« Te ’īpōpō ’īna’i hope’a », Hoa, Novema 2025, 18–19.
Te ’īpōpō ’īna’i hope’a
’Aita i tano ! ’Aita e ta’ata i ’ōpere nā Alex !
E ’ā’amu mau nō Marite.
’Ua pou mai Alex nā ni’a i te ’ē’a ma te ta’ahi māniania ’e ’ua huti i te aho hōhonu.
’Ua hi’o atu māmā iāna nā roto mai i tāna buka. « E aha te fifi ? »
« ’Aita hō’ē ta’ata i ’ōpere nā’u ! » ’ua parau Alex. « ’Aita roa vau i au i te rirora’a ’ei teina ». E fa’ari’i noa te mau taea’e o Alex i te mea tā rātou e hina’aro. E ’ere roa te reira i te mea tano.
« ’Ua pāpū roa iā’u ē mai te mea e ani ’oe ma te maita’i, e ’ōpere tō ’oe mau taea’e nā ’oe », ’ua parau māmā.
’Ua fa’atu’atu’a Alex i tōna tu’e mata. « ’Ua ani maita’i ho’i au ! »
« ’Āhani pai ’oe i tāmata i te fa’atano i te fa’ata’a minuti ? Mai te reira hō’ē ā ïa tō ’outou taime nō te ha’uti ».
« ’Ua fa’atano vau i te fa’ata’a minuti ! » ’ua parau Alex. « Terā rā, e fa’atano paha vau e piti a’e nō te ha’apāpū maita’i atu ā ». ’Ua haru mai ’oia i te fa’ata’a minuti hau i ni’a i te pa’epa’e o te fare tūtu ’e ’ua pa’i’uma atu i ni’a i te ’ē’a. Tē ha’uti ra tōna teina ’o David i te hō’ē ha’uti i ni’a i te ’āfata teata.
« ’Ua parau māmā e ti’a ia ’oe e ’ōpere », ’ua parau Alex. ’Ua fa’atano ’oia i te fa’ata’a minuti i ni’a e pae minuti. « ’Ia ta’i ana’e te reira, nā’u ïa te taime ».
I te mahana nō muri iho, i tō Alex ’e tōna tu’ana ’o Jake i hina’aro ai e ha’uti i te hō’ē ha’uti, ’ua fa’atano rāua i te fa’ata’a minuti i ni’a e 30 minuti te ta’ata tāta’itahi. I tō David ’e Jake ha’utira’a ’e te mau tiupa, ’ua tai’o rāua hō’ē ā rahira’a tiupa nā te ta’ata tāta’itahi. ’E i tō David ’e Alex hina’arora’a rāua to’opiti i te faraoa monamona totora hope’a, ’ua tāpū maita’i rāua i te reira nā te ’āfara’a. I te pae hope’a ’ua ha’amata te mau mea i te tano maita’i.
I muri iho ra, ’ua tae mai te hora nō te tāmā’ara’a i te pō …
I taua pō ra, ’ua ’amu rātou i te pātēti ’e te ’īpōpō ’īna’i ! ’Ua ha’amata Jake i te fa’a’ī i tāna merēti i te pātēti hou Alex ’a haru mai ai i te taipu.
« Hey, e ’ere i te mea tano », ’ua parau Alex. « ’Ua po’ia ato’a vau ! »
’Ua tu’u atu pāpā i te rima i ni’a i te tapono o Alex. « Alex, tē vai ra te mā’a nā te tā’āto’ara’a. ’A hi’o na, e taipu vau nā ’oe i te hō’ē ā fāito mai tā Jake ». ’Ua taipu pāpā i te pātēti i roto i te merēti a Alex.
I muri a’e i tō rātou ha’amaita’ira’a i te mā’a, ’ua ha’amata te mau ta’ata i te tāmā’a. I te paura’a te mā’a a Alex, ’ua po’ia fa’ahou ’oia. ’Ua hi’o atu ’oia i roto i te pāni i rōpū i te ’iri ’aira’a mā’a. Tē vai ra hō’ē ’īpōpō ’īna’i hope’a i ni’a i te ha’apu’e pātēti. ’Ua tu’u atu ’oia i te reira i roto i tāna merēti.
« E ’ere i te mea tano ! » ’ua parau David. « ’O terā te hope’a ».
’Ua fa’atoro atu Jake i te ’īpōpō ’īna’i ’e tāna pātia. « Hina’aro ato’a vau. ’A ’ōpere i te reira ».
« E ’ōpere i te reira ? » ’ua parau Alex. « Nā tātou e toru ? E mea na’ina’i roa ho’i ».
’Ua tā’iri’iri Jake ’e David i tō rāua upo’o. « E mea tano roa ».
’Ua rave Jake i te merēti a Alex ’e ’ua ha’amata i te vāhi maita’i i te ’īpōpō ’īna’i e toru tuha’a. ’Ua hi’o Alex i te ’īpōpō ’īna’i e na’ina’i noa atu ra.
’Ua ’ata māmā. « E mau tuha’a na’ina’i roa te reira ! »
’Ua ’ata ato’a pāpā. « E ’ere noa i te mea tano maita’i », ’ua parau ’oia. « E nehenehe paha ïa tātou e tāmata i te ’ōpere maita’i a’e i tā tātou mau tauiha’a, ’āhiri i te ’ōperera’a i te mau mea ato’a ».
’Ua hi’o atu Alex i te mau tuha’a na’ina’i o te ’īpōpō ’īna’i. E mea ma’au ri’i. ’Ua hina’aro rahi mau ānei ’oia i te teie ’īpōpō ’īna’i ? Penei a’e e tītauhia iāna ’ia ha’api’i mai i te ’ōpere rahi atu ā.
I te mahana i muri a’e, i tō Jake ’e ’o Alex hina’arora’a e ha’uti to’opiti i te mau tiupa, ’ua fa’aoti rāua e patu ’āmui i te hō’ē mea. I tō David ’e Jake vaira’a i rāpae, ’ua vaiiho Alex ia rāua ’ia tā’ahi i tōna pere’o’o ta’ata’ahi te tahi i muri mai i te tahi. E tō te tā’āto’ara’a hina’arora’a e ha’uti i te hō’ē ha’uti i ni’a i te ’āfata teata, ’aita Alex i fa’atano i te fa’ata’a minuti. ’Ia hi’ohia e mea au maita’i ’ia ’ōpere ’e ’ia hāmani maita’i i te rirora’a ’ei mea tano a’e.
I taua pō ra, ’a hina’aro to’opiti ai Jake ’e ’o Alex i te faraoa na’ina’i hope’a i te tāmā’ara’a, ’ua parau Alex ia Jake e nehenehe ’ōna e rave i te tā’āto’ara’a.
« Māuruuru ! » ’Ua ’amo Jake i te mata ia Alex. « ’Ua pāpū ia ’oe e’ita ’oe e hina’aro e vāhi i te reira e toru tuha’a ? »
’Ua ’ata David ’e ’o Alex. « Pāpū maita’i ’aita ! »
Fa’ahōho’ara’a nā Alyssa Petersen