Ineine nō te tāmau noa i te tupu rahi

Tē pārahi ra Jewel i ni’a i te pārahira’a i te purera’a ’ōro’a ’e tōna nā metua ’e tōna taea’e. Tē pāpa’i hōho’a ra ’oia i te mau ’ā’amu o te pāpa’ira’a mo’a. ’Ua tāmata ’oia i te fa’aro’o i te ta’ata a’o, ’ua ’ī roa rā tōna vaira’a mā’a i te mau pepe urupu’upu’u !

I teie mahana ’o te mahana mātāmua ïa nō Jewel nō te haere i te piha a te Feiā ’Āpī Tamāhine, ’eiaha fa’ahou i te Paraimere. ’Aita ’oia i hina’aro e vaiiho i tōna mau hoa i roto i te Paraimere. ’Ua au roa ’oia e hīmene ’e e tai’o i te mau pāpa’ira’a mo’a ’e rātou.

Terā rā, e tomo atu Jewel i roto i te 12ra’a o tōna matahiti i teie matahiti. ’Ua tae i te taime nō te tomo atu i roto i te fa’anahora’a a te Feiā ’Āpī Tamāhine.

’Ua tāpiri Jewel i tōna nā mata ’e ’ua parau i te hō’ē pure muhu ’ore. E te Metua i te ao ra, ’a tauturu mai iā’u ’ia fa’ari’i i te hō’ē piha Feiā ’Āpī Tamāhine maita’i roa.

I muri a’e i te pure hōpe’a nō te purera’a ’ōro’a, ’ua huti hōhonu Jewel i te aho ’e ’ua haere atu i te piha ha’api’ira’a. Tei reira a’ena te mau tamāhine pa’ari. E maha rātou. Tē paraparau ra rātou ’e tē ’ata’ata ra.

« ’Ia ora na », ’ua parau atu Jewel.

’Ua ’ata’ata rātou. « ’Ia ora na ».

’Ua tomo mai te ’orometua ha’api’i ’e ’ua fa’ari’i poupou ia Jewel. I reira, ’ua ha’amata ’oia i te ha’api’ira’a.

I roto i te tuha’a rahi o te ha’api’ira’a, ’ua ’ite mai Jewel i te mana’o ’ōtahi. Tē taiā nei ’oia ’ia paraparau atu, nō te mea ’aita ā ’oia i mātau maita’i i te tahi atu mau tamāhine. E ti’a iāna ’ia fa’aea i roto i te Feiā ’Āpī Tamāhine nō te hō’ē tau maoro. E au ē nō te hō’ē tau mure ’ore ! E vai ’ōtahi noa ānei ’oia i’ō nei ?

I muri iho ’ua tae mai te hō’ē reo iti ha’iha’i i roto i tōna ferurira’a. E’ita ’oe e vai mure ’ore noa i roto i te Feiā ’Āpī Tamāhine. ’Ua nava’i noa tō ’oe pa’ari nō te haere i mua ’e ’ia ha’api’i rahi mai nō ni’a i te rirora’a ’ei pipi nā Iesu Mesia.

’Ua putapū Jewel i te tāmāhanahanara’a nā roto mai i teie mau parau. ’Ua ’ite ’oia i te reira ’a tauturu ai te Vārua Maita’i iāna. Noa atu ’aita ā tōna e hoa i roto i te Feiā ’Āpī Tamāhine, ’aita ’oia e vai ’ōtahi noa. Tei iāna ra te Vārua Maita’i.

I te fa’a’otira’a te ha’api’ira’a, ’ua fārerei atu Jewel i tōna ’utuāfare.

« E aha te huru i te piha a te Feiā ’Āpī Tamāhine ? » ’Ua ui atu māmā.

’Ua tauahi a’era Jewel iāna. « ’Mea maita’i roa. Tē mihi nei au i te Paraimere, ’e ’aita ā vau i mātau maita’i i te mau tamāhine. ’Ua ’ite rā vau i te Vārua Maita’i i te tāmāhanahanara’a iā’u ».

’Ua ʼataʼata māmā. « E mea maita’i ’ia fa’aro’o atu ! ’E pēnei a’e i te taime i muri nei e maita’i roa atu ā ».

’Ua tā’iri’iri Jewel i tōna ’upo’o. Tē ti’aturi nei ’oia e tano te mana’o o māmā.

I te taime nō muri iho i roto i te piha a te Feiā ’Āpī Tamāhine, ’ua aroha fa’ahou atu Jewel i te mau tamāhine.

« ’Ia ora na, Jewel », ’ua parau mai te hō’ē o rātou. « ’A pārahi mai i pīha’i iho iā’u ! »

’Ua ’ata’ata Jewel ’e ’ua pārahi atu i pīha’i iho i te tamāhine. ’O Ellie tōna i’oa. ’Ua paraparau rahi noa rātou hou te ha’amatara’a o te ha’api’ira’a. E mea maita’i roa Ellie ’e ’ua rave ’ia fa’ari’i-maita’i-hia Jewel.

I roto i te ha’api’ira’a, ’ua ui atu te ’orometua ha’api’i ’ua fa’ari’i ānei te hō’ē ta’ata i te hō’ē ’ohipa i tupu ’e te Vārua Maita’i.

’Āfa’i a’era Jewel i tōna rima i ni’a. « ’Ua putapū vau i te Vārua Maita’i i te tauturura’a iā’u, ’a taiā ai au i te ’āmui mai i te Feiā ’Āpī Tamāhine », ’ua parau ’oia. « Tē tauturu nei te Vārua Maita’i iā’u ’ia tupu rahi ana’e au ’e ’ia fa’aruru i te mau tāmatara’a ».

’Ua feruri fa’ahou Jewel i te tāmāhanahanara’a te Vārua Maita’i iāna i te taime ’a vai ’ōtahi ai ’oia. E putapūra’a maita’i te reira, i te fa’a’itera’a i te mau tamāhine i roto i te Feiā ’Āpī Tamāhine i te ’ohipa i orahia e āna.

I muri a’e i tāna fa’a’itera’a, ’ua fa’a’ite ato’a mai te tahi atu mau tamāhine. ’Ua au roa Jewel i te fa’aro’ora’a i te mea tā rātou i parau.

Tē mana’ona’o fa’ahou nei Jewel i te Paraimere i te tahi taime. Maoti rā te Vārua Maita’i, ’ua ineine ’oia i te tāmau noa i te tupu rahi.

Pia i te PDF

Fa’ahōho’ara’a nā Liz Brizzi