“Fili ke Vahehongofulu ʻa Lōkaní,” Ko e Kaumeʻá, Nōvema 2025, 8–9.
Fili ke Vahehongofulu ʻa Lōkaní
“ʻOkú ke mateuteu ke ke talangofua ki he fekau ke totongi vahehongofulú?” Ko e fehuʻi atu ia ʻa Mamí.
Ko ha talanoa moʻoni mei USA.
ʻI he taʻu nima ʻa Lōkaní, naʻá ne fakakaukau ko e vahehongofulú ko ha fakakaukau kovi ia!
Lolotonga ʻa e efiafi ʻi ʻapí, naʻe hili ʻe Mami ha laʻi paʻanga ʻe 10 ʻi he tēpilé. “Tau pehē pē ʻokú ke maʻu ha paʻanga ʻe 10.”
Naʻe malimali ʻa Lōkani. “ʻIo!”
“Ko e vahehongofulú ko e peseti ʻe 10. Ko ia ai te ke foaki ha paʻanga ʻe taha ki he Siasi ʻo e ʻEikí.” Naʻe tohoʻi atu ʻe Mami ha paʻanga ʻe taha mei he fokotuʻunga paʻangá.
Naʻe fakafulofula ʻa Lōkani. “Foaki ha paʻanga? Ka ʻoku ou fie tauhi kotoa ʻe au ʻeku paʻangá!”
Naʻe pehē ange ʻe Mami, “Mahalo te ke ongoʻi kehe ange ʻi hoʻo lahi haké. ʻOku tāpuekina kitautolu ʻe he Tamai Hēvaní ʻaki ʻa e meʻa kotoa pē. Ko e totongi vahehongofulú ko ha founga ia ʻe taha ʻoku tau fakahaaʻi ai ki he ʻOtuá ʻoku tau ʻofa ʻiate Ia pea ʻoku tau houngaʻia ʻi Heʻene ngaahi tāpuakí.”
ʻI he taʻu ono ʻa Lōkaní, naʻe akoʻi ange ʻe heʻene kau faiako Palaimelí ʻoku fakaʻaongaʻi ʻa e vahehongofulú ki hono langa ʻo e ngaahi temipalé. Naʻe saiʻia ʻaupito ʻa Lōkani ʻi he ngaahi temipalé. Ko ia ai mahalo ko e totongi vahehongofulú ko ha fakakaukau lelei ia ki ha kakai ʻe niʻihi. Kae ʻikai maʻana.
ʻI he taʻu fitu ʻa Lōkaní, naʻá ne fakatokangaʻi naʻe malimali ʻa e kakaí ʻi heʻenau ʻoange ʻenau ngaahi sila vahehongofulú ki he pīsopé. ʻE lava moʻoni nai ke ke fiefia ʻi hoʻo foaki hoʻo paʻangá?
ʻI hono taʻu valú, naʻe ʻeke ange ʻe Mami kiate ia, “Lōkani, ko e hā naʻá ke fili ai ke papitaisó?”
Ko ha fehuʻi faingofua ia! Naʻe pehē ʻe Lōkani, “Ke tauhi ʻa e ngaahi fekaú mo muimui ʻia Sīsū Kalaisi.”
“ʻA ia ʻokú ke mateuteu ke ke talangofua ki he fekau ke totongi vahehongofulú?” Ko e fehuʻi atu ia ʻa Mamí. “Ko e fili pē ʻaʻau.”
Naʻe kamata ke ongoʻi loto-mamahi ʻa Lōkani. Ko ha fehuʻi ia naʻe faingataʻa. Naʻe teʻeki ai pē ke ne fie foaki ʻene paʻangá. Ka naʻá ne fie tauhi ʻa e ngaahi fekaú. Naʻe fakakaukau ʻa Lōkani ki he ngaahi temipalé mo e kakai malimali naʻa nau totongi vahehongofulú. Naʻá ne mihiʻi leva ʻene mānavá peá ne pehē, “ʻIo.”
“Ko ha fili lelei ia!” Ko Mami atu ia.
Naʻe ongoʻi sai ange ʻa Lōkani. “ʻOku ou ʻilo ʻoku mahuʻinga ange hono tauhi ʻo e ngaahi fekaú ʻi hono tauhi kotoa ʻeku paʻangá.”
ʻI he ʻaho Sāpaté, ʻi hono ʻoange ʻe Lōkani ki he pīsopé ʻene fuofua sila vahehongofulú, naʻá ne fakatokangaʻi ʻokú ne malimali. Naʻá ne ongoʻi fiefia! Naʻe teʻeki ai pē ke mahino kiate ia ʻa e meʻa kotoa pē fekauʻaki mo e vahehongofulú. Ka naʻá ne ʻofa ki he ʻOtuá, pea naʻá ne ʻiloʻi ʻe tāpuakiʻi ia ʻe he ʻOtuá ʻi heʻene talangofua ki he ngaahi fekaú.
ʻŪ tā fakatātā ʻa Shawna J. C. Tenney