Te hau i roto i te pure

« Pāpā ’a fa’ateitei atu ā ! » Pi’i hua a’era Mary.

’Ua ’ata te pāpā ’e ’ua tūra’i atu ā ’oia i te tāhoro. ’Ua ta’amuhia te tāhoro i ni’a i te hō’ē tumu rā’au rahi i ni’a a’e i te ’ānāvai Mississipi. Mea au roa nā Mary te hupe i ni’a i tōna hōho’a mata, ’e te mau māineine i roto i tōna ’ōpū ’ia tāhoro ana’e ’oia i ni’a i te pape.

« ’O vau tō muri iho ! » ’Ua parau Elizabeth.

’Ua ’ōu’a mai Mary i raro i te tāhoro nō te vaiiho i tōna tuahine ’ia tāhoro ato’a.

Tē ora ra te ’utuāfare o Mary i Nauvoo. ’Ua tomo mai tōna nā metua i roto i te ’Ēkālesia tau matahiti i ma’iri a’e nei, ’e ’ua ho’o i te mau mea ato’a tā rāua e vai ra, nō te haere i reira ’e ’ia ’āmui atu i te tahi feiā mo’a.

E ’oire ’ohipa oraora roa ’o Nauvoo. E tae noa mai te mau ta’ata ’āpī i te mau mahana ato’a. Te patura’a i te hō’ē ’oire ’āpī e mea rahi roa te ’ohipa, ’e e tauturu ato’a mai te mau tamari’i. Te tauturura’a, ’ua hōro’a ia Mary te nīno’a mana’o e ta’ata pa’ari ’e e mea faufa’a ’oia. I te tahi taime, e tauturu ’oia ma te ’āfa’ira’a i te mā’a nā tōna pāpā e rave ra i te ’ohipa i ni’a i te hiero ’āpī.

I te sābati, ’ua ’ō’omo Mary i tōna ’ahu nehenehe roa a’e ’e ’ua tauturu ’oia i tōna mau taea’e ’e mau tuahine ’ia fa’aineine nō te purera’a. ’Ua putuputu mai te mau ta’ata ato’a i raro a’e i te mau tumu rā’au, nō te fa’aro’o i te peropheta Iosepha Semita ’ia ha’api’i nō ni’a ia Iesu Mesia. E mea au nā Mary e ha’api’i mai nāhea rātou i te hō’ē mahana e ora fa’ahou ai i pīha’i iho i te Metua i te ao ra. ’Ua ’ite mata ’e ’ua fa’aro’o te peropheta e rave rahi mau mea fa’ahiahia.

Teie rā, ’aita vetahi mau ta’ata e au maita’i i te peropheta. ’Ua fa’aro’o Mary i te mau ’ā’amu nō te mau ta’ata e hina’aro nei e hāmani ’ino i te peropheta.

I te hō’ē pō nō te tau ve’ave’a, tē tauturu ra Mary i tōna māmā i te tāmā i muri a’e i te tāmā’ara’a. I muri iho ’ua ho’i mai pāpā i te fare. Ma te roimata i tōna hōho’a mata.

« E aha te ’ohipa i tupu ? » ’Ua ’ui atu māmā.

« ’Ua taparahi-pohe-hia te peropheta Iosepha », ’ua parau pāpā.

’Ua ha’amata ato’a māmā i te ta’i. « Nāhea te ’Ēkālesia e haere i mua ’aita ’oia ? » ’ua ui māmā.

E ’oto rahi tō Mary ’e te mata’u. ’Ua ’ite ’oia ē, te peropheta ’o te tāvini mā’itihia ïa a te Atua. Nāhea te Metua i te ao ra e vaiiho ai i te reira ’ia tupu ?

’Ua ha’amata ’oia i te ta’i ’e ’ua horo atu i rāpae i te fare i roto i te ’āua tiare. I muri a’e i te topa turira’a i pīha’i iho i te pū ’aihere, ’ua ha’amata Mary i te pure. « E te Metua i te ao ra, e aha tā mātou e rave ? ’Ua pohe tō mātou peropheta ». ’Ua tahe noa te roimata i ni’a i tōna hōho’a mata.

I reira, ’ua tae mai te hō’ē reo marū i roto i te ferurira’a o Mary. E hōro’a atu vau i te hō’ē atu peropheta nō te arata’i i tō’u mau ta’ata.

’Ua fa’a’ī te hō’ē nīnō’a mana’o o te hau ’e te ’oa’oa i tōna ’ā’au. ’Ua tāmarō ’oia i tōna roimata ’e ’ua horo ’oi’oi atu ’oia i te fare mai tāna e nehenehe.

« Māmā ! Pāpā ! » ’Ua parau Mary. « ’Ua pure au ’e ’ua pāhono mai te Metua i te ao ra iā’u ». ’Ua fa’ati’a ’oia ia rāua nō te reo ’e te nīno’a mana’o o te hau tāna i putapū.

’A tauahi ai māmā ’e ’o pāpā iāna, ’ua ’ite Mary e maita’i te mau mea ato’a. Tē ’oto noa ra ’oia, ’e ’ua ’ite ’oia tē vai ra te mau tau fifi i mua. E tāmau noa rā te Metua i te ao ra i te arata’i ia rātou ’e i te tauturu ia rātou.

Fa’ahōho’ara’a nā Kristin Sorra