Ko e Pekia ʻa Siosefa maʻá e Ongoongoleleí

Naʻe ʻita ha kakai tokolahi kia Siosefa Sāmita mo e Siasí. Naʻe ʻikai ke nau saiʻia ʻi he meʻa naʻe akoʻi ʻe Siosefá. Naʻe ʻi ai foki ha niʻihi naʻa nau loto ke tamateʻi ia.

Naʻe pau ke ʻalu ʻa Siosefa ki he kolo ko Kātesí ke fakapapauʻi ai ʻe ha fakamaau pe naʻá ne maumauʻi ʻa e laó. Naʻe tāpuakiʻi ʻe Siosefa ʻa ʻEma mo ʻene fānaú, feʻiloaki fakamāvae mo kinautolu, pea mavahe leva ki Kātesi.

Naʻe ʻalu ʻa e tokoua ʻo Siosefa ko Hailamé mo hano ngaahi kaungāmeʻa kehe mo ia. ʻI heʻenau mavahé, naʻe sio mai ʻa Siosefa ki mui ki Nāvū. Naʻá ne pehē, “Ko e feituʻu fakaʻofoʻofa tahá ʻeni pea mo e kakai lelei taha ʻi he lalo langí.”

Naʻe tuku pōpula ʻa e kau tangatá ʻi Kātesi. Naʻe lau ange ʻe Hailame kiate kinautolu mei he Tohi ʻa Molomoná. Naʻe talaange ʻe Siosefa ki he kau leʻó ʻoku moʻoni ʻa e Tohi ʻa Molomoná.

Kimui ange ʻi he ʻaho ko iá, naʻe feʻohofi atu ha kau tangata loto-ʻita mo ha ʻū meʻafana ki he fale fakapōpulá. Naʻe kamata ke nau fana ki he loki naʻe ʻi ai ʻa Siosefa mo hono ngaahi kaungāmeʻá. Naʻe fakapoongi ʻa Hailame mo Siosefa.

Naʻe loto-mamahi ʻaupito ʻa e Kāingalotú ʻi heʻenau ʻilo kuo pekia ʻa Siosefa mo Hailamé. Ka naʻa nau ʻiloʻi ʻe hokohoko atu ʻa e tupulaki mo hono tāpuakiʻi ʻe he Siasí ʻa e fānau kotoa ʻa e ʻOtuá ʻi he funga ʻo e māmaní.