻe Toko Hongofulu Mā Uá. ʻOku ʻuhinga ʻa e hikinimaʻí ke tau loto-fiemālie ke ʻofa mo poupouʻi kinautolu pea muimui ki heʻenau fakahinohino ko e kau tamaioʻeiki ʻa e ʻEikí.

ʻI hono uiuiʻi ha Palesiteni foʻou ʻo e Siasí pe ʻAposetolo, te ke lava ʻo lotu ke ʻiloʻi naʻe uiuiʻi kinautolu ʻe he ʻOtuá. Pea te ke lava ʻo hikinimaʻi mo poupouʻi kinautolu ʻaki haʻo fakafanongo ki heʻenau ngaahi leá mo muimui kiate kinautolu!