Te mau ha’amaita’ira’a o te Hiero

Nā Lucy Stevenson Ewell

E ’ā’amu mau nō Vanuatu mai.

Te hōho’a mata ’ata’ata o te hō’ē tamaiti i mua i te hō’ē hōho’a fenua nō Vanuatu

« Tei ’ō nei te mau misiōnare ! » ’ua tuō ’o Graham. ’Ua aroha ’oia i te mau misiōnare ’a haere ai rāua i tō rāua fare.

’Ua bāpetizohia māmā, pāpā ’e te tua’ana ’o Graham, ’o Nunu, i te matahiti i ma’iri a’enei. E mea ’āpī roa Graham ’e tōna teina , ’o Ioba, nō te bāpetizohia. E mea au rā nā rāua ’ia ha’api’i mai nā roto mai i te mau misiōnare.

« I teie mahana, tē hina’aro nei māua e paraparau nō ni’a i te hiero », ’ua parau Elder Hale. « E fare ta’a ’ē teie e nehenehe ai ’outou e rave i te mau fafaura’a i mua i te Atua ’e ’ia tā’atihia i tō ’outou ’utuāfare. Te aura’a e nehenehe ’outou e vai ’āmui noa e a muri noa atu ».

« Tei Niu Terani te hō’ē o te mea fātata roa a’e ». ’Ua fa’a’ite ’o Elder Singh i te hō’ē hōho’a nō te hō’ē fare ’uo’uo nehenehe. « E mea ātea roa te tere. E ho’ona rā te mau ha’amaita’ira’a ».

« E hina’aro tātou e haere », ’ua parau Māmā.

’Ua fa’anaho te mau metua ’o Graham i tō rāua tere hiero ’e te tahi atu ’utuāfare nō te ’ēkālesia. ’O rāua nā ’utuāfare mātāmua e piti nō Vanuatu mai tei tomo i roto i te hiero !

Hō’ē manureva ’e hō’ē pere’o’o uta ta’ata e tere ra i te hō’ē hiero

Tau ’āva’e i muri mai, ’ua tae mai te mahana nō tō rātou tere. ’O te taime mātāmua ïa ’o Graham i pa’i’uma ai i roto i te hō’ē manureva, ’e e mea ’ārearea roa. ’Ua hi’o ’oia i te mau ata ’e te moana i raro a’e ia rātou. ’Ua feruri ’oia i te fare teitei ’uo’uo. ’Ua hina’aro ’oi’oi ’oia e hi’o i te reira !

I te taura’a rātou, ’ua ta’uma rātou i roto i te hō’ē pereo’o uta ta’ata. E tere pere’o’o fifi nō te ’āpo’opo’o o te porōmu, ’e ’ua rohirohi roa Graham. ’Ua fātata rā rātou i te tāpae i reira.

« ’A hi’o na ! » ’Ua tohu Graham nā te ha’amāramarama. E rā ! ’Ua hau atu i te nehenehe i te mau hōho’a.

I roto i te hiero, e mea mū ’ore ’e te hau. ’Ua ’ahu-ta’ato’a-hia rātou i te ’ahu ’uo’uo. I te hō’ē taime, ’ua pārahi ’o Graham ’e tōna mau taea’e i roto i te piha tīa’ira’a ’e ’ua hi’o i te mau hōho’a nō Iesu Mesia.

I muri iho, ’ua arata’i te hō’ē rave ’ohipa nō te hiero ia rātou i roto i te piha tā’atira’a. Tē tūturi ra nā metua ’o Graham i pīha’i iho i te hō’ē fata tei tāpo’ihia i te ’ahu vavai. E mata ’oa’oa tō rāua !

’Ua tūturi Graham ’e tōna mau taea’e i pīha’i iho ia Māmā ’e ia Pāpā. ’Ua hi’o rātou i te mau hi’o rahi i ni’a i te mau papa’i. ’Aita tō rātou mau hōho’a i roto i te mau hi’o e hope’ara’a.

I te parau a te rave ’ohipa o te hiero : « E fa’aha’amana’o te mau hi’o ia ’outou ē e nehenehe ’outou e tāhō’ē ē a muri noa atu ».

’Ua tupu te ’oa’oa ’e te hau i roto ia Graham. E au ē tē tauahi mai ra te Fa’aora iāna.

’Aita i maoro ’ua tae i te taime nō te ho’i i te fare. I ni’a i te pere’o’o uta ta’ata ’e te manureva, ua feruri noa ’o Graham i teie mana’o ta’a ’ē tāna i fa’ari’i i te hiero.

Tau mahana i muri mai, ’ua tupu mai te hō’ē mata’i rahi. E au ē e fati te mau tumu ha’ari !

’Ua mata’u ’o Graham. « E fifi ānei tātou ? »

Nā ’o mai nei Pāpā : « ’’Aita ». « E mea pūai rā te mata’i. ’Ua parau te mau misiōnare ’ia ha’aputuputu i roto i te fare purera’a ē tae roa atu i te taime e mau ai te vero ».

’Utuāfare e pārahi ra i ni’a i te pārahira’a roa ma te hi’o nā te ha’amāramarama i te mau tumu rā’au e pūhihia ra e te mata’i

’Ua tauturu Graham ia Māmā ’ia amo i te tahi mā’a ’e te mau ’ahu ta’oto i te fare purera’a. E mea pūai roa te mata’i !

I roto i te fare, ’ua hau ri’i Graham. Tei reira tō rātou mau hoa ato’a nō te ’ēkālēsia. E nehenehe noa rā tāna e fa’aro’o i te mata’i e ’ū’uru ra.

’Ua ani Graham : « E aha rā te huru o tō tātou fare ? »

« E tīa’i tātou ’ia mau te vero ’a hi’o atu ai ». ’Ua tāpiri Māmā iāna i pīha’i iho iāna. « Te mea faufa’a roa a’e, ’ua pāruruhia tō tātou ’utuāfare. Tē ha’amana’o ra ’oe i te mea i iho mai i roto ia ’oe i te hiero ? »

Tui upo’o ihora ’o Graham. « ’Ua tupu te māhanahana ’e te hau i roto iā’u ».

Mata ’ata’ata a’era Pāpā. « ’E maoti Iesu Mesia ’e tō tātou tā’atira’a i te hiero, e hō’ē noa tātou ē a muri noa atu ».

’Ua feruri Graham i te mana’o māhanahana ’e te hau tei tupu i roto iāna i roto i te hiero. ’Ua tano Pāpā. Maoti Iesu Mesia ’e te mau fafaura’a o te hiero, e nehenehe rātou e riro ’ei ’utuāfare ē a muri noa atu. ’E nō te mea ’ua ’ite ’oia ē, e MAITA’I mau te mau mea ato’a.