15 100 ’e hau atu

Nā Josué E., 10 matahiti, Piura, Pērū

Josué E. ’e te hō’ē mātini rorouira ’e te tāpa’o manimani rima ti’a

I te va’ura’a o tō’u matahiti, ’ua tae’ahia tō’u matahiti nō te fa’ari’i i tā’u iho tomora’a FamilySearch ! I te ha’amatara’a ’ua taiā ri’i au, ’ua ha’api’i rā tō’u nā metua ’e tō’u mau taea’e ’e mau tuahine e nāhea i te tānūmera ’e i te hāmani i tō’u tumu rā’au ’utuāfare, ’ia nehenehe iā’u e tauturu i tō’u mau tupuna. I muri a’e i te reira, ’aita vau i taiā fa’ahou. ’Ua ’ite mai au ’ua turuhia vau ’e ’ua ineine.

E tamāroa ’e tōna tuahine ’e tōna metua tāne e hi’o ra i te hō’ē mātini rorouira

I muri iho, ’ua tupu mai te hina’aro iā’u ’ia riro ’ei ta’ata hi’opo’a i te ’ā’amu ’utuāfare, mai tō’u nā metua ’e mau taea’e ’e mau tuahine. ’Ua mā’iti au te reira nō te riro ’ei hō’ē o tā’u mau ’ōpuara’a nō te fa’anahora’a a te mau tamari’i ’e te feiā ’āpī. Nō te tāpae i teie fā, ’ua tītauhia iā’u e tānūmera 1 000 pāpa’a parau.

I te tahi taime e ’ite mai au te mana’o tuauru. ’Ua fa’aha’amana’o mai rā tō’u nā metua iā’u ē, e’ita vau e rave i te reira i te hō’ē noa mahana. ’Āhiri i te reira, e ti’a iā’u ’ia rōtahi i ni’a noa e toru pāpa’a parau i te mahana hō’ē, ’e hou te hō’ē matahiti, e tāpae au i tā’u fā. ’Ua parau mai rātou iā’u ē, mai te mea e fifi vau ’ia hāro’aro’a i te mau hōho’a, e tauturu mai rātou iā’u.

E tamaiti e pure ra, ’e te mau rima e tāpūpū ra i te mau tāreta nō te ’ōro’a hiero

’Ua pure au i te Metua i te ao ra ’ia ti’a iāna e tauturu mai iā’u ’ia tāpae i tā’u fā. ’Ua tupu te au maita’i i roto iā’u i muri a’e i tā’u pure.

’Aita vau i fa’aru’e ’e ’ua tāmau noa i te tānūmera i te mahana tāta’itahi. I muri a’e hō’ē matahiti, hou ’a ti’ahia ai tō’u e iva matahiti, ’ua tānūmera a’ena vau hau i te 1 000 pāpa’a parau ’e ’ua fa’ari’i au i te ti’ara’a ta’ata hi’opo’a. E ’oa’oa iti rahi tō’u !

E tamāroa e pārahi ra i ni’a i te matie i mua i te hiero

I teienei, e haere tāmau vau nā muri i tō’u nā metua i te hiero nō Trujillo, i Pērū. E tauturu vau i te nene’i i te mau tāreta nō te ’ōro’a, e tāpūpū ’e e hōro’a i te reira i te mero tāta’itahi o te ’utuāfare, ’ia nehenehe rātou e rave i te mau ’ōro’a ’a tīa’i noa ai au i roto i te ’āua o te hiero. ’Aita e maoro roa, e nehenehe au e haere i roto nō te rave i te mau bāpetizora’a.

E 10 matahiti tō’u i teienei ’e ’ua tānūmera vau e 15 100 pāpa’a parau ! ’Ua ’oa’oa roa vau ’e tē hina’aro rahi e tāmau noa i te tāpae i tā’u mau fā ’ia riro rahi atu ā mai ia Iesu Mesia te huru.